رجز روز عاشورا
..
..
حاج غلامرضا عینی فرد زنجانی
..
..
کربلایه آسماندان ای مسلمان قان یاغور
کسدیلر باشین حسینون جسمینه پیکان یاغور
..
..
آلدیلار اطرافنی مظلوم حسینون قوم دون
دورت طرفدن وردولار عالم اولیدی سرنگون
ذوالجناح اوستن یخلدی افتخار کاف و نون
تیتردی وحشتلی میدان آسماندان قان یاغور
..
..
آنّنی تپراقلار اوسته قویدی سلطان حجاز
آخرین ساعات عمرینده ایدوب راز و نیاز
اهل اسلامه بُلوندیرسون مهم اولسون نماز
بو نماز اؤستونده شاهین أؤستونه طوفان یاغور
..
..
یار و انصاری باتوب قانه دوشوبلر مقتله
اصغرین ئولدوردى حتى الده تیر حرمله
فکرینه گلمور او حالتده اونا یاور گله
تیر و خنجر أؤستونه هر سمتدن هر آن یاغور
..
..
آنّنی دائم تراب اؤسته قویانموردی امام
داش وروب یارمشدی باشین دشمن بیعار و نام
ساق ئوزون سورتوردی تپراقه ایدوردی اهتمام
بلکه سجده ایلسین گوزدن در غلطان یاغور
..
..
آغلیاندا سجده حالنده امام کائنات
آز قالوردی محوریندن چخسون اول دمده کرات
تشنه لبلر بیربیره دگدوقجا آغلاردی فرات
باشینه غربال غمدن غصّه بی پایان یاغور
..
..
عرض ایدوردی بارالها سن منه معبودسن
عشق زنجیرینده ایتدون عالمی مقیود سن
ساجدم بو قانلی مقتلده منه مسجود سن
سجده ایتدوقجا حسینه عشق چون باران یاغور
..
..
ذکر یارب یاربیم گودالیده لذت ویرور
من سنون هجرونده نالانم منه زحمت ویرور
یاره لر زحمتده ویرسه مژدۀ وصلت ویرور
اف دیمم یاغسون نقدری جسمیمه پیکان یاغور
..
..
سن منه معشوق و منده عاشق شیدا سنه
ویرمشم بو راه عشقیمده نه وار یکجا سنه
اکبری هم اصغری هم قاسم و سقا سنه
ایلدیم هدیه غم ایتمم داشدی دورد یاندان یاغور
..
..
سالمارام دنیاده «عینی فردی» گرداب غمه
چون اوخور اخلاصیله نوحه گلنده ماتمه
زینبیه آستانی کعبه دور هر محرمه
کربلا تک دورد طرفدن درد و غم باخسان یاغور
..
..
#عاشورا #عینی_فرد #تری #حسینیه_شهادت #زبدةالاشعار
نظر دهید