شهادت حضرت علی اکبر علیه السلام
.
✍️ زبدة الاشعار ✍️
.
🆔: @nohe_torki
.
مرحوم حسینی سعدی زمان
.
ئولونجه وار یری گَلسم فغان و فریاده
الهی بو نه گوزل آرزودی دنیاده
.
قوجا آتا آچا گوز جان ویرن زمانینده
جوان اوغول گوره یارب دوروبدی یانینده
.
اورکده نسگلی قالماز گیدر غمی او زمان
باخار جوانینه جانانه جان ویرر آسان
.
بونون برابری مافوق بلکه نسگلدور
بو مطلب عکس اولا هر بیر آتایه مشکلدور
.
قوجا آتا گوره جان اوسته نوجوان اوغلین
قالار نه حاله آتا گورسه اول زمان اوغلین
.
حسین نه حاله قالوب بُلمورم، خدا بُلوری
گورنده جدّی شبیهی جوان اوغول اُلوری
.
او حالی هر گوره نین اختیارینی آلوری
قلجلانوب باشی، قان ایچره اَل اَیاق چالوری
.
بدنده یاره لری چشمه چشمه قان ویروری
نفس باتوب، گوز آخوب، توپراق اوسته جان ویروری
.
ایکی اَلیله گوتوردی امام دل خسته
آلوبدی پارچالانان باشینی دیزی اوسته
.
سیلوبدی گوزلرینون قانینی اولوبدی ملول
بویوردی آچ گوزون ای جدّیمون شبیهی اوغول
.
سحر ستاره سی تک تیز غروبه یتدون اوغول
قویوب غریب آتاوی تک بو چولده گیتدون اوغول
.
شل اولسون اَلری کیم ووردی باشیوه شمشیر
بو یاره نون ایدوری سوزی قلبیمه تاثیر
.
گُل اوزلی تازه جوانیم آنان گوزیندن ایراق
ایدوبله پیکریوی برگ گُل کیمی اوراق
.
نه قَدر سسلدی دیندوردی سیّد الشّهداء
جواب گَلمدی، بیر صیحه چکدی وا وَلَدا
.
اوغول باشینی گوتوردی باسوب اورک باشنا
سووومادی اورگی، شدّت اولدی گوز یاشنا
.
باشین قویوب یره اشکیله دولدورب گوزینی
اوغول جنازه سی اوسته سالوب او شه اوزینی
.
یوزین قویوب یوزینه قان قاریشدی گوز یاشنا
دیدی اوغول اولا توپراق بو عالمین باشنا
.
غریب آتاندا عزیزیم نه تیز بیله دویدون
اوزون گیدوب منی دشمنلر ایچره تک قویدون
.
او قدری آغلادی، سس چکدی، ایلدی شیون
باخوب او حالینه اودلاندی سنگدل دشمن
.
گوروردولر اوغولون زخم جسمی قان ویروری
باخان او حاله دیردی حسین جان ویروری
.
اوغول یوزیندن ایدنده یوزین امام کنار
ایدوب نظاره نه گوردوله قوم کینه شعار
.
آتا محاسنین ایلوب خضاب اوغول قانی
او حالی وار یری یاندورسا کون و امکانی
.
بو شاهزاده حسینی حسینه سوگُلیدور
شبیه ختم رسل گلشن وفا گُلیدور
.
.
متن کامل در موضوع #رضویه_شهادت در هشتک زیر
#یوزین_قویوب_قوری_توپراقه_چوخ_ملالیله
#چخوبدی_عرشه_فغانیم_اوغول_جواد_ئولورم
.
#اکبریه_شهادت
#ئولونجه_وار_یری_گلسم_فغان_و_فریاده
#چهارده_معصوم_حسینی
#ترکی
.
✍️ #زبدةالاشعار ✍️
.
🆔: @nohe_torki
نظر دهید