گرک ئولونجه گلم غمدن آه و زاره قیزیم #حضرت_رقیه_دلپاک

زبانحال حضرت زینب (س)
در شهادت حضرت رقیه (س)
..
..
..
..
رضا غلامپور(دلپاک)
..
..
..
..
گرک ئولونجه گلم غمدن آه و زاره قیزیم
کی بو خرابده قویدوخ سنی مزاره قیزیم
..
گرک ئوله بو غمیله کی چاره سیز عمّه ن
تاپانمادی سنه ویرانسراده چاره قیزیم
..
نلر دئیوم، دانیشیم هانسی بیر ملالیندان
دگول گلن تبعات غمون شماره قیزیم
..
ایاقلارین یاراسیندان دئیوم کی توختامادی
سنیله گئتدی مزاره او کهنه یاره قیزیم
..
و یا قولاقلاروین پاره یئرلری کی منیم
کتاب عمرومی ایلیلّه پاره پاره قیزیم
..
دئدیم قییدساخ اگر یثربه آلیب سالارام
اوزوم قولاقلاریوا بیرده گوشواره قیزیم
..
مدینه مقصدیم اولسا نجه گئدیم سنسیز
نجه گئدیم نجه سنسیر من اول دیاره قیزیم
..
وورا وورا سنی قوم ستمگر ئولدوردی
که لعن حق بئله بیر قوم نابکاره قیزیم
..
قولووی باغلادیلار قمچی ووردولار باشیوا
نه باش کی آغریسی سالدی سنی فشاره قیزیم
..
ایاقه دور سنه چوخ تئزدی قبریده یاتماخ
ایاقه دور کی بو یئردن گئداخ کناره قیزیم
..
بو یئرده آج قالیب امّا گتیرمدین یوزووه
فدا اولوم من اوزوم سنده کی وقاره قیزیم
..
ملاله باخ سنه باخ سن هارا بو جبر هارا
سنی کی آگهیدون سرّ اختیاره قیزیم
..
گرکده بیله گئدیدون کی چوخ داریخمیشدون
فضای قلبیوی سالمیشدی غم حصاره قیزیم
..
او تللری کی اسردی یوزونده ساغ و صولا
بلشدی حیف اولا ویرانه ده غباره قیزیم
..
شیرین دلون هارا گئتدی هایاندا باتدی کی دور
دانیش منیله نچه کلمه سن دوباره قیزیم
..
آنام کیمی نیه تئز دویدون اؤز حیاتیندان
اگر چه علتی روشندی کردگاره قیزیم
..
یانیب شرار ملالتده شمع تک اریدون
کی یاندیریر منیده سن تک اول شراره قیزیم
..
« ئولوم نه یاخشیدی الله اسیر اولماخدان »
کی دونموشیدی دلینده بو سوز شعاره قیزیم
..
“خرابه گوشه سی آخر گتوردی جانه سنی”
فشاری سالدی سنی حال احتضاره قیزیم
..
گورنده بیر سارالان گل یوزون دوشر یادیما
نه گل یوزی که نشانه اولوبدی خاره قیزیم
..
خرابه دور بو مکان لیک معتبر اولاجاخ
سنیله ال تاپاجاخ کامل اعتباره قیزیم
..
سنی که ایستملیدون زمانه ایستمدی
سنی کی نعمتیدون بیله روزگاره قیزیم
..
هر ایل عزا سنه ساخلار خلوصیله دلپاک
آخار غمونده سوتک گوزیاشی عذاره قیزیم
..
قرارین الدن آلیبدیر بو ایلده بوش حرمون
کی چوخ چتیندی بو محنت او بیقراره قیزیم
..
..