پیشگام کاروان عشق
حدیث جانبازی حضرت مسلم بن عقیل (ع)
300 بیت
.
✍️ زبدة الاشعار ✍️
.
🆔: @nohe_torki
.
مرحوم عابد تبریزی
.
اساس دینی حسین ایستدی ائده تحکیم
یته تحققه امر قضای حق حکیم
.
حجاب شاهد غیبی سالا عذاریندن
جهانی دولدورا انوار آشکاریندن
.
سلوک و سیره حقیقت یولون ایده هموار
نکات مبهم توحیدی ایلیه اظهار
.
أجابت ایتدی ولی خدای حی و مجید
صلای عشق، ویرنده منادی توحید
.
تقبل ایلدى بار بلایه حامل أولا
بو یولدا هر غم و اندوهله مقابل اولا
.
ادامه دورینه ویردی سپهر بی پایه
او وقت اولوب که یته عهد عشق ایفایه
.
ویریلدی قافلۀ عشقده ندای رحی ل
اولوب بو قافله ده پیشتاز أبن عقیل
.
أمامه رونق اسلامیدی هامی منظور
گوروبدی حق تاپا مسلم آدیله خوشدی ظهور
.
بل افصولنه تدوین اولاندا فصل خطاب
اولوبدی ابن عقیلون آدیله فتح الباب
.
وفا کتأبی اولان وقت قانیله تذهیب
اولوبدی مسلم آدی بو کتابه معنی زیب
.
عقیلون اوغلى علی دوندمانه منسوب
حبیب لم یزله نور چشم تک محبوب
.
کمال نفسله منظور نفس خیرالناس
وفاو زهد و رشادتده تالی عباس
.
نجه بیان أیلسون دل بو رتبه و فضلی
تداعی ایلوری مسلم آدی ابوالفضلی
.
هامی صفات پسندیده نفسنه شایا
صفا و زهدده اقران أیچینده بی همتا
.
بوقدر وار او علی نسبت و نبى مشرب
اولوب نیابت نفس أمامه مستوجب
.
اوجالدی عرشه بو عنواندن مقاماتی
اولوبدی رشگ ملک پایۀ کمالاتی
.
نیابت امری ویروبدور أمیر حل و حرم
اولوبدی مسلم أو أمرین قضاسنه ملزم
.
یازیب أمام صنادید کوفیه مکتوب
که چون حضور امام اولدی سیزلره مطلوب
.
من ایتدیم اوز ثقۀ اهل بیتیمی اعزام
لزومی وار بونا اولسون منه سزا اکرام
.
امامدن نجه آیریلدی یوخ بیانه مجال
سرشگ چشم یوزونده ایدردی وصف الحال
.
سفر لباسی گییوب قاصد امام جلیل
حریم کعبه نی ترک ایتدی مسلم بن عقیل
.
دیار کوفیه یول باشلادی شتابیله
انیس، آتش هجراندا التهابیله
.
دعای خیر ائدوب شاه دین اونا همراه
ایدوبدی زمزمه اول قدمده بسم الله
.
قضا دییردی رد عشق پر مهالک دور
وفا دییردی جهان غیر عشق هالک دور
.
قضا دیبردی عدو بی شمار دور بو وحید
وفا دییردی پوزار موج ظلمتی خورشید
.
قضا دییردی چکر بو زمامی دست بلا
وفا دییردی قبول بلادی شرط ولا
.
گجه گونوز مه و خورشید تک ایدردی سفر
دیلنده زمزمۀ یاد آشنا از بر
.
یتیشدی مقصده فی الجمله قاصد ره دل
ائدوبدی کوفه ده بیر پاک مرد ایوین منزل
.
یغیشدی باشنه بیر عده اهل رنگ و ریا
تظاهر أیلدیلر بیعته على الاخفا
.
گوروب مرافق منظور صورت حالی
امام محضرینه یازدی وضع أحوالی
.
صراحتیله أیدوب شرح ماجرانی رقم
دیار کوفیه گل یازدی ای امام أمم
.
حجاز قاصدی یولاندی بو کتابیله
ولیک کوفه ده دوندی ورق شتابیله
.
او بی وفألری ابن زیاد ایدوب اغفال
فروغ، ظلمته دوندی هدایت اولدی ضلال
.
اساس کعبه نی بتخانه شوقی ایتدی خراب
محیط اولوب مه تابانه موج تیره سحاب
.
دوتوبدی وسوسۀ کفر دل لری یکسر
أمام نایبینی تک تویوب منافق لر
.
ایدوب معارضه کفریله وحدت اسلام
مجازی ویردی کناره حقیقت اسلام
.
داغیلدی کوفه لیلر قالدی یکه و تنها
نه بیر انیس نه مو نس نه یار و نه یارا
.
