آتدان یره عباس هنرور یخلاندا #عباسیه_تبسمی

شهادت حضرت ابوالفضل (ع)
..
..
حاج ناصر تبسّمی اردبیلی
..
..
آتدان یره عباس هنرور یخلاندا
گوردی آناسی فاطمه سسلر یخلاندا
..
..
سنده منه عبّاس حسین تک بیر اوغولسان
سیلدیم گوزوی باخ منه ای ماه درخشان
گلدیم سنی الآن آپارام جنّته مهمان
آخر بو غم و محنته زهرا دؤزه بیلمز
اَلسیز بالاسیندان آناسی اَل اوزه بیلمز
..
..
ماه حرمیدون سنه قیزلار سیخیلاردی
هر ضربوه اوچ دورت نفر اعدا یخیلاردی
تکبیر سسوندن صف لشکر قیریلاردی
افسوس او شجاعتلی اوزون قوللارا اوغلوم
قوللاردان آخان قان توکولن یوللارا اوغلوم
..
..
بلبل گلون عطریله تاپار گلشن رازی
بلمز ندی زهرا بالاسی عشق مجازی
قلبینده حسین سسلسه عباس حجازی
چون پرده دری اولسا ایکی روح آراسیندا
طوفانیله اُلفت یارانار نوح آراسیندا
..
..
آلدی سسین عبّاسین حسین خیمه سراده
درک ایلدی قارداشی دوشوب بحر بلاده
مرکوبینی تئز ایستدی اول غملو مناده
زینب دیدی قارداش نیه رنگون سارالوبدی
سرلشکروی اولمیا غم تنگه سالوبدی
..
..
حاصل آتا میندی آلیجی قوش کیمی گلدی
گوردی او بیابان دولوسی اهل جدلدی
گویا کی علی حمله ائدیب جنگ جملدی
سس ویر دئدی قارداش ئوزوم امدادوه گلدیم
قربانون اولوم غم یمه فریادوه گلدیم
..
..
عبّاسی تاپوب آه چکوب اؤپدی یوزیندن
گوردی یوزه جاریدی اوره ک قانی گوزیندن
سقّای حرم لیک گئدیب چوخدان اؤزیندن
حتی ایکی قوللاری بدندن اوزولوبدی
بیر گوزده آخیب انجم بختی سوزولوبدی
..
..
آلدی دیزی اوسته باشینی نازینی چکدی
قارداش دیدی قارداشه یامان گونده اؤرکدی
بو یاره دی جسمونده کی یا گولدی چیچکدی
عبّاس گوز آچدی دیدی ای روح روانیم
گئت قیزلاری آرام ایله قربان سنه جانیم
..
..
سن میر اُمم رهبر کلّیّه بشر سن
هم روح نبی هم دل زهرایه ثمرسن
صدقیله چاغورسا سنی کیم داده گلرسن
گوردون دوشوب عبّاسوی قولسوز هایا گلدون
قربان سنه قارداشوی سالدون سایا گلدون
..
..
ترک ایلدی قارداشینی یوز قویدی خیامه
بِئل گلمدی ضعف حالتی اَل ویردی امامه
دوندی دالی بیرده باخا اول ماه تمامه
ماهین شفق سرخ سالوب گوردی مُحاقه
دشمن ایکی قارداشی دچار ایتدی فراقه
..
..
تلّ اوسته گلوب چیخدی کی سلطان دو عالم
سسلندی باجی گل عموسیز قالدی رقیّم
گلمور ایاقیم منله گیدک خیمیه باهم
عبّاس منی خیمیه تنها یولا سالدی
سالدی یولا حسرتله دالیمجا گوزی قالدی
..
..
نه حالیده گوردوم باجی یوخ شرحنه طاقت
آنجاق بو قدر بیل یوخیدی عضو سلامت
یاره یاریا اوخ اوخا سویلردی حکایت
سیماسی تانینمازدی ایله قان بوروموشدی
سعی ایلدی منلن گینه اول حالدا اوپوشدی
..
..
صد برگ گُله نعشینی اوخشاتدیم اولده
هر برگینه مین صدمه یتشموشدی جدلده
فوّاره کیمین قان سپلوردی کسیک الده
اوخ یاره سینی ایتمگه مقیاس دگلدی
شکلی پوزولوب گوردیگون عبّاس دگلدی
..
..
میداندا ئوزون گورمسون عبّاسیمی زینب
هر قدر دانشسام گینه گلمز اله مطلب
گل پیکری قرآن کیمی اولموشدی مُذهّب
هر عضوده هر ضربه نون آثاری واریدی
کالای حقون گورملی بازاری واریدی
..
..
اعضاء و جوارح یارادور باشدان ایاقه
قان پرده سی گول صورتی سالمشدی محاقه
قویدوم دوداقیم حسرتلن قانلو دوداقه
حسرتله منه گوز یاشی باخدیقجا آخاردی
جان اوسته گهی خیمیه طفلانه باخاردی
..
..
تحسین ایلدیم فخریله چوخ اُم بنینی
احیا ایلدی قانیله اوغلانلاری دینی
تأیید ایلیوب جمله سی قرآن مبینی
ایثار و مواساتینه عبّاسون اوجالدیم
هر یاریه باخدیقجا وجودینده قوجالدیم
..
..
بیر تیر سو مشکین نه دیوم پاره لمشدی
سو آخدیقجا گوز یاشی عبّاس المیشدی
خجلتدن ئوزون قرمزی قانه بلمیشدی
نهر اوسته دیدیم قالسا وجودون سنه یانّام
آندیردی آپارما منی قیزلاردان اوتانّام
..
..
امکانی اولان قدرده ایلوردی اشاره
مندن صود امر اصغروه اولمادی چاره
دشمن قلم ایتدی قولومی مشکمی پاره
مندن دیدی ویر قیزلارا بو نوعی سفارش
قولیندا صدیقیدی فلک ایتمدی سازش
..
..
بل باغلاماز عاقل اولا کیم دار فنایه
خوش حالنه اول کسیکه ایدوب توشه بقایه
ای محی الانفاس نظر ایله «صفایه»
قسمت ایله عبّاس حرمین مفتخر اولسون
اوز قبرینون اوستونده اونا نوحه گر اولسون
..
..
#عباسیه #تبسمی #عباسیه_شهادت #تکری #زبدةالاشعار