آفاق اولوبدی مهد فتن یابن العسکری #مجلس_یزید_انور_اردبیلی

خطاب به حضرت امام زمان (عج)
حالات #مجلس_یزید
.
.
.
مرحوم انور اردبیلی
.
.
آفاق اولوبدی مهد فتن یابن العسکری
دین چهره سین دوتوبدی محن یابن العسکری
.
غول ضلالت ایلیوب انسانلاری اسیر
فسق و فساد اولوبدی علن یابن العسکری
.
دینون نظامی آز قالوری نظمیدن دوشه
آگاهسن عوالمه سن یابن العسکری
.
محجوبه لر چخوبدی حریم حجابدن
یوخ سلطۀ حجابه چکن یابن العسکری
.
گوینده لر نظرده دوتور ئوز مریدینی
آزدور رضای حقی دین یابن العسکری
.
طفلان عصر فلسفه دن صحبت ایلیور
خاموش اولوبدی پیر سخن یابن العسکری
.
یا للعجب سالوب سنی تأخیره روزگار
تنگه دوشوبدی اهل زمن یابن العسکری
.
ای عدل مشتهر گلوب آچ عدل مکتبین
سنسن جهاندا عدل ائلین یابن العسکری
.
تکبیروون سسی اوجالا کاش مکه دن
چوخدور وصالوه تله سن یابن العسکری
.
ای رازدار معنی قرآن هایانداسان
بُلموک سنه هایاندی وطن یابن العسکری
.
گل انتقام پرچمین آچ یرده قالماسون
خون حسین و خون حسن یابن العسکری
.
طعنه ورولا جدوه ماتم دوتانلارا
طغیان ائدوب شماتت ائدن یابن العسکری
.
امّا بیز ئوز عقیده میزون پایبندیوک
چون عاشقوزدی روح و بدن یابن العسکری
.
وار عشقیمیز غمی چوخ اولان زینب عموه
سنده اونی چوخ ایستیوسن یابن العسکری
.
دژخیم ظلمی یخدی بی بون شهر شامیده
باشدا قرا قولوندا رَسَن یابن العسکری
.
.
.
بزم یزیده چکدی سوزی مطلع کلام
سندن توجه ایستورم ای منتقم امام
.
.
.
ائتدی جلوس کرسی گوهر نشانیده
نخوت بروز ائدوبدی او فرعون ثانیده
.
تالاره سالدی گوشۀ چشمیله بیر نظر
گوردی ئوزون اریکۀ زور و توانیده
.
دولموشدی باده نون اثری مغز و جسمینه
گرمیتی واریدی رگ و استخوانیده
.
میخواریدن حیانی آلوب مِی جسور ائدر
امّ الفسادون اهلی فساد ایلر آنیده
.
درک ائتدی مجلسینده اونا یوخدی بیر حریف
فکر ایلدی مقام ائلیوب کهکشانیده
.
فکر ائتدی جنگ بدرون آلوب انتقامینی
فکر ائتدی کامیاب اولوبدور زمانیده
.
اول تبسم ائتدی صورا چالدی قهقهه
شاد اولمیوم دئدی نیه من زندگانیده
.
بیر مدّعی حسینیدی جاه و جلالیمه
مغلوب ائدوب مرادیمه یتدوم جهانیده
.
لایق بیلوردی مندن همیشه ئوزون حسین
تقوا دیوردی یوخدی سیزون خاندانیده
.
ویردوم مقام وعده سی منله کِچنمدی
اقبالیمه حسد ائلدی هر مکانیده
.
دوشدی هوای سلطنته گلدی کوفیه
ملک وطنده قالمادی امن و امانیده
.
کرب و بلاده ایلدی بختیم کمک منه
غرق اولدی آز سپاهی ئوزی لخته قانیده
.
خاکستر ائتمیشم حَشَم و خیمه گاهینی
اهلین مقیّد ایلمیشم ریسمانیده
.
طشت طلاده تختیمون اوسته کسوک باشی
کیم من کیمی موفق اولوب آرمانیده
.
بیر آرزو واریم اونادا ایلرم عمل
همت اگر تاپولسا بو گون خیزرانیده
.