نماز مغربی برپا ایدوب جماعتله
تمامه ویردی ولی منتهای وحدتله
.
چکردی ظلمت شب پرده بام و دیواره
باتاردی دامن أفاق، موج زنگاره
.
حلول ایدردی گجه کوفه شهرنه آرام
دوتاردی آینۀ روشن سپهر ظلام
.
قویاردی گوندوزون أعمالنه گجه سرپوش
اولاردی همهمه و هایهوی لر خاموش
.
او عادتدیله که معمولیدور شبانگاهین
شامی اراده ایدوب منزلین أمانگاهین
.
زمانه اؤز روش جاودانه سین تاپدی
پرنده ده پر چیب آشیانه سین تاپدی
.
غریبین اوزگه دیارینده خانمانی هانی
مدینه لی اولانین کوفه ده مکانی هانی
.
گوروب او منظرهنی نائب امام زمان
ملالدن أورهگی پرده پرده باغلادی قان
.
نه اقربا نه کس و آشنانه نه بیر محرم
غریب أولکه، هامی خصم جان، شب مظلم
.
دولاندی کوچه لری بیر زمان ملالیله
شکسته خاطرله انکسار حالیله
.
اوعزمی آهن و فولاد دن اولان محکم
بِلا اراده ویراردی او تیره شبده قدم
.
اولوب بو گشت و گذر منتهی بلا ایوینه
چکیب قضا اونی اندوه و ابتلا ایوینه
.
پناه آپاردی دل ظلمت شب تاره
ایدوبدی خسته و رنجور تکیه دیواره
.
أیدوب بلا أیوینه فتح باب بیر عورت
او شیر مرده دوشوبدور گوزی همان ساعت
.
سؤال ایلدی کیمسن ندور مراد و مرام
که ایتموسن گجه وقتینده بو محلی مقام
.
او چشمه سار فضیلت او منبع تقوا
عطش وجودنه قلبینده ایلیوب ایما
.
او پارسا زن ایدوب بیر قدح سو آماده
سقایت ایتدى أو سیراب سرو آزاده
.
تجرّعیله سویی میل ایدوب سونوب تف آه
ادای شکر ایلیوب سویلدی سقاکِ الله
.
گوروب وقوفینی عورت دوباره ایتدی سوال
ندور توقفه علت ندور بیان الحال
.
چکیب قرا گجه ظلمت حجابی آفاقه
ساچیب دی قاره علم اوج نیلگون طاقه
.
تمام خلق گیدوب خانماننه گوروسن
هامی پناه آپاروب آشیانه گوروسن
.
.
سنون بو شهرده سامان و سر یوخوندی مگر
عیال و خانۀ مدنظر یوخوندی مگر
.
علاوه کوفه نون أوضاعنون وخامتی وار
بو وضعدن هامنون منتهای وحشتی وار
.
ادامه تاپسا اگر بو وقوفه تدبیرون
سالار عیالوی خوف و هراسه تأخیرون
.
بو سوز عواطفی تحریک ایدوب نهادینده
مدینه نون اولوب احوالی زنده یادینده
.
«ایوین وار اهل و عیالون وار ایلمه تأخیر
ایدر عیالوی تأخیر، ایتماقون دلگیر»
.
هانی مدینه هانی خانمان هانی مأوا
نه آرزودی بو کوفه هارا مدینه هارا
.
یانور چراغ مدینه هنوز چون خورشید
جهانه نشر أیدوری نور مذهب و توحید
.
اولوبدی بیت خدا گرچه بو سراجه زجاج
شعاعله گنه دوتموش مدینه نی بو سراج
.
هنوز اهل دلون وار پناه و ملتمسی
هنوز شیر خدا أوغلونون گلور نفسی
.
چراغ دودۀ طاها هنوز روشندی
جفا و جوردن آل رسول ایمندی
.
حسینی یادنه سالدى مدینه یادیله
که زنده دور هامی ارکان دین بو آدیله
.
سیخیلدی قلبی دوشوب یاده بازدیقی نامه
یتر نه نوعله یارب بو أمر انجامه
.
یقین أمام أجابت ایدر او مکتوبی
که دین رواجیدی هر بیر نفَسده منظوری
.
ایدر اراده که گلسین بو شهر ویرانه
بو دار ظلم اولی مطلع او نور ایمانه
.
بو کوفه اهلی دگول عهد بیعته پابند
نعوذ بالله أمامه یتر ملال و گزند
.
دیار کوفه دی بویرده بیر موافق یوخ
ریائله دولودور بیر انیس صادق یوخ
.
دوبارہ عورت ایدوب اوز سؤألینی تکرار
او حال جذبه نی مسلمدن آلدی بالاجبار
.
