وداع حضرت امام حسین (ع)
..
..
مرحوم حاج حیدر خسروشاهی (حزین)
..
..
قربان گئدوسن محضر جانانه حسینیم
قرباندی باجون سن کیمی قربانه حسینیم
..
پروانه صفت شمع فراقوندا یانوم من
صبرائت آنام اوغلی باشوا بیر دولانوم من
..
..
ای قافلۀ عشقه اوزی قافله سالار
سر سلسلۀ اهل وفا رهبر ابرار
سرمست ائدوبدور سنی پیمانۀ دیدار
هجرانون اودی گرچه یانان دللری داغلار
گئت باخما دالونجا بالاجا قیزلارون آغلار
..
..
قارداش دئمورم قافلۀ عشقی یوباندور
عرضیم بودی بیر لحظه ایاق ساخلا دایان دور
وار هر نه سوزون دلده باجون زینبه آندور
حسرتله بئله باخما سوسوز قیزلارا قارداش
یانما بو قَدَر قارداش اوغولسوزلارا قارداش
..
..
عالم یری وار اودلانا آهیم اثرینده
اطفال یانوب ایله سوسوزلوق شررینده
گوز یاشلاری خشکیده اولوب چشم ترینده
اشگیله گئدن یوللاریوا سپمه سلر سو
بیر عمر اولار مایۀ حسرت باجوا بو
..
..
نیسگیلدی سنون تک شه اولا عازم پیکار
اما نه یانیندا علم اولسون نه علمدار
باخما بئله دور و بروه ای شه ابرار
سن صاق صولا باخدوقجا دوشر یادینه اکبر
گوردوقجا سنی تک دوتار اود لیلی مضطر
..
..
ویر اذن رکابون دوتا زینب سنه قربان
کلثوم علمدارون اولا ای شه خوبان
تک گورمیه بو نوع سنی لشگر عدوان
اطفالی قوشون تک دوزرم یوللارا منده
گورسنمیه تک لیق اثری شاه زمنده
..
..
ای گوهر بحر شرف و کان عطوفت
بیر شه که اولا خلقت عالملره علّت
معلول لریندن یری یوخ ایستیه نصرت
فرمان جهاده منه ده گر اولا رخصت
دین اوسته قانا باتماق اولار جانیمه منّت
..
..
سندن صورا گرچه شرر فرقته یانّوخ
اما دؤزروق محنت ایّامه دایانوخ
باشون دالیجا کوفه و شاماتی دولانّوخ
احیا ائلدون دینی شهادتله برادر
تبلیغ ائدروخ بیزده اسارتله برادر
..
..
سنسیز باجوون رغبتی یوخ گرچه حیاته
سندن آرالی دوشمیه ، وار عشقی مماته
حقّه گوره اما چالیشار صبر و ثباته
چون نهضتوه دلدن اونون شرکتی واردی
باخماز که «حزین» قلبده مین محنتی واردی
..
..
#وداع #حزین_خسروشاهی #حسینیه_وداع #ترکی #زبدةالاشعار
نظر دهید