در مذمت آب فرات
..
..
مرحوم حاج مجید امینی تبریزی
..
..
ای فراتین سویی دریا کیمی آخدون چوله سن
سالدون آل اللهی اوّلدن ایشین مشکله سن
..
..
سنده اولسیدی اگر ذرّه مروّت اثری
اود دوتوب یانمازیدى آل علینون جگری
ایتمدون گل کیمی سیراب ندن تشنه لری
آل طاهائیله سالدون آرازا فاصله سن
..
..
سندن ایچسیدی بیر آز اصغر شش ماهه اگر
تا ابد غبطه ایدردی سنه آب کوثر
سن باش آلدون چوله آخدون او قالوب تشنه جگر
اود سالوب قلبنه یاندیردون او طفلی ایله سن
..
..
آل پیغمبرین الماء سسی عرشه دایانوب
خیمهنی الده سو جامی بالا قیزلار دولانوب
سرّی بُلمم ندی نه شرم ایلیوب نه اوتانوب
باخدی قیزلار سنه آخدون ولی چولدن چوله سن
..
..
ایلیوب فاطمیه حق أوزی مهریه سنتی
ایلدون ترک ره رسم وفانی علنی
سارالوب سولدی سوسوزدان ولی زهرا چمنی
گو مدون رحمی روانه گُله نه بلبله سن
..
..
سنه او ایستی هواده چوخودی اوندا نیاز
دستماز آلماقا سو تاپمادی سلطان حجاز
سالمادون خیمه گهِ عشقه طرف رخنه بیر آز
یتمدون دسترس عترت خونین دله سن
..
..
بیر حسینی که اولوب علّت ایجاد وجود
سئچوب اوز بنده لریندن اؤزونه حس ودود
اوچ گون عطشان قویوب ایتدون أورگین خون آلود
زجر بو بارده ویردون او شه عادله سن
..
..
ایتمیوب خلق خدا صفحۀ دنیانی سوسوز
سو ویروب رسمدى قویمازلا مسلمانی سوسوز
کوفیان قویدولا افسوس اولا مهمانی سوسوز
قسمت اولدون ندن آیا سپه باطله سن
..
..
دلدن أطفال حسین سو سوزینی اآتمازدی
سن آخاردون چوله قیزلارین الی چاتمازدی
سندن اوتری علی اصغر گجه لر یاتمازدی
قویمادون نخل وجودی یتیشه حاصله سن
..
..
کوفیان ایتدی حرام اصغر عطشانه سنی
ایچدی اوز کامیجه أُول لشکر بیگانه سنی
یوخسا بو شرط وفادور دُنه سن قانه سنی
یاندی مقتولیلر آخدون طرف قاتله سن
..
..
سدّ راه اولدی اگر چه سنه ظلمیله عدو
قویمادون حیف اؤزوندن قالا بیر نام نکو
هانسی قیز ایستدی بیر کلمه دانشسون دیدی سو
اولارون دردی ندور اولمادی امکان بوله سن
..
..
سندن ایچسیدی حسین کوثره فخر ایلردون
قسمت اولسیدون علی اصغره فخر ایلردون
تا جهان واریدی عالملره فخر ایلردون
بولمدون قیمتیوی ایله اوزوندن گله سن
..
..
دشمنه سنده او گون خدمت شایان ایلدون
چوللره آخدون حسینون اورگین قان ایلدون
هاردا بیر جام سویا اصغری مهمان ایلدون
رخوت ایتدون نیه بو خدمت ناقابله سن
..
..
یاحسین شعر «امینی» سیزه ناقابلدور
او گوزل مدفنیوی گورماقا چوخ مایلدور
بیر امیدیله گلوب درگهیوه سائلدور
الى بوش سالما یولا لطف ایله بو سائله سن
..
..
#فرات #مجید_امینی #ترکی #زبدةالاشعار
نظر دهید