جواب ویردی که بیکس غریبه کس کیم أولى
اسیر غربته غربتده هم نفس کیم أولى
.
هارا گیدیم نه کسیم نه پناهگاهیم وار
نه دادرس نه محبّ و نه داد خواهیم وار
.
یوخ آشنا منه بی یاور و حبیبم من
بلی بو شهرده یوخ بیر کسیم غریبم من
.
او هوشیار زن پاک قلب خوش فطرت
بو سوزدن ایلدى ادراک کُنه ماهیت
.
او مسلمی که دیدی وارد صحبتی سنسن
اولان بو شهرده مشهور شهرتی سنسن
.
منم بویوردی بلی نایب امام جلیل
بوخلقه مفترض الطاعه مسلم بن عقیل
.
ایشیتدی تا او زن پاک دل بو أقراری
اولوبدی عارضنه اشگ نیلگون جاری
.
دیدی همای سعادت آچوبدی پر باشیما
چکیب سعادت الى بخت نوظفر باشیما
.
نسیم جان آلورام نفخۀ کلاموندن
که عطر یار مشامه گلور پیاموندن
.
حسین قاصدی سنسن سنه أولوم قربان
خیالی سنله بو کاشانه ده اولار مهمان
.
مزیّن ایتسه بو مقصوره نی قدومون اگر
سپهره رفعت درگاهی افتخار ایلر
.
گتوردی مسلمی فی الجمله منزله عورت
ائدردی عرضه اونا اشتیاقله خدمت
.
خیال ایتدی ویروبدور او بی پناهه مکان
بولنمَدی که قوروب دام کید، دور زمان
.
گلوبدی اوغلی که ابن زیاده عاملیدی
آناخلافی اونون فکری فکر باطلیدی
.
قوناق وجودنی انکار أیدوب اوغولدان آنا
ولیک حسّ نهانیله درک اولوب معنا
.
وجود مسلمی کشف ایستدى استراقیله
گیدنمیوبدی مروّت یولى قوناقیله
.
رعایت ایتمدی آئین شرع و وجدانی
زیادین اوغلونا ویردی خبر بو معنانی
.
او ماجرالی گجه لاجرم اولوبدی سحر
لوای نور سپهره، ویروب شه خاور
.
غم و ملالیله مسلم او ابوده چنگ به چنگ
که کوفه اهلی در و بامی دوتدی جنگ آهنگ
.
گوروب أو حالی او بینا دل بصیر نهاد
ایدوب او صادقه رؤیا عوالمندن یاد
.
«همانکه نصف شب ایتمیشدی جذبۀ طاعت
تمام جسمینی مقهور نشئۀ وصلت»
.
یتوب او وقت، که ذکر دعادن اولدی خموش
وجودی سکرت خواب ایتدی بیر زمان مدهوش
.
ویروبدی مژده همان حالده بشیر و نذیر
که ایتمه محنت هجراندن اوزون دلگیر
.
بو هایهودن آلوب گوش جان ندای امید
ویروبدی خاطر مهجوره وصل یاری نوید
.
او قدر قالمیری درک لقای یار ایده سن
اوزون مهالک هجراندن کتار ایدهسن
.
اورکده عقده له نن درد هجر جانانی
گوروب که مشکل آچا غیر تیغ برّانی
.
ال آتدی قائمۀ تیغ شعله انگیزه
که قانله سو سپه دلده آتش تیزه
.
أیدوبدی رسم وداعیله میزبانه سلام
سپاس نعمت ایدوب هم تحیّت انعام
.
آنا عواطفی جوش ایتدی عورتون دلده
گوروب اوز اوغلونی گویا دچار مشکلده
.
تضرعیله دئدی گتمه دام صیاده
وار احتمال نجاته گنه بو مأواده
.
بویوردی اهل وفایه بلادی عین نجات
طریق عشقده راحتدی هر نه وار خطرات
.
وجودیم ایندی دولوب شور و جذبه دن یکسر
وصال منزلنه منتهی اولور بو سفر
.
اجازه وئر نظرون اولسا لطف و احسانه
سپر اولا منه بوجنگده در خانه
.
آلوب اجازه او صولتلی شیر نر، ناگاه
در سرانی یریندن گوتوردی چون پر کاه
.
الینده قائمۀ صارم شرار انگیز
سالیبدی خرمن عمر عدونیه آتش تیز
.
هبوط صاعقه تک دوشدی جان اعدایه
ثبات دشمنی ویردی فنایه یغمایه
.
عموسی حیدر کرار تک قلج الده
پوزاردی صفلری فریاد یاعلى دلده
.
چکردی بانگ رسائیله نعرۀ تکبیر
علی ویراردی دییرسن حُنین ده شمشیر
.
