رجز در شهادت امام حسین (ع)
.
✍️ #زبدةالاشعار ✍️
.
🆔: @nohe_torki
.
#سبک_احوالیمیز_یاماندی … 10 سبک
.
مرحوم یحیوی اردبیلی
.
آی باتدی صبح آچیلدی ، زینب نوایه گلدی
زهرا دیدی حسین وای، عالم صدایه گلدی
.
.
چون یخدیلار آتیندان، سلطان تشنه کامی
دنیایه اولدی اعلان قُتل الحسین پیامی
جنّاتید‌ن ایشتدی پیغمبرِ گرامی
نعلین‌سیز عباسیز کرب و بلایه گلدی
.
.
پیمانه عالم اولدی، جانانه ویردی جانین
شوق و شرافتیلن ، طی ایتدی امتحانین
شمرِ دغا توکنده ، خاکِ منایه قانین
یوز دوتدی آسمانه ، حمد و ثنایه گلدی
.
.
خونِ خدا توکولدی گودال کربلایه
یرلر تز‌لزل ایتدی، رعشه دوشوب سمایه
کروبیان ِ لاهوت آغلاشدی بو بلایه
یل اسدی گون دوتولدی ظلمت فضایه گلدی
.
.
خون ِ حسین بوغازدان جاری اولان زمانی
جبریل آپاردی عرشه، بیر شیشه ده او قانی
اول شیشه‌د‌ن نمودار، اولدی بلا نشانی
قوزاندی بوی ماتم اهلِ سمایه گلدی
.
.
نورِ حق اولدی لامع ، باشسیز قالان بدنده
رأسِ حسینِ مظلوم سر نیزیه گیدنده
بادِ سیاه اسنده یر زلزله اید‌نده
سیندی نظامِ دنیا حّدِ فنایه گلدی
.
.
نزدیکیدی یریند‌ن چیخسون مدارِ دنیا
آلِ اُمیه ایتسون دستور ِ شرعی مُلغا
سر نیزه د‌ن اید‌نده نورِ حسین تجلّا
دینِ محمد اوسته نورانی سایه گلدی
.
.
فرمانِ غارتیلن ، تلّی آشوب عربلر
گوردی او هایهوئی اطفالِ زار و مضطر
قاچییلا خیمه گاهه بیرد‌ن اوجالدی سسلر
عمه آماندی لشگر خیمه سرایه گلدی
.
.
صحرانو‌رد عربلر خرگاهی یاندیراندا
باشی آچوخ حر‌ملر ، اوتدان چیخوب قاچاندا
قالخوب بترلی آتش گیزلندیلر دوماندا
توسدی اوجالدی قاره ، پرده هوایه گلدی
.
.
بیرخوردا قیز قاچوردی،دوتموش آلو عباسین
مردِ یهودی دوتدی خاموش ایدوب لباسین
گتدی اله حسینون دلبندینون رضاسین
احسن او شیخه مشکل وقته هرایه گلدی
.
.
گر ایتمسیدی زینب نسلِ حسینه امداد
اولموشدی اود ایچینده ، سوزان امامِ سجاد
قیلدی رشادتیله اوتدان امامی آزاد
بیر تازه زندگانلوق زین ِالعباده گلدی
.
.
زهرا گز‌ردی گوندوز ، اطرافِ ماجراده
تا کوفیه حسینون ، گیتدی باشی جداده
نعشِ حسینی آخشام ، باشسیز قویوب آراده
گون باتجاقین او خاتون مطبخ سرایه گلدی
.
.
حورانِ باغِ جنّت محزون گرفته سیما
حوّا خدیجه خاتون مریم جنابِ سارا
آشفته مو سیه پوش دیللرده وای حسین وا
زهرایه همد‌م اولسون بزمِ عزایه گلدی
.
.
اللی اوچ ایل قاپوندا وار «یحیوی» حسین جان
نوحه یازوب غمونده اولموش مریض و نالان
دستِ مبار‌کونله دردینه ایله درمان
امّیدِ صحّتیله بابِ شفایه گلدی
.
.
#حسینیه_یحیوی_اردبیلی
#حسینیه_شهادت #عاشورا
#آی_باتدی_صبح_آچیلدی_زینب_نوایه_گلدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید