شب عاشورا
.
✍️ #زبدةالاشعار ✍️
.
🆔: @nohe_torki
.
مرحوم حسینی سعدی زمان
.
آلوب عمامه اله شاه لافتی بو گجه
الینده ساچلاری زهرا ایدر دعا بو گجه
.
بلا دیارینه حاضردی خمسة النّجباء
او دشته غبطه ایدر عرش کبریا بو گجه
.
گلوبدی بو گجه نی تک نوایه آل الله
دولوبدی داد و نوائیله نینوا بو گجه
.
سالوبدی عشق حسینی عراق دشتینه شور
مخدّرات حجازی ایدر نوا بو گجه
.
شکسته قلبیله زهرا قیزی ایدور ناله
سسینه سس ویروری خیرة النّسا بو گجه
.
مخدّرات بنی هاشم ایلوری شیون
گورولّه ماوقع صبحی برملا بو گجه
.
دیولّه بو گجه نین صبحی اولمیا ای کاش
حرمده راحت اولا آل مصطفی بو گجه
.
هنوز یوخدی حرم دوره سنده نامحرم
تالانمیوبدی ستمله حرم سرا بو گجه
.
آناسی زلف علی اکبره وورور شانه
منای عشقه تدارک ایدور فدا بو گجه
.
خطاب ایلیه لیلایه وار یری هاجر
فدا اولوم سنه ای معدن حیا بو گجه
.
من آگهم نه چکورسن بیر اوزگه سی بولمز
که وار صبا حکه خبرده نه مبتدا بو گجه
.
سنون که دوتمور الون قوی من ایلیوم زینت
اولوم سنون یروه اوغلوا آنا بو گجه
.
قیامتین گجه سی اولسا، بو گجه سایولور
قیامت عالمی ظاهردی جابجا بو گجه
.
بوش امجگه سالوری اصغری آناسی رباب
دیور بالام دوتوب اود یاندی ای خدا بو گجه
.
بالیق کیمی چابالور اصغریم الیم اوسته
کسوبله سو یولونی قوم اشقیا بو گجه
.
نه خیمه لرده سو وار نه منیم دوشومده سودیم
بالام یانور یانورام اود توکور هوا بو گجه
.
کفن بیچور بو گجه قاسمه غریب آناسی
هنوز قاندان اله یاخمیوب حنا بو گجه
.
بو گجه عزّتی وار هاشمیّه نسوانین
کشیکچی دور اولارا پور مرتضی بو گجه
.
حرم سراده یاتوب راحت عترت عصمت
حرم سرا قاباقندا اسور لوا بو گجه
.
صباح گجه حرمین پاسبانی شمر اولاجاق
ویروب خبر اوزی سلطان کربلا بو گجه
.
امان صباح گجه نین قانلو ماجراسیندن
دلیم یانار دله گلسه او ماجرا بو گجه
.
صباح گجه او قیامت که کربلاده قوپار
او محشره اولا بولمز یقین نما بو گجه
.
ایدوب اگرچه حسینی خطا ولی یارب
حسینه خاطر اونا ایله سن عطا بو گجه
.
تفضّلاً قلم عفو چک خطالرینه
برات قیل اونا بیر خرج کربلا بو گجه
.
.
.
.
#شب_عاشورا_سعدی_زمان
#آلوب_عمامه_اله_شاه_لافتی_بو_گئجه
#ترکی #لمعات_حسینی
.
✍️ #زبدةالاشعار ✍️
.
🆔: @nohe_torki
نظر دهید