پوزوب یسار و یمین نظمنی یساریله
شرار قهر توکوب تیغ آبداریله
.
یاریب نهنگ کیمی موج بحر عدوانی
ایدردی قانله گلگون بسیط غبرانی
.
آجقلی شیر کیمی شیر بیشۀ هیجا
ایدوب ایشیق گونی اعدایه لیلۀ یلدا
.
ایله صفوف نظامین پوزوب او جنگ آرا
که یاده دوشدی أحد، حمزه سیّدالشّهدا
.
زمانه قدرت بازوسینه دیوب احسن
بأتوب تحیّر و اعجابه سربسر دشمن
.
تجسّمندن أو حالین گویول اولور مبهوت
دگول بشرده میسّر او شوکت و جبروت
.
دولوبدی برزن و کو قوم نابکاریله
خیال جنگله بیر بی کس و فگاریله
.
او بیر غریب، او بیر بیکس و او بیر تنها =
او بیر یارالی او بیر تشنه لب او بیر یکتا
.
ایله ایدوبدی أو جمعیتی پراکنده
که فوج روبهی بیر شرزه شیر غرنده
.
گوزیده تیغی کمی خونفشانیدی امّا
حسین یادی ایدوب ظرف چشمنی دریا
.
دییردی اوز اوزونه دلده مین جهان غم و تب
بو شهره گلمیه ای کاش شاه دین یا رب
.
بو یرده یوخدی صفادن نشان وفادن اثر
بو قوم عادتی مکر و فسوندی فتنه و شر
.
بو فکرلر ایلیوب حال قهرنی تشدید
اولاردی لحظه به لحظه فشاری خصمه شدید
.
ائله مؤثر أولوب جنگی قدم بدکیشه
که سالدی میر سپاهی هراس و تشویشه
.
گوروبدی ضعفنی اشرار سست بنیادین
بولوبدی تقویته وار نیازی افرادین
.
أمیر کوفیه اوضاعی یازدی بالاجمال
ائدوب کتابتی چابک سوارله ارسال
.
زیادین أوغلی اولوب باخبر قضایادن
سپاه کوفیه حادث اولان بلایادن
.
دوباره ایلدی بیر عده جنگجو اعزام
که امر مسلمی سرعتله ایلسونله تمام
.
سفارشیله قوشون میرینه أیدوبدی عتاب
که بو قضیه منیم ایتدی قلبیمی بی تاب
.
حقیقتأ سبب ننگ دور بو معناده
که بیر غریب پوزا بیر سپاهی دعواده
.
سپاه کوفیه یتدی قوای امدادی
سپهر، محکم ایدوب اصل رکن بیدادی
.
تراکمنده قشون موجه گلدی چون دریا
محاط ایدوبله عقیل اوغلونی گهر آسا
.
او چار موج حوادثده، مرغ طوفان تک
دوروب أو ثقل وفا کوه سخت بنیان تک
.
أو عزم راسخه بیر ذرّه یتمیوب نقصان
ویروب سپاهه اوزون الده صارم عریان
.
ویراردی صاعقه تک برق، تیغ شعله خصال
یاناردی شعله سنه کشت هستی ابطال
.
زمان اولوب متحیر او زور و قدرتدن
عقولی واله ومات أیلدى شجاعتدن
.
ویروب توکوب داغیدوب پوزدی نظم أعدانی
او بدنهاد لره ائتدی تنگ، دنیانی
.
دییردی دشمنه وردیقجا تیغ آتشبار
خدایه آند اولا ای قوم پست کینه شعار
.
اگرچه تلخدی صهبای مرگ هر جانه
عقیلین اوغلی ایچر بو شرابی مردانه
.
توکردی سوخته نی پشت بامدن دشمن
که ترک حمله ایده بلکه شیر مردافکن
.
ولی او سوخته پروانۀ شرار وصال
ایدردی آتشی خندان لبیله استقبال
.
که یعنی آتش عشق حسین ده یانانین
نهادی لاله کیمی داغ هجره اودلانانین
.
جهانی دوتسا شرر یوخدی ذره پرواسی
خلیل عشقه گلستاندی شعله دریاسی
.
او بیر غریب أیله خصمی ایلدى مقهور
که ایتدی دشمنی اندیشه ناک او صولت و زور
.
حریف گوردوله اولماز او بیکس و یاره
تمام کوفه نی دولدورسا قوم خون خواره
.
بروزه گلدی کهن عادت و قدیم شعار
بنای مکر قویوب فرقۀ زبون ناچار
.
محمد آدلی خصالاً محمّده دشمن
شریر و فاسق و مکّار و مرتد و ریمن
.
أوزی امیر سپه سر سپار ابن زیاد
هامی شرارت و شقوة هامی عناد و فساد
.
