آرزوی کربلا
.
.
مرحوم میر محمود آقا شوری تبریزی
.
.
آلتی گوشه قبری گوز هر لحظه هر آن آختارور
تشنه لب جانان یولوندا جان ویرن جان آختارور
.
.
یادیمه دوشدوقجا قبر پاک شاه کربلا
آز قالور غمدن منیم روحیم بدندن آیریلا
قورخورام گلسون اجل دلده ولی حسرت قالا
طایر روحیم اودور بیر صحن و ایوان آختارور
.
.
فاصله من آیریلان گوندن حسین جان چوخ اولور
یاده دوشدوقجا مزارون اشکیله گوزلر دولور
ایلین وقته مجسم قبریوی رنگیم سولور
سینوون اوسته گوزوم بیر سود امر جان آختارور
.
.
قسمتیم اولسا منیم بیرده اگر مُلک عراق
اولموشام شاه شهیده کربلاده من قوناق
گورسنور گورسم او ایوان طلا صحن و رواق
اول رواق ایچره گوزوم بیر پیر دربان آختارور
.
.
هر دقیقه هر زمان گوزده مُجَسَّمدور حرم
فکر ائدنده قلبیمی مملوّ ایدور اندوه و غم
لطف قیل یا سیّدی ایسته قوناق بیرده گلم
میزبانی گور نجه مولا بو مهمان آختارور
.
.
گورمینلر!کربلاده واردی گلزار حسین
پائینِ پایینده وار یتمیش بیر انصار حسین
ئولمرم گورسیدیم اولدوم بیرده زوار حسین
گوزلریم اول روضه ده شاه لب عطشان آختارور
.
.
من او دریا تک فراتی بیرده گورسیدیم آخور
قانه دونموش آغلیانلار قلبینی اودلور یاخور
بیله بولَّم تشنه قیزلار اول سووا الآن باخور
هم سکینه بیر ایچیم سو دیده گریان آختارور
.
.
اول سودان غسل ایلیوب گورسیدیم آلدیم دستماز
محضرونده دورموشام شوقیله ای شاه حجاز
تَحتِ قُبّونده سنون یا سیّدی قیلدیم نماز
گوزلریم اول وقتده بیر ابر نیسان آختارور
.
.
آرزوم واردور منیم بیر پیش رویونده دورام
بیر سلام عرض ایلیم گوز کاسه سینی دولدورام
یار و احبابیمله باهم مجلس ماتم قورام
نوکرون گورسونله که بیر قانه غلطان آختارور
.
.
اول مقدس یرده واردور بیر مرامیم من قالام
بیر ئوپوم شهزاده اکبر قبرینه من قول سالام
آغلیام اول نوجوانه بیر دویونجان کام آلام
تا گورم اوغلون نجه لیلای نالان آختارور
.
.
اول حسین قبرین گورنلر عرضیمی یاخشی قانار
بیر جماعت قبرین اطرافین آلوب آغلار یانار
بعضی سی بالای سرده غصّه سیندن اودلانار
بعضی سی پائین پاده نچّه قربان آختارار
.
.
بیر گوریدیم اکبری آختارماقا لیلا گلور
خیمه لردن ناله و فریاده و واویلا گلور
اللری باشدا پریشان زینب کبری گلور
قارداشینی گورماقا بیر قانلو میدان آختارور
.
.
شوقمندم بیرده قبر تشنه سردای گورم
حیدر کرّاره مظهر اول سپهداری گورم
واضحین عرض ایلیوم قولسوز علمداری گورم
ایندیده آیا گوروم سقّانی سلطان آختارور
.
.
عرض قیل « شوری » اَیا جَدّا نجه بس من دوزوم
لطف قیل یا سیدی سنده بولورسن وار گوزوم
تا نه قدری جاندا جان وار بوندان اوزگه یوخ سوزوم
آلتی گوشه قبری گوز هر لحظه هر آن آختارور
.
.
#کربلا #آرزوی_کربلا
#آلتی_گوشه_قبری_گوز_هر_لحظه_هر_آن_آختارور
#شوری_تبریزی
#ترکی
#زبدةالاشعار
نظر دهید