در مراتب و مصائب حضرت زهرا (س)
.
.
شاهی اردبیلی
.
.
الهی بیلورسن که لیل و نهار
نفسدن یاخین منده بیر نفس وار
بو نفس ایلیوب روحومی شرمسار
الیمدن گئدوب عزّت و اقتدار
باشیمدان دوشوب تاجیم ای شهریار
.
.
کرم قیل سن ای دولت هاشمی
آلیم تاجیمی یا وئریم باشیمی
او تاج ایلیوب قان بو گوز یاشیمی
او تاج اولماسا آت منیم داشیمی
او تاجه تبارک دیوب کردگار
.
.
دییشدی زمان چهره می ای حکیم
یوزوم ائتدی تغییر ئوزوم ائتمدیم
داخی بسدی فکر زر و فکر سیم
نچه گونده دین فکری وئر ای رحیم
دییش حالیمی تا اولوم یاره یار
.
.
او فرزانه شیخین یوزی اولسون آغ
که بیر گون بویوردی ای اهل فراغ
زمانه کولک دور وجودون چراغ
چراغون که سوندی نه گلشن نه باغ
نه سیر و سیاحت نه یار و دیار
.
.
باشون قوزانوب عرشه گر باش چکه
او باشه فلک یدّی تاس نور توکه
گوزتلور گینه اول باشی مهلکه
باشین وارلیقی باغلی دور بیر توکه
تو که اهل عقل ایلمز اعتبار
.
.
دیوردی بیری کاش اولا امکانی
آلام ملک رومی اولام سلطانی
دوشوب سجدیه گوردی بیر بستانی
نه روم، آتدی گوزدن بوتون دنیانی
قازاندی او بیر سجدہ دن مین وقار
.
.
ایتیردی بیر آرپا قیزیل بیر نفر
گزنده اونی تاپدی بیر گنج زر
ایتیرسنده مس عمروی تاپ گهر
گھر، فاطمه لطفی دور ای بشر
تاپار باب زهراده انسان عیار
.
.
نه زهرا، دعا عرشینین زیوری
کسا اهلی نین جانداکی جوهری
یرین اعتباری گویون لنگری
پیمبر قیزی مرتضی همسری
نمازه شرف، سجدیه افتخار
.
.
اونون آستانین اؤپن ماه دور
اونی وصف ائدن قل هو الله دور
اونون درگھینده گدا، شاه دور
اونون قلبینین قسمتی آه دور
یتیشمز اونون آهینه ذوالفقار
.
.
اونون کولگه سین ایلیوب کعبه، نور
همایون وجودی سالوب عرشه شور
ائدوب قلبینین گوزگیسینده ظهور
کریم و رحیم و ودود و غفور
امام و پیمبر بهشت و بهار
.
.
اونون ائتدیلر گرچه عمرین آجی
سینوب آی که اولسون اونون نیم تاجی
او درک ایلیوب سجده ده معراجی
اونون درگهین اؤپسون اولدون حاجی
او درگاهه که وردی اود، اهل نار
.
.
او خاتون ایاقین قویاردی هارا
گل ایستردی گلسین دوشنسین اورا
گلون دردی دَیسین گوروم مسمارا
نه مسمار او نادان مسلمانلارا
که جان قبله سین ائتدیلر بیقرار
.
.
ائشیتدیم دیوردی قاپی دیوارا
نجه روح قرآنه ووردوخ یارا
اوتوز جزو قرآن هارا، بیز هارا
نه عرض ایلروک حشرده قهّارا
بیزه عار اولا، عار اولا، عار، عار
.
.
او قدری اونا وئردی امّت عذاب
که چوخ گوردی آز عمرین اول مستطاب
یوموب آچمادی گوزلرین اول جناب
على هی دئدی فاطمه وئر جواب
جواب اولمادی آغلادی زار زار
.
.
دوباره دئدی یار غمگین، یارا
گوز آچ زینبین بیرده زلفین دارا
اولاندا حسینون نشان اوخلارا
او زلفیله باغلار قیزون چوخ یارا
دور اول زلفه تاپشیر سوزون ای نگار
.
.
#فاطمیه #شاهی_اردبیلی
#فاطمیه_مدح #فاطمیه_شهادت
#الهی_بیلورسن_که_لیل_و_نهار
#ترکی
#زبدةالاشعار
نظر دهید