یتوردی عرضنه اول شرزه شیر هیجانین
رسول پادشه کلّ دین و دنیانین
.
که وار امان سنه ترک ایله سن قتال اگر
یقین بو سعی و تلاشونده یوخ دوام و ثمر
.
بویوردی کاذب و مکاره اعتماد اولماز
ستم شعارلره شیوه عدل و داد اولماز
.
یالان دیدون او اماندا قریب دور نظرون
نهاد خبثنه حاکیدی چشم پر شررون
.
جواب ویردی که من صادقم بیانیمده
اورک حکایت ایدور هر نه وار زبانیمده
.
بویوردی ویرمیه سوز گرمنه أمان مطلق
ومحالدور الیمه اللروز اولا ملحق
.
أمان وئروبله او کذّاب و بی امان افراد
ولیّ داوره نایب، ایدوبدی ترک جهاد
.
قلج الینده تحرک دن اولدی تا آرام
تهاجمیله آلوب دورونی گروه لئام
.
جسارت ایتماقا نامردلر تاپوب فرصت
گلیب تهوّره روباه فوجی گرگ صفت
.
بو وضع حالی گوروب گلدی خاطری درده
نولی اسیر اولا گور مرد راد، نامرده
.
فسون و مکرله الدن آلوبلا شمشیرین
بویوردی اوّلی دور بو هنوز تزویرین
.
هانى امان که منی اونلا ایلدوز پاگیر
أسیر اولاردی مگر بیر گروه روبهه شیر
.
مأل کارنی حسّ ایلدی او بینا دل
حریم وصله داخی اولدى قلبدن مایل
.
اورک سراچه سنه مهر وصل سالدى شعاع
ادا ایدوبدی خلوصیله لفظ استرجاع
.
دولوبدی دیدۀ حق بینی اشگ نابیله
باخیب سپهره طرف دیدۀ پر آبیله
.
او حال عجزله گویا أورکده سوز و گداز
ایدردی بارگه کبریایه عرض نیاز
.
که ای نفوسه یتن فیضی پست و بالادن
پیمبر اوغلونی حفظ ایله کید أعدادن
.
نه من که من کیمی مینلر اولا اونا قربان
وقایه دور او شهه جان عالم امکان
.
ضعیف نفس لر اشگین ایدوبله ضعفنه حمل
درخشش گهری نقد ایده محالدی رمل
.
بیری دیدی او دنی طبع قومدن أو زمان
ندن بو نوعله اشگون اولوب عذاره روان
.
بیریسی ایسته سه قسمت بیوک تمنادن
لزومی واردی هراس ایتمه سین بلایدن
.
بویوردی آند أولا اللهه شیرزاد عقیل
محالدور ایده اوز حالینه سرشک، سبیل
.
دل اهلی شاد اولی هر قدر غم تاپا شدت
طریق عشقده بازیچه دور بیزه محنت
.
اگر آخور گوروسوز دامنه سرشگ تریم
مدینه شاهنه معطوفدور هامی نظریم
.
منه یقیندی ایدوب کوفه شهرینه اقبال
گلور بوشهره او شاهنشه سریر جلال
.
دگول سزا او شهه بو دیار ویرانه
اونون خیالین ائدوب گوز یاشیم دونور قانه
.
مخاطب ایتدی سپس ابن اشعثی او زمان
اولار که سنده اولا خیردن بویوردی نشان
.
حجازه ایلیه سن بیر نفر رسول اعزام
پیمبر أوغلونا مندن ایده ادای پیام
.
که گلمه کوفیه شاها آتام سنه قربان
بو ناسپاس لر أیلوبله ظلمده طغیان
.
همان جماعت بی شرم دور بو اهل ریا
آتان ولیّ خدایه أو قدر ایدوبله جفا
.
که موت و قتلله حتى او شاه کشور جان
ایدوب فراق لرین آرزو عیان و نهان
.
قبول ایدوبدی بو امری او مرد کفر شیم
قبولین ایتدی مؤکد سپس بقید قسم
.
خلاصه نایب میرهدانی اول گمراه
گنوردی مجلس ابن زیاده خواه نخواه
.
در سرای حکومتده مسلم ایتدی وقوف
آلوبدی دوره سین ارباب کینه الده سیوف
.
عطش ز بسکه قرارین اورکدن آلمیشدی
جمالی برگ خزان دیده تک سارالمیشدی
.
حریم قصرده ناگاه گوردی کوزۀ آب
او سر مشاهده سیندن فزون اولوب تب و تاب
.
بویوردی کیمدی ویره بیر ایچیم منه بو سودان
سؤنه اورکده اولان بلکه بو شرار نهان
.
جواب ویردی بیری اول دنی جماعتدن
که قلبی آهنه مفهومیدی قساوتدن
.