.
.
ای خیزران نه خوشدی حسینون دوداقلاری
اشن ظشتده قوجاقلا سئوندور قوناقلاری
.
.
.
آخر یزید عمل ائلدی مدعاسینه
دستینده چوبدست اوجالوب مِی هواسینه
.
طشته دینمورم نچه یول اَندی خیزران
قان قطره سی اوجالدی او طشتون فضاسینه
.
راهب یووان دوداقدان آخوب قطره قطره قان
زینت وئروبدی صورت قرآن نماسینه
.
فکر ایلمه دوداقلارینا دگدی ضربه تک
پرده چکم محال یزیدون جفاسینه
.
گه لبلره گهی گوزونه دگدی خیزران
گاهی توخاندی دیشلرینه گه محاسینه
.
پوزدی او منظره اسرانون ردیفینی
یوز وئردی غفلتاً هیجان آل یاسینه
.
هر کس ائله دایاندیقی یرده سزیلدادی
جان سسلنوب سرشکینی توکدی لقاسینه
.
اما رباب یومدی گوزون طشته باخمادی
باخسیدی دوزمزیدی او باشون بلاسینه
.
قزلار گهی کسوک باشا گه باخدی زینبه
باخماق اشاره ئیدی یزیدون اداسینه
.
دیل یوخدی بیزده سن نیه دیلنموسن بی بی
دیلن دیلون فداسی دانش حق رضاسینه
.
قویسون یره یزیده بویور خیزراننی
محکم جواب ویر دئدیگی افتراسینه
.
یا وئر اجازه تخته طرف حمله ایلیک
لرزه سالاق بو قصر جفانون بناسینه
.
زهرا قیزی گوروب اسرانی سراسمه
حتّی باخور رقیّه ده تزتز آتاسینه
.
تَرپنمیون هامی بیر ایپه باغلانوب دئدی
سجاد باغلانوب باشا من انتهاسینه
.
ساکت دایانماسوز خفه لر ایپ کیچیکلری
صبر ایلیون یزید چاتار ئوز جفاسینه
.
.
.
قیلدی بیان یزیده او گنجینۀ وقار
ای حاکم سیه دل و جبار روزگار
.
.
.
چکدون بیزی ستمله بو بزم عداوته
ئوز زوروی نشان وئروسن بو جماعته
.
بازیچۀ زمانه دی تختون ریاستون
مغرورسن نیه متزلزل ریاسته
.
یتمز باشا بو سلطنتون بی دوامدور
چون متکی دی پایه سی ظلم و جنایته
.
بیز بزم مِی ده اهل عیالون حریمده
کیم درج ائدوب بو حکمی کتاب عدالته
.
فکر ائلمه حسینیم ئولوب فاتح اولموسان
بو فتح لر سنی یتورنمز سعادته
.
یلّتمه چوخ دماغوی اویناتما چگنوی
یاوه سرالوق ائتمه دیل آچما شماتته
.
معصومدور حسین ، ائلمه متهم یزید
سن کفره مشتری سن حسینیم دیانته
.
سن مجلس خماریله مستون عزیزی سن
امّا حسین عزیزیدی بزم شهادته
.
سن زندگینی مرز جنایتده تاپموسان
لیکن حسین امیندی مرز امانته
.
جدیم نه سوز دئمیشدی حسین ده اونی دئدی
سن ملتی حریص ائلدون قتل و غارته
.
یر گوی نوا ائدور یره قوی خیزرانوی
قوی طشت زرده گئتسون حسین استراحته
.
قرآنه آشنا دوداقین توکمه قاننی
تاب ایلمز جراحتون اوستن جراحته
.
حقه ثنا او لبلر ائدوب اللی یدی ایل
دائم علاقه سی چوخودی ذکر و طاعته
.
حتی باشندا وئردی نماز اوسته قاتله
مشغولیدی باشی کسیلنده عبادته
.
قرآن اوخوردی طشتده افسوس قویمادون
قرآنه ضد اولان بلی دوزمز تلاوته
.
.
.
موسای کربلادی چخوب گشته قارداشیم
یحیای عصردور سخلوب طشته قارداشیم
.
