شهادت حضرت عباس (ع)
..
..
مرحوم صدری اردبیلی
..
..
نه سخت مرحله گلدی عیانه اول ساعت
دولاندی عکسینه دور زمانه اول ساعت
..
حسین تشنه لبون باوفا علمداری
امیر لشگری هم قارداشی سپهداری
..
ایکی قولی قلم اولدی هیچ ایتمدی افسوس
سو مشگی صدمه گورنده باخوب اولوب مأیوس
..
اوقدری منصبه جایز اولان او شیر دلیر
دوشوب کمنده اونی لشگر ایلیوب تسخیر
..
شتاب ایدردی خیامه گیده او شیر ژیان
دگنده مشگینه اوخ منصرف اولوب او زمان
..
همین که صاق صولونا ووردی قرمزی منصب
کناره گتدی اونی نخلزاردن مرکب
..
لجام مركب الینده دگلدی دوندرسون
قشون يغيشدی اونی خیمه گاهه گوندرسون
..
آت اوسته گیتدیله تا مرکز بیابانه
پیاده کچدی گلوبدور سواره جولانه
..
اوخ اوسته سانجلوب اوخ نیزه اوسته نی پاره
اوزی آتی یهری اوخشیوردی نیزاره
..
او قدری سانجلوب اوخلار او زبدۀ ناسه
دوتاردی واهمه هرکس باخاردی عباسه
..
قدم آتاندا عقابی گلنده جولانه
دگردی بیر بیره اوخ سس دوشردی مـیـدانـه
..
باخاردی بیر بیرینه لشگر جفاگستر
دیردیلر هانی عباس بس هانی خنجر
..
بو سوزده شاهد عهده دلیل واضح وار
وئریر شهادت اونا گورسه قبرینی زوار
..
گوروبدو قبرینی هرکس او اشجع ناسون
بیلور نه حاله قالوب جسم پاکی عباسون
..
او ساعتون اثریندن زمانه عباسه
همین او قبری قویوبدور نشانه عباسه
..
واریمدو شاهد دیگر بو سوزده چوخ حسّاس
نیه بویوردی حسین هاردا قالموسان عبّاس
..
اگرچه عالمیدی هانسی بیر مکاندا دوشوب
لواسی مشکی قولی پیکری هایاندا دوشوب
..
نه یرده حمله ایدوبلر او اشجع ناسه
نه نوعی صدمه ویروبلار وجود عباسه
..
هایاندا اسديروب اعدا جفالرون یلینی
هایاندا ووردیلا سیندی عمودیلن بئلینی
..
نه اولدی دوشدی باشیندان کلاه جنگی اونون
آخوبدو قانيله الوان سولوبدو رنگی اونون
..
بو محنتون هاموسی جزء جزء فرد به فرد
امامه روشنیدی ماجرای جنگ و نبرد
..
سوزی خلاصه کچوم اصل مطلبون اوسته
گورن دیردی اونی یوخدو مرکبون اوسته
..
همینکه نیزه و اوخ سالدی جسمینه لنگر
دوشوبدو تپراقا آتدان او ناتوان پیکر
..
آغیر سلاح اولا قولسوز بدن دولی پیکان
تصوّر ایله نجه دوشدی تپراقا آتدان
..
همینقَدَر که عقابی گلنده جولانه
یر اوسته نازل اولاندا او شیر فرزانه
..
سالوبدو حضرت زهرا شراره آفاقه
آلوب قوجاقه اونی اندیروبدو تپراقه
..
باشین دیز اوسته قویوب مهر بی حساب ایلیوب
اوغول آدیلان اونی دیندروب خطاب ایلیوب
..
حسین یولوندا کچوبسن اوغول ایکی قولدان
همان او قوللاروا فاطمه آنون قربان
..
غرض او یرده فلک دوره نی تمام ایلدی
دوتوبدو خیمه سرایه یوزین سلام ایلدی
..
حسین یتوردی اوزین چوخ شتاب و سرعتلن
وزیرینون باشی اوسته اوتوردی محنتلن
..
عزیز قارداشنون قارداشی گوزون سیلدی
توکوبدو کول یوزونه گوزیاشی گوزون سیلدی
..
آتام نشانه سی ای شـــیـر بـاوفا عباس
فدا بو جانه که سن ایلدون فدا عباس
..
رضای حقی دوتوب جسم و جاندن کچدون
آتام یانیندا عجب امتحاندن کچدون
..
آنون یانوندا دگل دردووی عیان ایده سن
نولور وصیّتوی سن منه بیان ایده سن
..
اگرچه منده بو چولده شهید اولوب یاتارام
منای عشقده قانه سنون کیمی باتارام
..
سفارشون دیرم دختران زهرایه
عمل اونا ایلیورلر گیدنده بطحایه
..
جوابین عرض ایلدی ای شهنشه والا
رضای خاطروی ایسترم سنون مولا
..
آلوب رضای حسینی اولوبدو آسوده
یوموب ایکی گوزینی جان ویروبدو معبوده
..
غلام درگهوم «صدری» گنهکارم
عنایت ایله منه کمترین عزادارم
..
..
#عباسیه #صدری_اردبیلی #عباسیه_شهادت #ترکی #زبدةالاشعار
نظر دهید