زبدةالاشعار

آفت جان عاشقه فکر ایتمه ساغردن گلور #حسینیه_سعدی_زمان

کشاکش حضرت زینب (س) با شمر ملعون
.
✍️ زبدة الاشعار ✍️

?: @nohe_torki
.
مرحوم حسینی سعدی زمان
.
آفت جان عاشقه فکر ایتمه ساغردن گلور
هر نه گَلسه ساقیان ماه منظردن گلور
.
نصف شب بیدار اولا سرمست اولان نوشابه دن
مست ساقی نعره سی گر گلسه محشردن گلور
.
عقلیدن اوصاف عشقی ایلدیم پرسش دیدی
حُسندور سر منشائی، حُسن آدلی مظهردن گلور
.
مرکز قان دلدی، اشکین مرکزی گوز کاسه سی
عاشقین قانی ولیکن دیدۀ تردن گلور
.
روح سلطان بدندور، حُسن فرماندار عشق
لشکر آشوب و غم جسم آدلی کشوردن گلور
.
عشق نیروسی هامی نیرویه غالبدور ولی
عجز ایدر حُسنی گورن ساعت برابردن گلور
.
عشقیله صبرین مثالی آتشیله پنبه دور
پنبیه فکر ایت نلر سوزنده اخگردن گلور
.
عاشق صادق آلار عشق عالمینده امتیاز
آدی تقریریله مسجدلرده منبردن گلور
.
ماسوانی ترک ایدر، حیثیّتیندن اَل چکر
گه سسی تحت ثَری، گه چرخ اخضردن گلور
.
طالب دیدار یاره باش ندور، پیکر ندور
قانی دریا تک چوله صد پاره پیکردن گلور
.
گَلمیوب گَلمز حسینون مثلی عاشق عالمه
مرحبا بو عشقه ذات پاک داوردن گلور
.
ماسواللهدَن گیچوب عشق عالمینده شوقیله
اوخ، قلج، خنجر اونا شیرین شکّردن گلور
.
باش یارالی، یوز یارالی، آغزی قانیله دولی
لخته لخته قان یوزه منشقّ اولان سردن گلور
.
حلقیده نیزه یاراسی، سجده گهدی داش یری
اوخ سوکوب قلبین، جگر قانی نچه یردن گلور
.
غشّ ایدوب خنجرلر آتدا، مصرعین قان دولدوروب
گاه گاه آهسته سس منحور حنجردن گلور
.
ای جماعت قلبیم اودلاندی عطشدن، رحم ایدون
گورموسوز هر بیر نفس چون دود مجرمدن گلور
.
وورمیون جان اوستیم، یوخدور سسیمه سس ویرن
گرچه سس معناده عرش حیّ اکبردن گلور
.
باشیم اوستونده دوروب جدّیم پیمبر باش آچوق
وای اوغول وای ناله سی ساقیّ کوثردن گلور
.
ساچلاری الده آنام زهرا اوغول وای سسلنور
جور امّتدن فغان جدّیم پیمبردن گلور
.
نه سسیمه سس ویرور یالقوز علمداریم منیم
نه جواب استغاثه اوغلوم اکبردن گلور
.
اوخ اوخ اوستن وورمیون، چوخ داش داش اوستن توکمیون
قلبیمه سوزش دمادم تیغ و خنجردن گلور
.
رحم یوخ سیزده، ایشیتمیرسوز جماعت، گورموسوز
خیمه گاهیمده نه سسلر آل حیدردن گلور
.
قوی حسینی قان ایچینده عشوه حالینده قالا
گور نه نصرت زینب آلام پروردن گلور
.
خیمه لردن چخدی باشدا اللری زهرا قیزی
آری آری، بیله قیز زهرای اطهردن گلور
.
باشی اوسته ایستدی گَلسون یارالی قارداشین
گوردی چوخ چوخ های و هو بیر یرده لشکردن گلور
.
