اشاره اولدی منه شخص بافضیلتدن #عباسیه_دخیل

استمداد حضرت ابوالفضل (ع)
.
.
مرحوم دخیل
.
.
اشاره اولدی منه شخص بافضیلتدن
خبر ویرم سیزه بیر صاحب شجاعتدن
.
رشادتیله صلابتده وارث حیدر
گورون نه وقت قالوب صولت وصلابتدن
.
اودم که گل بدنیندن اوزولدى قوللاری
الى دوشوب یاننا دوشدی سهم وصولتدن
.
زبسکه جسمنه دگدی یارا یارا أوستن
اوکان سهم و صلابت دوشوبدی قوّتدن
.
دوشه دوشه یره سسلندی ای شه مظلوم
گل ای اولان قدی خم بار درد و محنتدن
.
الیمی دوت الیوی مرتضی علی دوتسون
که سالدیلار منی کفّار کوفه قدرتدن

یتورگلن اوزیوی تئز، ابوتراب اوغلی
گوتور عزیزوی قارداش تراب ذلّتدن
.
الین یتور الیمه بیر ایاقیوه قربان
اگر چه شرم ایدیرم چوخ بونوعی جرأتدن
.
ولیک جان گیدوری جان کیمی گرک چاقورام
یولوندا چون ئولورم دوشموشم طراوتدن
.
یتوب نگوردی دوشوب بیر قنادسیز شهباز
سالوبدی شهپر آچوب بال اوج همّتدن
.
اودم که غالب اولور ضعف گیزلنور نفسی
چکن زماندا نفس قان آخور جراحتدن
.
نقدری قانی آخوب یرده یاحسین یازیلوب
که هرنه گلسه خیاله چخار محبّتدن
.
گھی یاراسی سیزیلدار بدن طلاطم ایدر
گهی یاتوب حرکت ایلمز خجالتدن
.
کسنده باشینی قاتل زبسکه مانع اولوب
که قارداشین گوره بیر کام آلا زیارتدن
.
ز بس یوزین یره سورتوب یوزی گیدوب یرده
دوشوبدی ماه بنی هاشمی لطافتدن
.
حسین حالینی معناده بیر تصوّر ایدون
نقدر غصه اونا یوز ویروب او حالتدن
.
یره اوتوردی آلوب باشینی دیزی اوسته
گوروب که یوخدی دلینده لسانه طاقتدن
.
بویوردی آچ گوزون ای نور چشم عین الله
گلوبدی گون باشوا دور بو خواب راحتدن
.
اودم که گوردی باشی اوسته، روح الارواحی
دوباره جانه گلوب قوخمیوب مذمّتدن
.
نهیب عشقیله بیر بانک یاحسین چکدی
که چخدی نعره صداسی حجاب وحدتدن
.
دیدی بغیشله دورا بُلمودم یارام چوخدور
دیمه یوخومدی خبر راه و رسم حرمتدن
.
یوزین ایاقینه قویدی دیدی که عفو ایله
یوخومدی ال یاپوشام دامن جلالتدن
.
قولوم اوزولدی بدندن ولی نه باکیم وار
اوزولمیوبدی الیم دامن ولایتدن
.
قوجاقلاشوب ایکی قارداش باخوب چون اهل حرم
دایاندی عرشه فغان عترت طهارتدن
.
دیدی منه بوغریب ئولکه ده کمک سنیدون
قویوب منی گیدوسن الأمان بوغربتدن
.
قباقجه سن گیدوسن اکبریمه ایله خبر
گلینجه من او دیاره بو دار محنتدن
.
بویوردی دور آپاروم جان ویرنده خیمه ده اول
دیدی که یوخدی یوزوم گیتمگه خجالتدن
.
دیدی سکینه سنی بس سوروشسا من نه دیوم
دیدی بو مشگی آپار قورتولوم ملالتدن
.
دیدی سنی نجه جان أوسته من قویوم قارداش
گیدوم کناره مگر قورخورام بو کثرتدن
.
الى چو یوخدی چالا ال، ایاقلاری سورونور
سسین چخاتموری اما کمال غیرتدن
.
مباد طعنه وورا شمر شوم و بداختر
اوغورلوری نفسین قورخوری شماتتدن
.
سوله اوغولسوزی قارداشسیز ایلدیم گلدیم
بتولی ایله خبردار بو مصیبتدن
.
گوروب که یوخ الى خنجر قباقینه ویرسون
ولی باشین کسن ال چکموری شقاوتدن
.
سنون یولوندا شهیدم اوزونده شاهد سن
باشیم گیدونجه من ال چکمرم حمایتدن
.
دیدی اوتورما داخی خیمیه آپار تشریف
گیت اول اوزون متوجّه عیال و عترتدن
.
جمال حقّه باخوب حق دیوب گوزین یومدی
که ساکت اولدی ولی کلمۀ شهادتدن
.
ایدوب او حاله نظر چونکه زینب و کلثوم
گلوبدیلر ایشیگه خیمۀ خدارتدن
.
بیری حسین، دیردی بیریسی یاعباس
زمانه تنگه گلوب بانگ آل عصمتدن
.
قوجاقلاشوب ایکی قارداش کیمی ایکی باجی
اولارخموش، بولار نعره زن بو حالتدن
.
بس ایت «دخیل» که حضّار دوشدوله دلدن
سنون که دوشمیه جاقدور دلون فصاحتدن
.
سنه بسو دللری تعلیم ایدوب لسان الله
لسان صدر الهی بری دی لکنتدن
.
بویادگاردی جان تک ویرونجه جان ساخلا
نچونکه ناشی اولوب منشاء صداقتدن
.
.
#عباسیه #دخیل #عباسیه_شهادت #ترکی #زبدةالاشعار