عمه ندن بو نوعیله بی اختیار آغلار گوزون #غارت_خیام_صافی_تبریزی

زبانحال جناب سکینه در غارت خیمه گاه
..
..
مرحوم صافی تبریزی
..
..
عمه ندن بو نوعیله بی اختیار آغلار گوزون
آغلار گوزون قربانیم آیا نه وار آغلار گوزون
..
..
جاری ایدیرسن گوز یاشون باعث ندور چون سیل سن
بو کاروان محنته سن عمه جان سرخیل سن
بیزدن آلان زیورلری بیرجه بُیور بس نیلیسن
گورم که سن آلدوقجا چون ابر بهار آغلار گوزون
..
..
گوشواره مه آلی ویرما چون بو اعتباریمدور منم
بو اکبر شهزاده دن بیر یادگاریمدور منم
بو خردا قیزلار ایچره بیل عزّ و وقاریمدور منم
یوخسا ئولوبدور اکبریم ای غمگسار آغلار گوزون
..
..
عمّه مسافرسن مگر یوخ صبر و آرامون سنون
آراموی الدن آلوب هجر دلارامون سنون
شاه جهان یوخسا ئولوب وار اوزگه انجامون سنون
وجهی اودور بیچاره سن بیچاره وار آغلار گوزون
..
..
گویا چالولّار اهل کین طبل بشارت عمّه جان
ئولموب بابام تاپمیش ندن دشمن جسارت عمّه جان
بس بو ندور کیم خیمه نی ایلله غارت عمّه جان
سنده گورورسن قالمیوب بیر کیمسه یار آغلار گوزون
..
..
عمّه سنی تاری اؤزون گل آشکار ایله غمون
بولسم اگر من مطلبون باللهی اوللام همدمون
بیر طرزیله اظهار ایدر بو اشک چشم پرنمون
لیکن بولونمز کیم نیه بو نوع خوار آغلار گوزون
..
..
بولّم گروه کینه جو ایمدی اسیر ایلر بیزی
اوُل قدری ظلم ایلر بیزه کیم ظلم سیر ایلر بیزی
دوران پیرین خرد کن تدبیری پیر ایلر بیزی
آیا دیمیر سن بس ندن بی اختیار آغلار گوزون
..
..
آخر بو میداندا نه وار هر کیم گیدر گلمز گیرو
عمه نه قارداش نه آنا نه بیر عم اوغلی نه عمو
گورموش سوسوزلوقدان گلوب نی تک سسه جام سبو
بلکه سببدور ایلمز صبر و قرار آغلار گوزون
..
..
ایسته بو شعره «صافیا» اجر جزیل اللهدن
چوخ سوزی وار دیشره گلوب چون قلب آل اللهدن
آغلا دمادم اشگ توک ال چک سحریر آهدن
بیر اوزگه حقّی حقّدن عقباده وار آغلار گوزون
..
..
#غارت_خیام #صافی_تبریزی #ترکی #زبدةالاشعار