شب عاشورا
.
✍️ زبدة الاشعار ✍️
?: @nohe_torki
.
.
کربلایی ابوالفضل عباسی معروفان
.
آچیب عزت قاپوسین شاه شهیدان بو گجه
گلور عشاق و ملک خیمیه مهمان بو گجه
.
یغشوب پیر و جوان جمله حسینون باشینا
آخرین سؤزلرینی ایلیه اعلان بو گجه
.
رخ زیبای حسین هر طرفه نور سالیب
آفتاب و قمری ایلدی حیران بو گجه
.
تا سکوت اولدی عیان پیر طریقت دیدی هو
باشلیرام الله آدیلان بودی فرمان بو گجه
.
خوش گلیبسوز سیزی بیر امره مخیر ائدورم
اولمیا غالب اولا نفسوزه شیطان بو گجه
.
چون سحر یوم بلا جنگ و شهادت گونودی
ایستورم واقف اولام وار نچه قربان بو گجه
.
بی تعارف دیورم خیمه که تاریک اولدی
کیم گئدور گئتسون اگر اولسا پشیمان بو گجه
.
من حسینم ئوزومه عاشق صادق گزیرم
قالماسون هر کس اولور ناقض پیمان بو گجه
.
کیم حسین عاشقیدی یار حق رحماندی
قالاجاق عمر ابد تابع قرآن بو گجه
.
من اونون اللرینی ویرسه اجازه ئوپرم
اودی وارسته بشر طالب جانان بو گجه
.
الغرض سؤندی چراغلار کسیلوب همهمه لر
هرکس ئوز ذائقه سین ایلدی کتمان بو گجه
.
او قرانلوقدا گئدن گئتدی یازار مقتلده
قالدی با عاطفه یئتمیش ايکی انسان بو گجه
.
شمعلر روشن اولان وقتده مظلومین آقامین
روحی گؤیلرده اوچوب شاد و خرامان بو گجه
.
باخدی سالار شهیدان کمگین ائتدی مرور
قییدوب منفک اولان جسمینه بیر جان بو گجه
.
دئدی صد شکر خدایا بولارین غیرتینه
قویمیوبلار قالا تک شاه لب عطشان بو گجه
.
فکره دولدی ایله بیل نقشه چکور جنگاهه
لشکره ایستوری ویرسون سر و سامان بو گجه
.
ئوز خیالینده مجسم ائلدی صبح اولسا
کیمی اول ائده جاق عازم میدان بو گجه
.
گؤردی اکبر یاراشور یازدی آدین اولده
سالار البته علی عرصه ده طوفان بو گجه
.
ولی حیف اولسون اونون قامتینی دوغرادیلار
یئری وار تازه جوانلار اولا گریان بو گجه
.
قاسمون بیلدی که وار باشدا شهادت فکری
آدینی یازدی مبادا اولا نالان بو گجه
.
تازه داماد ولی طوی گونی قرمز گئیدی
قاره پوش اولدی عروسی شب هجران بو گجه
.
تا که عباسه گؤزی دوشدی چکیب دلدن آه
بیلدی قارداشی دوشر نهرده بی جان بوگجه
.
سالدی دشمن او علی بوسه ووران اللرین
روز عاشوردن الواندی نیستان بو گجه
.
نقشه لر چکدی خیالینده او شه طولانی
بیر نچه لحظه غرض هوش آپاریب مولانی
.
درک ایدیب عالم رویاده رسول اللهی
وار یئری جدی مخاطب ائلیه اول شاهی
.
عارف اول سنسن اوغول آل محمدده شهید
سن گرک فاش ائده سن سر فنا فی اللهی
.
سالما تاخیره حسین گل که نه تنها ملکوت
گؤزلیور آدم و خاتم یولوی واللهی
.
بو گجه ای گل زهرا سنه آخر گجه دی
قوی باشون بالشه یات برهم اولان خرگاهی
.
استراحت ائله شاید باشون اللرده قالا
اولمیا گل بدنین مشتری دلخواهی
.
هوشه گلدی دئدی هیهات حسین بن علی
جدینون امرینه بیر لحظه ائده کوتاهی
.
ایندی آماده اولون گودی مقتلده گورک
نجه درک ایلدی زینب بو غم جانکاهی
.
داشلاری نیزه لری ووردی کناره او خانم
گؤردی بی سردی یاتیب قاندا مبارک ماهی
.
وا اخا ناله سی قؤزاندی او دم زینبدن
دئدی ایوای یارالی عالمی اولسون واهی
.
ایندی منده یازورام شعر حسین وای دیلده
اون بش ئیل بو قاپیدا ایله میشم مداحی
.
ایستورم لطفیله الله گؤره (معروفه) روا
ایلده بیر دفعه ئوپه جنت اولان درگاهی
.
.
#شب_عاشورا
#آچیب_عزت_قاپوسین_شاه_شهیدان_بو_گجه
#معروف_اهری
#ترکی
.
✍️ #زبدةالاشعار ✍️
?: @nohe_torki
نظر دهید