در مذمت مردم ریاکار
..
..
مرحوم منعم اردبیلی
..
..
آلنینی داغلیان اشخاصه گوروم عار اولسون
غضب قادر قهّاره گرفتار اولسون
..
داغلیور آلنینی برجسته لنور پینه ورور
حشریده داغلاناجاق آلنی خبردار اولسون
..
قویما مهرون یرى آلنوند جیبان تک اوجالا
آب گرمیله یو مهرون یرى هموار اولسون
..
الده تسبیحیله ذکر ایلمه خلقون گوزونه
قویما ، صد ، دانه نی ، آویزه زنّار اولسون
..
شرکدور زهد و ریا شرکیدن الله کچمز
راضی اولماز عقلا نوری دونوب نار اولسون
..
بیری رؤیاده دیدی مجلسی مرحومه
نجه کچدون دئ گورم واقف اسرار اولسون
..
دیدی چکدیم قاباغا هشتاد ایکی جلد کتاب
اولمادی بیر او قدر درّه خریدار اولسون
..
دیدیلر شاهون آدی هم اؤز آدون ثبت اولونوب
شهرتون مملکت و شهریده اشهار اولسون
..
بیر سیچان فضله سی مردار ایلیر خرواری
آیری زاد واردی گتیر داخل بازار اولسون
..
دیدی موسایه خدا گیت منه بیر تُحفه گتیر
اولماسون منده او تحفیکه گهربار اولسون
..
دیدی ربی او ندور یوخدی خزانونده سنون؟
هانسی بیر تحفه دی که لایق دربار اولسون
..
گلدی سس تحفه منه گوز یاشیدور نیمۀ شب
سوورم بنده که یالوارماغا ناچار اولسون
..
رشکدور ، اشکدی دنیاده نجات بشری
رشک و اشک ایستیور اشراریلر ابرار اولسون
..
رشک حسرتدى ندامتدی پوزار معصیتی
اشک ، آیینۀ قلب اوستونه ایثار اولسون
..
رشک و اشک آینۀ قلبه سالار نور افکن
گوره جک مقصدی یولار نقدر تار اولسون
..
نعمت اللهِ ولی آلتی یوز هشتاد ایلدور
نه دیوب گورسنور الان بیزه اخبار اولسون
..
بیر به بیر شرح ویرور سلسلۀ قاجاری
دالیسیجان اوجا قامت بیری سردار اولسون
..
نچه ایل سلطنت ایلر نه زمان خاتمه دور
نچه ایلدن صورا ناچاریدو فرّار اولسون
..
یازوب اوندان صورا کیم وارث اولار سلطنته
بوردا بیر سوز بویورور حیرت افکار اولسون
..
شاهی مردیله زن توأم اولور بیر یرده
سلطنت یوخدی داخی عصریده تکرار اولسون
..
قلبیچون ذکر و عبادت او قدر جلوه ویرر
بش یوز ایلدن صورانی کاشف اسرار اولسون
..
شمس تبریزی دیدی مولویه دریاده
منی ذکر ایله بو دریا سنه هموار اولسون
..
قویدی دریایه قدم شمسون آدین ذکر ایلدی
چوخ تعجّبدی بشر بحریده رهوار اواسون
..
گوردی شمسون أؤزی آهسته دییر یامولا
مولوی ذکرینی دوندردی سبکبار اولسون
..
تا علینون آدینی گتدی دیله باتدی سووا
آز قالوب هیکلنی مرگه گرفتار اولسون
..
دیدی آیا نه دیدون عرض ایلدی سن دیینی
اسم اعظم که آدی حیدر کرّار اولسون
..
دیدی سن شمسی چاغور شمس هدایتدی علی
شمس افلاکه نجه ذرّه ده مقدار اولسون
..
مولوی شخصاً اوزی علمیده بیر دریادور
بنده دور قطریه تاعقلینه معیار اولسون
..
سو اوزونده بشره سیر ویرن عرفاندور
عارفون قدرتی وار سیریده طیّار اولسون
..
عارفون قدرتی وار سرعت فکریله اوچا
مغزیدن کچدیکی افکاره خبردار اولسون
..
شمس تبریزی سو اوستنده گیدور سیر ایلیور
قورولوخدا یخیلان شخصی گوروم خوار اولسون
..
بیر نفر پیر کهن ساله نماز اورگتدوک
قوى دیدوک بلکه ئولن وقتیده بیدار اولسون
..
ایستدى قالخا دینموردى بحول الهی
دیدی عبّاس علمدار منه یار اولسون
..
بیر نفر پیر کهن سال اوزی نورانی کیشی
صحبت ایلوردی سوزی قابل گفتار اولسون
..
دیدی من کعبه ده اعمالی قوتاردیم باشا باش
حاجیلار ایستدیکه یثربه زوار اولسون
..
گیجه یاتدیم یوخودا عصرون امامین گوردوم
دیدی باطلدی سنون حجّیوى تکرار اولسون
..
یوخودان فوری اویاندیم دیدیم ایش قورتاردی
بیر ایلی قالمالیام مکّه ده اجبار اولسون
..
هامی گیتدی وطنه من تک و تنها قالدیم
هر نه وار ساتدیم او بیر ایلده که امرار اولسون
..
ایل دولاندی گینه اعمالی قوتاردی حاجیلار
بیر نفر اولمادی من بیکسه غم خوار اولسون
..
آغلادیم یاتدیم او آخر گیجه گوردوم یوخودا
گلدی حضرت منیچون مژدۀ دیدار اولسون
..
دیدی اعمالوی معناده قبول ایلدیلر
دور قیت شهریوه یولّار سنه هموار اولسون
..
آغلادیم عرض ایلدیم گیتمگه قادر دگولم
یوخ وسیلم قییدم سوز نجه إنکار اولسون
..
هر نییم واردی بو بیر ایلده ساتوب خرج ایلدیم
بیر زادیم یوخدی داخی رایج بازار اولسون
..
دیدی تاپشوردوم آپارسون حاجی الله ویردی
سنی اوز شهریوه قویماز سنه دشوار اولسون
..
دایانوب بیت خداده سنی الان گوزلور
شیعۀ آل علیدور اونا حق یار اولسون
..
ناپدید اولدی اویاندیم یوخودان شکر ایلدیم
گوزلریم ایستمیوردی گینه بیدار اولسون
..
باتدی آی صبح آچیلوب قرمزی رنگ اولدی هوا
ایستیوردی حاجیلار قافله سی بار اولسون
..
کاروان دوشدی یولا زنگ شتر سسلندی
الرّحیلون سسی اوج ایلدی اخطار اولسون
..
کاروان دوتدی بیابان یولى من کعبه یولون
تا گورم کیمدی منه قافله سالار اولسون
..
یتیشوب کعبیه گوردوم دایانوب منتظریم
دیدی سن سن او مسافر بویور اظهار اولسون
..
مخلصم عرض ایلدیم دوت دیدی دامانیمدن
گوزلرون یوم بدنون غیبیده سیّار اولسون
..
ال آتوب دامنینه چنگ توسّل وردیم
باغلادیم گوزلریمی مانع دیدار اولسون
..
دیدی آچ گوزلریوی باخ او سیزون کندوزدی
سرّیمی کشف ایلمه صحبت اغیار اولسون
..
قریه میز قریۀ سولات آدیم الله ویردی (1)
گیت خداحافظون الله سنیچون یار اولسون
..
..
(۱) سولا قریۀ نزدیک اردبيل است
..
..
..
#پندیات #منعم_اردبیلی #ترکی #زبدةالاشعار
نظر دهید