بو سو اگر چه گوارا و سرددی امّا
خیال ایتمه سنه بیر ایچیم میسّر أولا
.
محالدور ایچه سن بو زلالی یابن عقیل
سنه حمیم مهیا أیدوب خدای جلیل
.
بویوردی وَیحَکَ کیمسن بو پست فطرتیله
بوخبث نیتیله بیر بئله قساوتیله
.
دیدن او کسکمه ثبوت حقه أیدوب اقرار
او وقت کیم سن أونی جداً ایلدون آنکار
.
آدیم دی مسلم آتام عمرو باهلی مشهور
امام حقه ایدوب منده صدق عهد، ظهور
.
بویوردی حق آناوین ایلسون گوروم ثکلا
اورکدی سندد اولان یاکه صخرۀ صمّا
.
حمیمه سن سن أولان یابن باهله اُولا
سنه خلود سزادور جحیمده حقّا
.
جلوس ایدوبدی سپس تکیه ایتدی دیواره
اولوبدی دور و بره حسرتیله نظّاره
.
گتیردی بیر نفر اول وقتده سودان بیر جام
آلیب او بزم وفاده یگانه درد آشام
.
همینکه ایستدی میل ایلیوب اولا سیراب
دل قدح کیفی گلرنگ اولوبدی قانله آب
.
اولوبدی بیر نچه دفعه بو واقعه تکرار
آلیبدی رنگ لب لعلین اولدی سو، گلنار
.
گهر عقیقدن آیریلدی گوئیا آخر
بوسوزدن أهل دل آنلار حدیثی تا آخر
.
ضمیر آگهی درک ایتدی بو اشارتدن
که قاندی عاشقه سو مشرب شهادتدن
.
بویوردی حمد اولا اللهه گر اولیدی نصیب
بو سویی ایچماقی قسمت منه أیدردی حبیب
.
خلاصه زادۀ مرجانه ایلیوب احضار
أو بزمه ایلدى مسلم ورود بالاجبار
.
یتیشدی مظهر اخلاص کفر محضرنه
عقیلین أوغلی زیاد اوغلونون برابرنه
.
او گوهر شرفی هر شریفدن والا
دوروب مقابل أو أدنای کونه وأعجبا
.
حسین نایبی ختم رسالته منسوب
دوروب أو بزمده مرجانه أوغلونا مغضوب
.
أوزی اسیر یارالی ولیک سطوتله
سلالۀ قرشی هاشمی صلابتله
.
یتورمیوب أو قدر غصه دن خم ابرویه
باخیب حقارتله ساکنان مشکویه
.
ایدوب نظاره سی مسحور پیر و برنانی
«نگاه شیر قُرُق ایلیوب نیستانی»
.
جمالى قانله گویا شفقده دور خورشید
گوزینده جاذبۀ وصلدن فروغ امید
.
وفا تجسّمی مشهود، شکل أنساندا
ثبات کوه عیان موج خیز طوفاندا
.
فلک وفاسینه أیلوب تحیت و اکرام
او دم که ایلمه دی زادۀ زیاده سلام
.
تملّق أهلنه بو نکته آرتوروب حیرت
بیری دیدی که سلام أیتمدون ندور علت
.
امیر کوفه دی ابن زیاد و صاحب نام
لزومی وار ایده وارد اولان ادای سلام
.
بویوردی قتلیم اولوبدور اگر اونا مقصود
محالدور یته مندن اونا سلام و درود
.
که بو سلام اولار نفس ضعفنه تعبیر
اولانمیوب بیزه عالمده ضعف دامنگیر
.
ولی مرادی اگر غیر بوقضیه اولا
مبادله اولاجاخ چوخ سلام لر آرادا
.
زیادین اوغلى غضبلندی بو شهامتدن
ایدوبدی یاد قسم جانینه شقاوتدن
.
دیدی یقین أیدرم قتلوه سنون أقدام
او قدر قالمیر أولا عمروین زمانی تمام
.
وصیت أیلماقا ویرمنه بویوردی مجال
گراندی گرچه منه سن شقیدن استمهال
.
جواب ویردی ایله هر وصیتون واردی
سوزین نه أولسا بیان ایت که فرصتون واردی
.
نظر سالیبدی جلوس ایلین لره تک تک
گوروب تمامینی همرنگ مکر و کین چو فلک
.
عمر او بین ده جلب أیتدی مسلمین نظرین
قرابتین متذکّر أولوب أو خیره سرین
.
بویوردی وار سنه بیر حاجتیم ولی پنهان
قبول ایتگله أما اورکده ساخلا نهان
.
اوتانمادی أو مبرّى اولان شرافتدن
وقاحتیله تحاشی ایدوب أجابتدن
.
زیادین أوغلى عمر سعده ایلیوبدی خطاب
قرابت ایلوری بو امر اجابتین ایجاب
.
او پست فطرتی ملزم ایدوبدی بو دستور
اجابت ایلدی مسلم سوزون ولی مجبور
.
او شومه شرح ویروب بیر به بیر وصایانی
نهایتینده سوزون طرح ایدوب یو عنوانی
.
پیمبر اوغلونا من یازمیشام دیدی مکتوب
که کوفیه گله اول حى داوره محبوب
.
بئله خیال ایدورم ایندی بین راهده دور
غم و بلا و مصیبت کمین شاهده دور
.
سفارش ایله اولا هر طریقله امکان
که بو سفردن اولا منصرف امام زمان
.
عمر امیرینه نقل أیتدی بو وصایانی
رعایت ایلمدی شرط راز پنهانی
.
زیادین اوغلی او خبث نهادله گویا
دیوبدی معترضاً بو دگولدی شرط وفا
.
خیانت ایتدون أمانتده یابن سعد یقین
جهاندا ایلمز افشای راز مرد امین
.
دوتوبدی مسلمه ابن زیاد نحس أوزونی
تمام کبریله بو نوع باشلیوب سوزونی
.
خموش یابن عقیل ایتمه بیله جوش و خروش
حضور حاکم عادلده ساکت اول خاموش
.
گلیب بو شهرده شور و شر ایلدون برپا
وجودون أولدی بو مأمنده مایۀ غوغا
.
سن ایلدون متفرق بوجمع الفتینی
قیامه سوق أیلدون کوفه نون جماعتینی
.
جواب ویردی یقینا سنه سزادی سکوت
که خبث نیتون ایلور لسان کذب، ثبوت
.
بوشهره گلمدیم ایجاد شور و غوغایه
نه شر و فتنه عیان ایتماقا نه بلوایه
.
بو شهرین أهلى آتاندان ز بس گوروب بیداد
امانه گلدیله بیزدن ایدوبله استمداد
.
اولوب اشاعۀ قرآن بو گلماقا علت
طریق حقه طرف خلقی ایلیم دعوت
.
هامی مدارس آیاتی ایتمیسوز تعطیل
هامی حقایق اولور وجه باطله تأویل
.
شریعت اسمینه هدم شریعت ایلمیسوز
خلیفه نامینه نفی نبوت ایلمیسوز
.
دیلوزده حقی دییوب قلبه ایتمیسوز انکار
آدوز موحّد أوزوز فعل و شیوه ده کتفّر
.
بساط ظلم ندور مسند امام ندور
طریق شرع ندور راه میرشام ندور
.
زیادین اوغلی حیا أیتموسن بو گفتاره
أمام آدین ویروسن باده خوار خونخواره
.
زیادین اوغلی اوزون پیرو نبی بولوسن
پیمبر اوغلونا نایب منابی ئولدوروسن
.
زیادین أوغلی تلفّظ ایدور دلون اسلام
عمل لرون هاموسی ضد معنى احکام
.
زیادین اوغلی آتان باشه یغدى أشراری
یتوردی قتله ولى ظلم الیله اخیاری
.
بو سوزلر ایلدى حضارده بسی تأثیر
گلیبدی دلدن اولوب دیلده لاجرم جاگیر
.
زیادین أوغلى غضبناک اولوبدی شدتله
مقابله ایلدى افترا و تهمتله
.
بیزیله سیز آرا الله دور حَکَم مطلق
گلر او گون بولونر کیمدی حقّ کیم ناحق
.
او بی حیا دیدی مقتول ایدن منی الله
بو گونده قتلوه امرایتمسم سنون هرگاه
.
سنی او نوعله أیلوم قتیل یابن عقیل
که کیمسه اولمیوب اسلامده او نوع قتیل
.
بلی بویوردی سزادور سنه بو بدخصلت
که حادث أیلیه سن دین پاکده بدعت
.
زیادین اوغلی دوشوب تنگنایه صحبتده
زبانی قاصر أولوب پیشگاه حکمتده
.
نه شیوه ایتدی او ناطق بحق اولا خاموش
نتیجه ویرمه دی، آرتوب طنین بانگ سروش
.
اولوب خجل یتیشنده جدال انجامه
خلاصه آچدی دلین ناسزا و دشنامه
.
دییوب آتاسنه لایق اولان عبارتلر
دله گتیردی زیادہ سزا اشارتار
.
او دودماندی سزاوار طعن و لعن بلی
نعوذ بالله، نه مسلم و حسین و علی
.
زبان مسلمی بو یاوهلر خموش ایتدی
اگر چه قلبنه أود سالدی پرخروش ایتدی
.
