یزید ایستدی آل رسولی محضرینه

رد اثاث غارت و کوچ از شام
.
✍️ زبدة الاشعار ✍️
.
🆔: @nohe_torki
.
مرحوم علی اکبر رمزی تبریزی
.
یزید ایستدی آل رسولی محضرینه
گیوندوروبدی بیر اوزگه لباس سوزلرینه
.
دئدی که ابن زیادین یوزی قبیح اولسون
ایکی جهاندا گرفتار لعن و طعن اولسون
.
خدا عزیزه لرین خلق ایچینده خوار ائلدی
منی پیمبر حضورونده شرمسار ائلدی
.
قضا ایشیدی گئچوب دردوزی بیان ائلیون
منه خیالوزی بی واهمه عیان ائلیون
.
اگر بو شهریده قالساز بو جانه منّت وار
سیزه بو شهریده هر نوعی استراحت وار
.
مدینیه گئدوسوز چوخ چوخ استراحتیله
یولا سالوم سیزی هر قِسم ناز و نعمتیله
.
امام سویلدی غربتده چکموشوق زحمت
مدینیه یولا سال بلکه بیر اولاخ راحت
.
ولیک شرطی بودور بو سوزیمی گوش ائده سن
بو التماسیمی مندن گرک قبول ائده سن
.
اگر چه بیزلره چوخ بیر بیوک جسارت اولوب
گرک اَله گله بیر نِچّه زاد که غارت اولوب
.
بیری عمامۀ اکبردی ارث خاصّ رسول
بیریسی معجر زینبدی یادگار بتول
.
اوچومجوسی آتامین پاره پاره پیرهنین
که سویدولار اونی صحراده قویدولار بدنین
.
یزید امر ائلدی ردّ غارته او زمان
اولوبدی واقعۀ کربلا او یئرده عیان
.
او دمده ساطع اولوب عطر پاک پیغمبر
که گلدی بیر نفر اَلده عمامۀ اکبر
.
آلوب عمامه سینی لیلی وفا پرور
دئدی اوغول سنه قربان آنان علی اکبر
.
دوزوم نِجه بو قدر جورِ کینیه سنسیز
اوغول آنان نِجه گِتسون مدینیه سنسیز
.
گلوب او بزمه او دم بیر خبیث شوم شیَم
نِجه دئیوم گتوروب پاره پاره علم
.
او بزمیده قورولوب ناگهان بیر اوزگه اساس
اوجالدی اهل حرمندن صدای واعبّاس
.
نه چکدیلر او زمان اهل بیت پیغمبر
که گلدی مجلسه گهوارۀ علی اصغر
.
آناسی سویلدی من بُلمورم دیوم آقا وای
و یا دیوم آناسین چوللره سالان بالا وای
.
تمام اهل حرم چکدی ناله و شیون
گورنده شمر گلور اَلده قانلی پیراهن
.
دئدی علی قیزی گور ذلّتین اساسی بودور
دئ بیر گوروم منه سن پادشه لباسی بودور
.
او دمده زینب غمدیده مثل نالۀ نای
توکوب سرشکینی سسلندی وای قارداش وای
.
یتوردی ظلمونی اتمامه اول شرور لعین
بو ظلمدن ائلیوب کلّ عالمی غمگین
.
دئدی گتوردیله بیر نچّه کیسه پول اول شوم
دئدی که آغلاما سن ای علی قیزی کلثوم
.
یقین ایله قضا امرینه رضا وئرّم
حسین قانینه بو نقدی خونبها وئرّم
.
دوتوب یزیده یوزون دخترِ ولیّ الله
ندور جواب بو ظلمه یزید روز جزاه
.
بو پول عوضدی مگر اشک دیدۀ تریمه
و یا که قانه باتان تار موی اکبریمه
.
ائدوب خطاب امامه یزید بد اختر
که اهل بیته مهیّادی تازه محمل لر
.
باخوب کجاوه لره دخت میر شاه عرب
دئدی ندندی حسین، ئولموری باجون زینب؟
.
روادی سن اولاسان ایله قانیوه غلطان
مکان اولا منه قارداش کجاوۀ الوان
.
سزا دگول داخی الوان کجاوه بو زاره
ائدون آماندی بو محمل لر اورتوگون قاره
.
او دمده ایتدیله محمل لر اورتوگون قاره
یتوشدی حکم رحیل اهل بیت اطهاره
.
.
#کوچ_شام
#یزید_ایستدی_آل_رسولی_محضرینه
#رمزی_تبریزی
#ترکی
.
✍️ #زبدةالاشعار ✍️
.
🆔: @nohe_torki