زبانحال قهرمان کربلا در بالین حضرت امام حسین (ع )
.
✍️ #زبدةالاشعار ✍️
.
🆔: @nohe_torki
.
سید حمید موسوی میانجی
.
آتام اوغلی سنون جسم شریفون زیب میداندور
منیمده لاله تک قلبیم مصیبتدن دولی قاندور
.
سنون سینون مشبکدور مثال لانه ی زنبور
منیمده قلب سوزانیم بسان شانه شان شاندور
.
کسنده باشیوی بیلمردی آیا شمر بی پروا
آتان میر ولایتدی آنان خاتون رضواندور
.
دونوبدی چشمه ساره یاره لر مسکور سینونده
الیم زلفیم ئوزوم بو قرمزی قانیله الواندور
.
وروبلا قلبیوه بیر اوخ اولوبدی کتفدن خارج
ئولونجه ناله ی جانکاهیمه بو یاره عنواندور
.
شهیده غسل وئرمزله وئریبله قانیله غسلون
حنوطون قرمزی تربت دلیل عشق جاناندور
.
قتیلی ایلمزلر مثله قانون شریعتده
ولی بو بی حیالر منکر احکام سبحاندور
.
کتاب عشقدی نعشون اولوب بیدادله اوراق
داغیلمیش عرصه گاهه گوئیا بی جلد قرآندور
.
نه باشون نه الون نه بارماقون وار تنده نه جامه
یارالی پیکرون عریان دوشوب خاکیله یکساندور
.
دگوبدی بیر بیره آت دیرناقیندا نقشه ی جسمون
جوشور قان یاره لردن حالیوه هر یاره گریاندور
.
چاتوبدی باش باشا سنبل کیمی سینونده کی اوخلار
سولان دسته گله بنزیر صبا دگدوقجا لرزاندور
.
خدنگ و نیزه و شمشیر ائدوب اندامیوی گلشن
تبسم ایلوری یاره یارالار جمله خنداندور
.
سویوبلار جسمیوی عریان قالوبسان گون قباقینده
جهاندا هانسی مولانین بئله اجلالی تالاندور
.
ائله تاراج ائدوبدی رختیوی بو لشگر یاغی
وجود زخمدارون گون کیمی قان ایچره عریاندور
.
طلاطم ایلوری دریای غمده کشتی صبریم
سنون تک ناخدا قان قلزمینده غرق طوفاندور
.
اوزون فلک نجات ماسواسن لیک قان ایچره
دوشوب گردابه نعشون لنگری شمشیر و پیکاندور
.
ئولونجه آغلاسام عباسیمین ایثارینه آزدی
سووا تشنه گئدوب تشنه قیتماق عشقه میزاندور
.
خیامه خجلتیندن گلمدی شرمنده جان وئردی
جفایه سیر ائله سقا اوزی سو اوسته عطشاندور
.
علی اکبرین صد پاره جسمی بند بند اولدی
رسول اکرمه بنزر وجودی قانه غلطاندور
.
حرملر واعلیا ناله سیندن اولموری آرام
مذمت یوخ آناسی لیلیه مجنون دوراندور
.
سریه قاسمه ماتم قوروب هی اوخشیوب آغلور
دوتوب اود قلب بریانی شرار آهه سوزاندور
.
ربابین گوزیاشی نهر فراتی شرمسار ائتمیش
دیور الله قبول ایله بالام شش ماهه قرباندور
.
تاپوبدی کثرت غمدن بنای صبریم اضمحلال
منیم تک هانسی قارداشسیز جهاندا خانه ویراندور
.
محبت عالمینده اوزموشم ال ائل قبیلمدن
بو سایسیز دشمن ایچره مونسیم فریاد و افعاندور
.
غریبم بیر کسیم یوخدی گئدوب قارداشلاریم الدن
پوزولموش خاطریم آشفته زلفیم تک پریشاندور
.
بولوط تک چولقویوبدی قلبیمی غملر فراقونده
ائله اشکیم آخور گوزدن بسان ابر نیساندور
.
چتین عمریم بویی سندن صورا بیرده ئوزوم گولسون
ئولونجه زینبه دنیا غمونده بیت الاحزاندور
.
خوشام اوز مرگیمه سیر اولموشام غملی حیاتیمدن
نفس تنگه دوشوب دلده ائله بیل عمره پایاندور
.
دور ایله بدرقه محنت قطاری یولانور شامه
باشون بو در به در اطفاله یوللاردا نگهباندور
.
همیشه «موسوی» گوزدن عذاره اشکیوی باغلا
حسینه آغلاماق هر بی دوا درد اولسا درماندور
.
.
#حسینیه_شهادت
#آتام_اوغلی_سنون_جسم_شریفون_زیب_میداندور
#ترکی
.
✍️ #زبدةالاشعار ✍️
.
🆔: @nohe_torki
نظر دهید