نقدر یاوه دانشدی او مرتد رسوا
جواب ویرمدی هرگز او معدن تقوا
.
زیادین اوغلی گوروب ایتدی حیله سی تأثیر
داخی دانشمیری مسلم، سکوت اولوب، تقریر
.
دوباره بحث و جدل تاکه أولمیا تکرار
أو شومی ایتمیه سرکوب أو آتشین گفتار
.
اشاره قتلنه ایلوب أو مرد یکتانین
او مظهر ادب و علم و فضل و تقوانین
.
کنایتاً دیدی گر نطفه ن اولماسیدی حرام
یقین أیدنمزیدون قتلیمه منیم أقدام
.
سکوت ایله داخی ای دل دگول محل مقال
که نطقدن منی وامانده ایتدی شدّت حال
.
دگول شهادت مسلم غرض بو صحتدن
نظر حدیثدی بیر نکته لر فضیلتدن
.
بیان سرّ وفا شرح قدرت أیمان
حدیث معنی رمز حقیقت ایمان
.
حدیث مکتب توحید و مشرب تقوى
ثبوت حالت صبر و ثبات و سلم و رضا
.
دیمم که اولدی اوگون ظلم الیله بیر انسان
که قانه باتدی فروغ تجلّى أیمان
.
دیمم که مسلمی ایتدی شهید ابن زیاد
که نور عدله محیط اولدی ظلمت بیدأد
.
دیمم که عشق و حقیقت یولوندا جان ویردی
که راه عشقی هامی عالمه نشان ویردی
.
دیمم که مسلم أولوب قوم کفر کیشه اسیر
که اولدی صیت وفا و وداد عالمگیر
.
دیمم که مسلمی ابن زیاد ئولدوردی
که جور و کینه الى عدل و داد ئولدوردی
.
دیمم که ترک حیات ایلدی بو سوداده
که اولدی قدرت ایمانی چیره بیدأده
.
ایله خلوصله عهد ولایه ایتدی وفا
که اولدی پیشرو کاروان کرب و بلا
.
أو بام قصره ده اجبارله ایدنده صعود
پیمبر اوغلونا هر لحظه گوندرردی درود
.
ویراندا گردننه بوسه تیغۀ شمشیر
چکردی صدق و صفائیله نعرۀ تکبیر
.
که یعنی کشتۀ توحیده یوخ ملال و حزن
که زنده ساخلار آدین حىّ قادر و ذوالمن
.
دییوبدی کلمۀ تکبیری باشدا شوق سجود
أودور که گلدی باشی بامدن ترابه فرود
.
بدنده ملحق أولوب باشه تا اولا روشن
نثار مقدم جانان اوچون نه باش نه بدن
.
تاپیبدی دور حیاتی بو طرزیله پایان
ولی قالار آدی تا روز حشر جاویدان
.
او باش أو جسمله گلشن ایدوب گذرگاهی
آلیبدی قلبین اولوب هر کیمین نظرگاهی
.
گورن دییردی گل ارغوان اولوبدی خزان
دوتوبدی رهگذری بیر چمن گل خندان
.
نسیم کوفه أو جسمه اسیب أولوب مشگین
فضای کوفه نی بو ایگدن ایتدی عطرآگین
.
چمنده گلده یقین بیر ایله صفا یوخیدی
یاناردى حالنه بیگانه آشنا یوخیدی
.
او غربت اولکه ده دلدادۀ لقای حبیب
اولوب حیات و مماتینده بی پناه و غریب
.
قالیبدی گون قاباقندا او گل بدن یارالی
بدندن آیری باشی باش یارالی تن یارالی
.
سوزون سیاقی چکیر مطلبی بیر اوزگه یره
شهید کرب و بلا مقتلی گلیر نظره
.
اورکده یوخدی اورک صاحبی بولور یارا
أو حال شرحنه دل جرأت ایلیه حاشا
.
مفصّل اولدی دأخی ویرمه «عابدا» تفصیل
بو سوزده ایتدی نظر روح مسلم بن عقیل
.
بو بحثه ایتدی «سخاوی» سوزی سنی ارشاد(1)
دلالت ایلدی خیره ائوی أولا آباد
.
علاوه أیلدی ترغیب شوقله شب و روز
أو آشنا که اولوب بختی اسمی تک «فیروز»(2)
.
اولوبدی سگیز ذیحجه ده بو شعر تمام
عنایتیله قبول ایلیه حق علّام
.
(1)و (2) مرحوم سخاوی و حاج فیروز زیرک کار
سروده شده در سال ۱۳۵۳
.
.
#اساس_دینی_حسین_ایستدی_ائده_تحکیم
#ترکی
.
✍️ زبدة الاشعار ✍️
.
🆔: @nohe_torki
نظر دهید