حالات حضرت علی اکبر (ع)
زبانحال حضرت لیلا(س) در کوچ از کربلا
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
آز قالور قافله میز شامه روان اولسون على
چوللره دوشسون آنون اشک فشان اولسون على
.
.
یار و اعوانینه سعداوغلی ایدوب حکم صدور
شهدانون باشینی کسدیره منظوری بودور
ویردیرا باشلاروزی نیزیه اول مرد شرور
قاتلون گلمیوب آچ گوزلریوی تیز گوروشک
نیزیه چخسا باشون ممکنوم اولماز اوپوشک
.
.
خیمیه گتدی گچن گون سنی شاه شهدا
پوشش اولموشدی گوزل پیکروه قانلی عبا
سویولوبسان بدنونده نه عبا وار نه قبا
کوفه جلادلری جسموی نه حاله سالوب
بنذیوبسن آتووا کوینگون اللرده قالوب
.
.
آز زمان من سنه صحرای بلاده قوناقام
غمی چوخ غصه سی قلبنده زیاده قوناقام
زحمتیم اولمیاجاقدور سنه ساده قوناقام
گلمشم دیدیوه ای یوسف گل پیرهنیم
تحفه فکری ایله سون گوز یاشی تحفمدی منیم
.
.
سن کرملی آتانین اوغلوسان ای روح سلیم
مثلوی بیرده چتین خلق ایده خلاق علیم
قوناقام حرمت ایله چوخدا منیم بوشدی الیم
دیمورم چوخ گیجه گهواریوه لایلای دیمشم
توز قونان وقته قرا زلفوه ایوای دیمشم
.
.
آنیا خوشدی نقدری اوغولون اولسا نازی
نیلیور نازی آنون، ایتدی فلک قاره یازی
زندگیمون چوخی گیتمش بیلورم قالمش آزی
فخر ایدیدیم سنه باخدوقجا گرک ائللره من
قوجا وقتیمده اوغولسوز دوشورم چوللره من
.
.
طالعیندن آنووی قویمادی دشمن یاریا
یانورام سینوون اوسته باخورام هر یاریا
نه روا من داریان زلفوی خنجر داریا
دگه شمشیر یته صدمه هلالی قاشووا
یاشیل عمامه گیده پرده چکه قان باشووا
.
.
خواب ایدن وقتیده سن ای ثمر قلب امام
اطاقون پرده سینی سالدی آنون لیلی مدام
گون قباقینده یاتوبسان بالا گلدیم اویادام
سسلورم قویمور آیلماقه قیامت یوخوسی
خواب ناز ایله نه شیریندی شهادت یوخوسی
.
.
گلشن عمریمه اسدیردیله ظلمون بادینی
قاتلون قوشدی اوغولسوزلارا لیلا آدینی
ایچمسه کیم نه بیلور بو آجی زهرون دادینی
وای منیم بختیمه دنیاده نه بهر اولدی منه
عمریمون شربتی بوندان صورا زهر اولدی منه
.
.
.
آنالار ایچره اوغول رسمیدی وار بو جریان
ایکی یول هر آنا ئوز اوغلونی اوخشار اوجادان
بیری داماد اولان وقتیده هر تازه جوان
باجیسی عمه سی ترتیبه سالالار طویونی
ایلکه یاخدی حناسین آنا اوخشار بویونی
.
.
بیرده ئولسه آنانون تازه جوان اوغلی اگر
خویش و اقوامی گلوب شمعلرین قاره بزر
ایلکه غسلی تمام اولدی کفن ایلدیلر
باغلیاندا کفنین حاضر ایدہ للر آناسین
هامی اوخشار آنا آخرده دیر اوخشاماسین
.
.
او که طوى صحنه سیدور گورمدون ای ماہ لقا
نه گیوب جامۀ شادی نه اله یاخدون حنا
آنالار تک بویووی اوخشامادیم منده بالا
ماتمونده ویرولار قمچی بو یورقون نفسه
قورخورام باشوی منقذ دیزیمون اوسته کسه
.
.
#اکبریه_انور_اردبیلی
#اکبریه_شهادت #کوچ_کربلا
#قیام_زینب
#آز_قالور_قافله_میز_شامه_روان_اولسون_على
#ترکی
.
✍️ #زبدةالاشعار ✍️
.
🆔: @nohe_torki
نظر دهید