زبدةالاشعار

امر ایلدی سجاده او گون خالق عزت #دفن_شهدا #ذهنی_زاده

دفن شهدای کربلا
.
✍️ زبدة الاشعار ✍️

?: @nohe_torki

مرحوم ذهنی زاده (سائل)
.
امر ایلدی سجاده او گون خالق عزت
قبر شهدائیله او دشته ویره زینت
.

هر چند گلوب قبره قویا اهل مدینه
شه دفنی ولی حقدن اولوب امر علیمه
گلدی اودی قربانگه اولاد خلیله
بوینوندا اگرچه واریدی قید اسارت
.

باخدی او بلا دشتی گوروب گلشنه بنزر
قاندان گل آچان یاره گل سوسنه بنزر
عرض ایتدی بابا هانسی یارالی سنه بنزر
گل تک بدنوندن نه نشان وار نه علامت
.

لازمدی کفن گوردی شهنشاه قتیله
لایق کفن آختاردی او بی مثل و بدیله
دنیا بویی نسگلدی بو غم آل خلیله
بیر پاره حصیره ایده ناچار قناعت
.

یغدی او حصیره آتانین پاره وجودین
گتدی کسیلن اللرینی دست ودودین
تاپدی او کیچیک بارماقینی منبع جودین
دفن اولمیه ناقص بدن علت خلقت
.

اول قبر که اولموشدی معین شه دینه
قبره او حصیریله قویولدی او دفینه
هر ذره سینین قیمتی عالمجه خزینه
عالمدن اوزی اولماسا چوخ آزدی بو قیمت
.

باخدی او دفینه در رخشانی چوخ ایستر
قنداق دولوسی لعل بدخشانی چوخ ایستر
بلموشدی حسین اصغر عطشانی چوخ ایستر
ویردی آتا آغوشینه یاتسون بالا راحت
.

گوردی آلوب آغوشینه خورشید سهیلی
بلدی نه گوزل گلدی ربابین اله میلی
بو باره ده ایستوب که ملول اولمیه لیلی
بیر قبر ایاق آتدا درست ایتدی او حضرت
.

شهزادیه اوز شانیله لایق ایدوب اعزاز
بلدی شهداده هامودان اکبری ممتاز
شاهون ایاقی آتدا قویوب ایتدی سرافراز
یوخ عرش خداده او ایاق آتداکی رفعت
.

متن پیشنهادی:  علی جان بالا لبیک لب عطشان بالا لبیک #اکبریه

خلق ایتمز اولار که بیرینین مثلینی بی چون
اوچ پاک وجود اولدی او بیر قبریده مدفون
فخر ایتدی او شش گوشه مزاریله او هامون
اولماز دیدی بیر یرده بو عزت بو جلالت
.

فارغ آتا دفنیندن اولوب حضرت سجاد
یازدی اوز الیله آتاسی قبرینه بیر آد
بو قبر حسیندور که اولوب کشتۀ بیداد
بیر ایله حسینی که سوسوز اولدوروب امت
.

مشهوریدی سجاده هامی باطن و ظاهر
دربان گوروب ایستر ایله بیر درگه طاهر
زیبنده دی درباره حبیب بن مظاهر
ویردی اونا بو منصبی، آرتوردی شرافت
.

باخدی او تراب اوسته توکولموش شهدایه
بنزر هاموسی گوردی گونه اولدوزا آیه
سالماز دیدی گوی هیچ بیروزون مثلینه سایه
هر گون یر اوزون دولدورا گر اهل شهادت
.

بو جمع بویوردی هامی بیر جمعیده بیردی
پروانه دی، هر یتمیشینین شمعیده بیردی
جان بیر، قانی بیر، مسلکی بیر، شرعیده بیردی
بیر قبر ایدر بیر بیله بیر جمعه کفایت
.

بیر گنجده قویدی بیر ایله جوهر عشقی
بیر رشتیه دوزدی اور قدر گوهر عشقی
بیر قبریده دفن ایتدی هامی جوهر عشقی
یعنی بودی معنای مساوات و اخوت
.

حسرت گوزیله دوندی فرات اوستونه باخدی
باخجاق یوزه گوز چشمه سی دریا کیمی آخدی
یاندوردی جهانی شرر آهینه یاخدی
قالدی دیدی سو اوسته سینان کشتی صولت
.

ایلوب تبعیت هامی اول خضره دلیله
یوز قویدی هامی مصرع سردار قتیله
گورجک عمو نعشین چوخ اثر ایتدی علیمه
الله عموم عباسه بویوردی ایده رحمت
.

مثلی عمومون عالم امکاندا تاپولماز
حقی نه آنام فاطمه بوینوندان آچلماز
هیچ بیر گله بیر بیله جفا خاری ساچلماز
هیچ پیکره دگمز بو قدر زخم و جراحت
.