.
.
تقدیس ائدوبدی زینب حسینون قیامینی
تشریح ائدوردی خلقه مراد و مرامینی
.
گوردی حسین آچوبدی گوزون طشتدن باخور
قیلدی عوض او بزمده طرز کلامینی
.
ای مکّه و منا و صفا عزتی حسین
وی ساخلیان حریم خدا احترامینی
.
ای جدیم احمدون آنامون نور دیده سی
وی فرشیدن باخاندا گورن عرش بامینی
.
من عاشقم سنه آنام اوغلی ئوز عشقیمون
آهیمدی پشتوانه سی زلفمدی ضامنی
.
چاتمور الیم دوداقلاروون قاننی سیلم
عطرون معطر ایلیه زینب مشامینی
.
محملده یوخدی کوفه کیمی باشیمی یارام
شام اهلینه بلندیرم عشقون مقامینی
.
قانه بویاندیرام بو پریشان هوروکلری
برهم ائدم بو مجلس ظلمون نظامینی
.
واردور باشمدا کی بو قرا معجرون گوجی
قانلی دوداقوون آلاجاق انتقامینی
.
مین نوعی اود منی بوریوب هانسنا یانوم
هانسی اودون حسین گتوروم من دوامینی
.
سجادوی یزید ایاق اوسته ساخلیوب
چوخ محترم دوتوب ولی زنگی غلامینی
.
ساقیلری صدا ائلیور القدح دیور
نرد اوینیور چکور باشا مشروب جامینی
.
بو صحنه چوخ چتیندی منه قتلگاهیدن
می مجلسینده کیم گوروب عصرون امامینی
.
یا للعجب بو گون اوزانوب گونده باتمیور
قورمور گیجه نه علته ظلمت خیامینی
.
یورقونلارون گیجه گوره سن هاردادور یری
طبخ ایلیوبدی کیم اسرانون طعامینی
.
.
.
قول باغلیلار هاچان اولور آزاد بندیدن
آهولرون هاچان چخاجاقدور کمندیدن
.
.
.
گویا جواب گلدی او رأس خبیریدن
زینب شکایت ایلمه فاسق امیردن
.
یخدون یزیدی سن آیلاندان صورا بولر
آلدون خوش انتقام او مرد شریردن
.
محکم سوزون توخاندی اونا محکم اوخ کیمی
محکم سوزون اذیّتی آرتوقدی تیردن
.
سن شیر لم یزل قزیسان شیر سن باجی
روباهلر شکست تاپار عالمده شیردن
.
نطقون چوخ آتشینیدی یاندیردی دشمنی
چون سوزلرون چخوردی یانقلی ضمیردن
.
تاریخده گورن دیه جک گورمینلره
باخ بیر سوزه قالوب قولی باغلی اسیردن
.
یاخشی دئدون اونا دگلوک خارجی یزید
پرده عجب گوتوردون او راز کبیردن
.
آز بیر زماندا دُؤر زمان پیر ائدوب سنی
نیلک گلایه ایلمه دنیای پیردن
.
ویرانه ده باجی گئجه الله قوناقی سوز
یوخدور اثر او یرده لحاف و حریردن
.
بیر خشت پاره دور او ائوین ناز بالشی
بی سقف اطاقدور دوشنوبدور حصیردن
.
یورقوندی قزلاریم بو گیجه ایستمز طعام
یورقون همیشه تز یاتار عالمده سیردن
.
توردان چخوب تورا دوشه جکر عندلیب لر
غم ال چکن دگول بو بیر عده صغیردن
.
خوشدور رقیّه مه سینوی بستر ایلسون
حق دستگیریدی ئوزی هر دستگیریدن
.
آخر وداعیده دئمیشم ایندیده دیم
ایله مواظبت او شیرین دیل سفیردن
.
«انور» سنه همیشه حسین ایلیوب کرم
شاهلار محال لطفنی کسسون فقیردن
.
.
#مهدیه
#آفاق_اولوبدی_مهد_فتن_یابن_العسکری
#انور_اردبیلی
#یادگار_انور #مهدیه_انور_اردبیلی
#ترکی
#زبدةالاشعار