صلوات چاووشی با توسل به 14 معصوم علیهم السلام
.
✍️ زبدة الاشعار ✍️
?: @nohe_torki
.
سید بشیر حسینی میانجی
.
گر ایسته سوز تاپاسوز هر ایکی جهاندا نجات
دیون محمد و آل محمده صلوات
.
.
گئدوبدی رفرفیلن گویلره رسول انام
گوروبدی عرشیده وار اون ایکی امام همام
کی اون بیری اوتوروبدور بیری ائدوبدی قیام
به یاد اون ایکی نور و به نور مه وَجَنات
دیون محمد و آل محمده صلوات
.
.
علی وصیّ بلا فصل مصطفادی بیلون
تمام شیعه لره اولین آقادی بیلون
نجفده اول آقانین قبری با صفادی بیلون
اونون اَلیله اولوب محو، لات و منات
دیون محمد و آل محمده صلوات
.
.
جناب فاطمه نون آدینه اولوم قربان
همان او فاطمه کی قلبینی ائدوبلر قان
گونوز ئولوب، گئجه دفن ایلیوب شه مردان
وئروبدی فاطمه نون آدینه خدا برکات
دیون محمد و آل محمده صلوات
.
.
گوزل آقادی امام حسن بقیعده یاتوب
جفای زهریله مظلوم ئولن بقیعده یاتوب
فدا اولوم او غریب وطن بقیعده یاتوب
مزاری گون قاباقیندا قالوبدی چوخ سَنَوات
دیون محمد و آل محمده صلوات
.
.
دیار کرب و بلانی چوخ ایستیور گوگلوم
شهید تشنه لبانی چوخ ایستیور گوگلوم
ابالفضل آدلی آقانی چوخ ایستیور گوگلوم
گرکدی گوزیاشیم آخسین عُذاره مثل فُرات
دیون محمد و آل محمده صلوات
.
.
امام زین العبادین وفاسینه قربان
گوزل یوزینده او نورِ جلاسینه قربان
نماز و راز و نیاز و دعاسینه قربان
اولوبدی شاهد اونون هر دعاسینه خَلَوات
دیون محمد و آل محمده صلوات
.
.
امام باقره قربان اودور بئشمجی امام
جناب جابره امر ایلیوب رسول انام
یتور منیم طرفیمدن اونا، گورنده سلام
همان امامیدی که اولدی شافع عرصات
دیون محمد و آل محمده صلوات
.
.
دولوبدی عشق ولائیله قلب اَطیبیمیز
هامی مکاتیب ایچینده گوزلدی مکتبیمیز
امام صادق اولوبدور رئیس مذهبیمیز
ائدوبدی شیعه لرین حقّینی جهاندا ثبات
دیون محمد و آل محمده صلوات
.
.
بیزی ائدوبدی خدا شمع عشقه پروانه
گرک اورکلریمیز غمده اود دوتوب یانه
امام موسی کاظم دوشوبدی زندانه
تاپوبدی خالق یکتا یانیندا چوخ درجات
دیون محمد و آل محمده صلوات
.
.
وئروبدی زهریله جان حضرت امام رضا
دوادی دردلره اول تُربت امام رضا
اورکده نیسگیل اولوب غُربت امام رضا
اونی زیارت ائدن کس گورر بوقت ممات
دیون محمد و آل محمده صلوات
.
.
خدایه شکر اولا کی شیعه و مسلمانم
سخا و جود امام جواده قربانم
همیشه سفره ی جودینده منده مهمانم
قیامتین گونی آلاّم اَلیمه برگ برات
دیون محمد و آل محمده صلوات
.
.
امام هادی اونومجی امامیمیزدی بیزیم
سپهر عشقیده بدر تمامیمیزدی بیزیم
اونون مرامی جهاندا مرامیمیزدی بیزیم
وئرر مُحبّ لره لُطف حقدن آب حیات
دیون محمد و آل محمده صلوات
.
.
امام عسکرینون روحینه اولوم قربان
چکوبدی چوخلو جفا یا دیوم چکوب زندان
تاپالاّ اهل ولا، سُرَّمَن رَآده نشان
او حضرت ایلدی اسلامه چوخ گوزل خدمات
دیون محمد و آل محمده صلوات
.
.
گوزللرین گوزلی حضرت امام زمان
او حضرتین یوزونون نورینه بپادی جهان
اگر چه گونتک عیاندی ولی اولوبدی نهان
ئوپور قدملرینی ایلده وادیِ عَرَفات
دیون محمد و آل محمده صلوات
.
.
بو شعره بانی محمّد، مرادی اولدی، ولی
کمک لیق ایلدی الحق علیّ و آل علی
«بشیر»ه وار اولارین لطفی هر زماندا بلی
تاپار یقین ایکی دنیاده کلّ شیعه نجات
دیون محمد و آل محمده صلوات
.
.
الّلهُمَّ صَلِّ عَلی مُحَمَّد وَآلِ مُحَمَّد وَعَجِّل فَرَجَهُم
.
.
#صلوات
#14معصوم
#گر_ایسته_سوز_تاپاسوز_هر_ایکی_جهاندا_نجات
#سیدبشیرحسینی
#ترکی
.
✍️ #زبدةالاشعار ✍️
?: @nohe_torki
نظر دهید