متن پیشنهادی:  قالمیشام عراقده ، دردِ بی دوایه گل #کاظمیه_نادری

ایتدی عموم عباس آتاما ایله مواسات
بیر قارداشا قارداش او مواسات ایده هیهات
عالمدی اونا عالم اسرار خفیات
ایلر شهدا غبطه، ایدن اجر کرامت
.

بیر قبر همان یرده او سقایه قازلدی
نه قبر، فرات اوستونه پیرایه قازلدی
پیرایه دیمه غم ایوینه پایه قازلدی
گیت قبرین اوزون گور سنه شرح ایلیه محنت
.

بیر دوغرانانون همت دیرینه سی اوسته
یوز لعلینی جمع ایلدی گنجینه سی اوسته
قویدی کسیلن اللرینی سینه سی اوسته
زهرایه او اللردیله اسباب شفاعت
.

قویدی عمونی قبره دونوب قبرینه یازدی
بو مرقد عباس مه ملک حجازدی
دنیا بویی قان آغلیه هر گوز بونا آزدی
یاتدی او کیچیک قبریده ایله اوجا قامت
.

یغدی هامی خندان گل گلزار وفانی
بیر گلشنه دوندردی همان دشت بلانی
سولدورماز او گلزاری بیر آفات خزانی
هر آفت او گلزاره ویرر تازه طراوت
.

قورتاردی یانار قلبیله دفن شهدانی
ترک ایلدی آغلار گوزیله کرب و بلانی
بهت آتشینه یاندوروب اول جمع وفانی
بیر طرفه العین ایچره ایدوب کوفیه عودت
.

گوردی نجه کوفه هامی بام و هامی برزن
مملو جماعتدی ولو مرد اولا یا زن
گویا هامونون علقه کسوب روحی بدندن
یوخ بیر نفرینده نفسین چکماقا قدرت
.

گویا که قیامتدی جماعت هامی حیران
هر کس اولوب اوز ایتدیقی اعماله پشیمان
یا ایها الانسان دیه سن سسلوری رحمن
محشر تک اولوب کوفه عجب وادی حیرت
.

متن پیشنهادی:  آچدی چو شاه تشنه لبان قان دولان گوزون #حسینیه_صافی_تبریزی

زینب دانشور ایله اثر واردی سسینده
بیر ذی نفسین یوخدی سس اصلاً نفسینده
هر عالی و دانی وار ایشیتماق هوسینده
بیر کلمه دن اولمور ایده بیر کیمسنه غفلت
.

جلب ایلیوب اوز صحبتینه خاص و عوامی
هر کلمه سی بیر شرح حقیقتدی تمامی
بیر لهجه ده ایلور خانم انشاد کلامی
گویا که علینین اوزودور ایلوری صحبت
.

سرگرمیدی حینی که خانم شرح و بیانه
ویرمیشدی تکان صحبتی هر پیر و جوانه
بیردن هامی گوز دوندی باخوب نوک سنانه
بیر باشی گوروبلر که ایدر آیه تلاوت
.

گرچه نچه گوندور آییروبلار بدنیندن
ایمدی دیه سن گل دریلوب شاخۀ گلدن
آلوده دی خاکستره رخساری ولیکن
آرتورموش او خاکستر او رخساره ملاحت
.

داوودی سالوب حیرته آواز حجازی
دعوت به حقیقت ایلوری اهل مجازی
عیسایه نشیب اوجی ایدوب دار فرازی
بو اوج مسیحایه اولوب مایۀ حسرت
.

کهف آیه سینی ایله اوخور ناطق قرآن
معناده قویوب کهف رقیم اهلینی حیران
ایلور هامویه حقینی اعجازیله اعلان
تا عذر یری قالمیه اتمام اولا حجت
.

#ذهنی سنی مشغول ایلیوب فکر و خیالون
چوخداندی که آخمازدی سنون طبع زلالون
الله گوتوره دلده کی اندوه و ملالون
توفیق اولوب آخرده سنه رحلت آیت
.

هر اهل کلام اهل حدیث اولسا و یا غیر
دفن شهدا نظمینه گر ایستیه بیر سیر
ارشاد ایلیوم من اونی درک ایلیه تاخیر
#صافی یازان اشعاریده وار اوزگه فصاحت (1)
ــــــــــــــــــــــــ
(1) متن نوحه مرحوم صافی :
#حق_ایستدی_بیر_نوعیله_دفع_محن_ایتسون

.
#دفن_شهدا
#امر_ایلدی_سجاده_او_گون_خالق_عزت
#ذهنی_زاده
#ترکی
.
✍️ #زبدةالاشعار ✍️

?: @nohe_torki

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی