اصغریم ای ناز پرور یومولوب اول قاره گؤزلر #اصغریه_نخستین

حالات حضرت علی اصغر (ع)
زبان حال رباب(س)
..
..
مرحوم نخستین اردبیلی
..
..
اصغریم ای ناز پرور، یومولوب اول قاره گؤزلر
اولماسین هچ بیر اوشاقدان من کیمی شرمنده مادر
سویگولوم آغرون آلیم یات
من سنه لایلای چالیم یات
..
..
قوش کیمی شهپر چالورسان، چاره می الدن آلورسان
گورورم سوسوز قالورسان، چاره می الدن آلورسان
عطشوندن چوبالورسان، چاره می الدن آلورسان
سویگولوم آغرون آلیم یات
من سنه لایلای چالیم یات
..
..
..
ای گل باغ رسالت، اولمیشام سندن خجالت
ایلمه مندن شکایت، اولمیشام سندن خجالت
نولدی اول مهر و محبت، اولمیشام سندن خجالت
سویگولوم آغرون آلیم یات
من سنه لایلای چالیم یات
..
..
..
بلبلوم، سولدی بو باغلار، قلبیمه چکوبدی داغلار
محو اولوب چیچکلی داغلار قلبیمه چکوبدی داغلار
صود امر سوسوزدان آغلار، قلبیمه چکوبدی داغلار
سویگولوم آغرون آلیم یات
من سنه لایلای چالیم یات
..
..
..
آنووام سنه عزیزم، سن کیمی منده مریضم
حالووه من اشک ریزم، سن کیمی منده مریضم
گر قبول إئتسون کنیزم،سن کیمی منده مریضم
سویگولوم آغرون آلیم یات
من سنه لایلای چالیم یات
..
..
ئوره گیم اولوبدی یاره، آغلاما ای ماه پاره
گونوزوم اولوبدی قاره، آغلاما ای ماه پاره
دردووه یوخ منده چاره ، آغلاما ای ماه پاره
سویگولوم آغرون آلیم یات
من سنه لایلای چالیم یات
..
..
دؤشومی پاره إئدوبسن، منی بیچاره إئدوبسن
گونومی قاره إئدوبسن ، منى بیچاره ائدوبسن
منی آواره إئدوبسن ، منی بیچاره إئدوبسن
سویگولوم آغرون آلیم یات
من سنه لایلای چالیم یات
..
..
یوخ منیم الیمده چارم، چاره سیز درده دچارم
ئوز بالامدان شرمسارم، چاره سیز درده دچارم
آز قالور باتسون ستارم، چاره سیز درده دچارم
سویگولوم آغرون آلیم یات
من سنه لایلای چالیم یات
..
..
کاش ئولیدیم من وطنده، گوزلریم قالمیدی سنده
یا بو یولاردا گلنده، گوزلریم قالمیدی سنده
جان ویریدیم یولدا منده گوزلریم قالمیدی سنده
سویگولوم آغرون آلیم یات
من سنه لایلای چالیم یات
..
..
وای منه قلبیم سیخیلدی، چوبالور بشیکده اصغر
وای منه ائویم بخیلدی چوبالور بشیکده اصغر
سورودن قوزوم چیخیلدی، چوبالور بشیکده اصغر
سویگولوم آغرون آلیم یات
من سنه لایلای چالیم یات
..
..
وای منی گؤزدن آتان وای، یوز گوزی قانه باتان وای
سینه مون اوسته یاتان وای، یوز گوزی قانه باتان وای
گوز یاشین قانه قاتان وای ، یوز گوزی قانه باتان وای
سویگولوم آغرون آلیم یات
من سنه لایلای چالیم یات
..
..
چاره سیز درده دچارم، یاندیم الله یاندیم الله
طاقتیم یوخ بیقرارم ، یاندیم الله یاندیم الله
بیر سنه امیدوارم ، یاندیم الله یاندیم الله
سویگولوم آغرون آلیم یات
من سنه لایلای چالیم یات
..
..
ای منیم پوزقون ستارم، صبر إئله آخما بشیکده
یوخ الیمده راه چارم، یوزومه باخما بشیکده
آچ گوزون ای ماه پارم، یاندیروب یاخما بشیکده
سویگولوم آغرون آلیم یات
من سنه لایلای چالیم یات
..
..
سن منی گؤزدن سالوبسان، إئتمرم سندن گلایه
اوچ گوندی سوسوز قالوبسان، اولمادوم من سنه دایه
چاره می الدن آلوبسان، عمرومی وئردون فنایه
سویگولوم آغرون آلیم یات
من سنه لایلای چالیم یات
..
..
یانورام دل آشمادون سن ، ای منیم سرباز عشقیم
بوینوما دولاشمادون سن، اولاسان همراز عشقیم
قاباقیمدا قاشمادون سن، ای منیم شهباز عشقیم
سویگولوم آغرون آلیم یات
من سنه لایلای چالیم یات
..
..
#اصغریه #نخستین #اصغریه_شهادت #ترکی #زبدةالاشعار