ایلبوب لشکر احاطه دورت طرفدن بیر یری
های و هوی و اُقتُلو اول قوم کافردن گلور
.
دسته دسته اوخ ووران، خنجر ووران ایلور هجوم
شرم سیز فرقه ایدولّر هر نه اللردن گلور
.
گوگده اوخ، نیزه، قلج، داش بیر بیره منضمّ اولوب
گور نه چاره بیر نفر مظلومه خواهردن گلور
.
سعد وقّاص اوغلی کبریله دوزوب ایلور نظر
قتل فرمانی حسینون اول ستمگردن گلور
.
عصمت کبری قیزی اللر باشیندا سسلنوب
ای جفاجو، بو جفا گور هانسی اَبتردن گلور؟
.
سن باخورسان اُلدورور اعدا منیم قارداشیمی
گورموسن فریادیله شیون بو مضطردن گلور
.
اولدی شرمنده باشین سالدی اَشاقه، دینمَدی
نخوّت آری حبّ جاه و سیمیله زردن گلور
.
دخت زهرا اگرچه اولدی ناامید اول شومیدن
باخمادی امّا قلج اوخ نیزه هر یردن گلور
.
شمع عشقه شوریله پروانه تک ووردی اوزین
عشقِ پروانه ظهوره اودلانان پردن گلور
.
بُلمورم نه نحویله یتدی او قانلی مقتله
چکدوقی زحمت اَله گرچه خبرلردن گلور
.
بو قَدَر وار جان ویرونجه قالدی جسمینده اثر
ظاهره اول ماوَقَع بو سرّ مُضمَردن گلور
.
حضرت سجّاده غسّاله گلوب عرض ایلدی
قلبیمه بیر سوز وقوع امر دیگردن گلور
.
کربلاده سیّدی عمَّنده دعوا ایلیوب
نه علامتدور گوزه بو جسم لاغردن گلور
.
گوزلری دولدی، بو سوز پوزدی امام ساجدی
سویلدی یاللعجب، گون سمت خاوردن گلور
.
گون چخِیدی کاش مغربدن، اولیدی رستخیز
یادیمه بیر ماجرا حشر مقدّردن گلور
.
قتلگاه کربلاده عمّه مه بو صدمه لر
یوز ویروب، فریاد او ساعتدن او کیفردن گلور
.
گوردی قارداش باشینی ایستور کسه شمر شریر
صوت اُسقُونی او یالقوز بی برادردن گلور
.
خنجر شمر شقی کَسمور او نازک خنجری
شاهِ دینه ضعف دل ضرب مکرّردن گلور
.
سسلدی ای بی مروّت ساخلا اَل، صبر ایت، دایان
گورموسن نه التجا بو قاره معجردن گلور
.
کسمه باشین، قویما باشسیز اهل بیتین، رحم ایله
بانگ واعَوثا خیمده بی پدرلردن گلور
.
گوردی قاتل اَل گوتورمور بینوا مقتولیدن
باخمادی صدمه وجوده اول بداختردن گلور
.
آه والهفا اَل آتدی دوتدی شمرین خنجرین
بو کمکلیق یالقوز اول روح مصوّردن گلور
.
بیر کشاکش اولدی نه شرحی فحول علمیدن
نه «حسینی» تک بو بی مقدار نوکردن گلور
.
بیر یره منجرّ اولوب سوز، اود دوتوب اَلده قلم
شعله «سعدیّ زمان» یازدوقجا دفتردن گلور
.

متن پیشنهادی:  ای عاشق نیکو سیرِ شبه پیمبر #اکبریه_دلکش_زنجانی

#قتلگاه
#حسینیه_شهادت
#سعدی_زمان
#آفت_جان_عاشقه_فکر_ایتمه_ساغردن_گلور
#لمعات_حسینی ص 276
#ترکی
.
✍️ #زبدةالاشعار ✍️

?: @nohe_torki

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی