خروج از مکه
#گریز به مصائب در راه کربلا و #راه_شام
.
✍️ #زبدةالاشعار ✍️
.
🆔: @nohe_torki
.
مرحوم یحیوی اردبیلی
.
ذیحج آیینون سگّیزی ایش مشکله دوشدی
ائو صاحبی اَل چکدی ائویندن چوله دوشدی
ترک ائتدی حجازی یولا بیر قافله دوشدی
دروازه ده چاووش اجل دوشدی قباقه
یول باشلادیلار گئتمگه صحرای عراقه
.
.
عفریت جهان باشه قرا معجری سالدی
یعنی گئجه نون عالمی آفاق قرالدی
گویده سیخیلوب پارچا بولوط گوشه ده قالدی
چوخ صاف چوخ آرامیدی صحرانون هواسی
ترس آوریدی کوهلرون دور نماسی
.
.
نه سس نه صدا وار نه ندا دشت و بیابان
چکمیش فلکه باش او جبال عربستان
مکه چولینون قوملاری دریا کیمی لرزان
آتلار ایاقی آلتدا خاریلداردى او قوملار
اولدوز ایشیقی آلتدا پاریلداردى او قوملار
.
.
سسلندی حَرا داغی او دم کهف وفادن
آواز بلند اولدی داخی کوه منادن
بیت الحرم و مشعر و زمزمله صفادن
آخر گئدیشون اولدوقینا سرعت ائدورسن
خوش گلدون حسین ایستدیگون یولدا گئدورسن
.
.
ای جدّیمون اصل وطنی خانۀ معبود
ای شاه ولایت آتاما منزل مولود
ای مکّه خدیجه آناما مرکز مقصود
آیریلدی حسین گئتدی خداحافظون اولسون
اوز مقصدینه یتدی خداحافظون اولسون
.
.
زینب اوتوروب تخت روان اوسته موقّر
اطرافینی آلموشدی جوانان هنرور
اجلالینی آرتیرمیش اونون آلتی برادر
نجدی دوه لر سو کیمی یولّاردا آخوردی
زینب دولانوب مکّیه حسرتله باخوردی
.
.
اشرافی عمارتلری درک ائتدی اوزاقدان
ظلمت بورویوب یوخدی اثر شمع و چراغدان
هر دم گورونور ذرّه ایشیق بعضی اتاقدان
بو منظره دن قلبی اونون نسگله گلدی
اول شهره خطاب ائتدی او خاتون دیله گلدی
.
.
ای مرکز وحی ازلی مهبط جبریل
وی مولَد ختم نبوی صاحب تجلیل
دروازه سی پروازگه طیر ابابیل
ای حضرت ابراهیمون ارزشلی مقامی
مشهور اولان ای مذبح اسماعیله نامی
.
.
ای دوره ده کی باش باشا چاتمیش اوجا داغلار
وی بو گئجه نون عالمی یاتمیشلار اویاقلار
ای حجّده لبیک دین زنده دوداقلار
ای حاضر اولان مقتل اضحیده فدالر
وی جامه ی احرامده مشغول دعالر
.
.
ای صحنه ی جانبازی بدرون شهداسی
وی جنگ احدده بابامون عضو جداسی
ای حمزه نون اسلامده تکبیر صداسی
شاهد اولون هنداوغلی جفا فرصتین آلدى
اللهون ائویندن بیزی چولدن چوله سالدى
.
.
وقتیکه اولور محکمۀ یوم قیامت
اوردا قورولار حُکمه ترازوی عدالت
سیز اوندا وئرون مالک دیوانه شهادت
اسلامه یزیدون ستمی ریشه کن اولدی
ریحانۀ اسلام جلای وطن اولدی
.
.
چوخ تند گئدور قافله آسوده و آرام
منزللری طی ایلدیلر تا سحر آخشام
زینب بیر امیدیله ائدردی اورگین رام
بیر کوفه ده که بش ایل اونون حکمی یروردی
بو گئتمگی گویا او گونه مثل گوروردی
.
.
ناگاه ایکی مرد عرب اولدی نمایان
مکه طرفین قصد ائلیوب تند و شتابان
احضار ائلدى اونلاری سلطان غریبان
فرمایش ائدوب هاردان ائدوبسوز سفر آیا
عرض ایلدیلر کوفه دن ای سرور بطحا
.
.
حضرت سوروشوب کوفه ده آیا نه خبر وار
عرض ایلدیلر آلما خبر خوف و خطر وار
یوخ خیر اثری کوفه ده چوخ فتنه و شر وار
#مسلم طرفیندن باشون ای شاه سلامت
تنها دایانوب نوش ائلدى جام شهادت
.
.
بو اوّل ماتمدو سر راهده دوردی
زینب او بیاباندا عزا مجلسی قوردی
اوراق بلا دفترینی بیر بیره ووردی
آینده سینی گوردی او بانوی دل افکار
بو فاجعه دن بولدی که باشینده نه لر وار
.
.
ذیحج آینون تا ایگیرمی یدّیسی اولدی
گون ایستیسی گرمای عطش دللره دولدی
اهل حرم آشفته نوب گل کیمی سولدی
افسرده لنوب حالت مردان سلحشور
حتی یئریمک اولمادی حیوانلارا مقدور
.
.
فرمان یتوب عباسینه میراب سفردن
مین طشت مس اندیردیله کوهان شتردن
دشت عربستاندا اونی دوزدیله یئردن
سو مشک لرین آچدیلا سو توکدیله طشته
لب تشنه لرون یتدی الى نهر بهشته
.
.
آتلار دوه لر ایچدی ازل آب گوارا
خوردا بالالار اوندان اولوب سیر من الماء
سیراب اولوب آخرده زن و مرد سراپا
مرسومدی بو گونده اودور طشت گذاری
احبابی ائدر سو یئرینه گوز یاشی جاری
.
.
ظهریدی همین قافله ی مرگ حمایل
ناگاه اولوب لشکر #حرّیله مقابل
طوفانه طرف گئتدیله ال وئرمدی ساحل
گرچه اولاری حر، بلا بحرینه سالدى
بعدا آیلوب گلدی وفا رتبه سین آلدی
.
.
تا شهر حرامون ایکیسی کرب و بلاده
فُلک شهدا لنگر آچوب بحر بلاده
وئردیله بو جریانی خبر ابن زیاده
سعد اوغلونا امریه ی لشکر کشی اولدی
پی در پی او صحرایه قشون سیل کیمی دولدی
.
.
القصه شب قتل کئچوب اولدی سحرگاه
میداندا صف آرالوق ائدوب لشکر گمراه
مردان خدا پرچم آچوب با دل آگاه
حر و وهب و مسلم و فرزند مظاهر
انصار و مهاجر ائدوب حمله متواتر
.
.
اوز سینه لرین آچدیلا پیکان اورا دگدی
باش وئردیله تا خنجر برّان اورا دگدی
قول وئردیله شمشیر شتابان اورا دگدی
هر تک تکی آتدان یخلا قلبی أسردی
گوردوکلری منزللره روحی تله سردی
.
.
بیر عاشق أولا ایستدیگی یاری اوزاقدا
دلدار ائوینه عزم ائده عشق عطری دماغدا
بو یولدا تیکان نیزه سی سانجیلسا ایاقدا
بارماقینه داش دگسه داشون قهرینی بیلمز
مستغرق اولان عشقه تیکان زهرینی بیلمز
.
.
چون خانه ی دلداره گئدوردی شهدالر
بیلمزدیله دگدی هارا شمشیر جفالر
مثل اینکه دگور تخته نون اوسته او یارالر
هر فرد شهیدی که آت اوستن یئره دوشدی
قویدی قدمین خانه ی محبوبه یتیشدی
.
.
ظلم ایلدی سعد اوغلی مرامینه یتیشدی
دین اوسته حسین ئولدی مقامینه یتیشدی
نوبت او شهون أهل خیامینه یتیشدی
یاندی شرر خیمه سماواته دایاندی
زینب چکه بیماری کنار اوتدا دولاندی
.
.
فکریم او دگل شرح ائلیوم قصه ی غارت
زینبدن أئدم ایستییورم وصف رشادت
گور وار نقدر بو خانم عورتده شهامت
برّنده بیاناتیله مجلس لر ایچینده
تا ایلدی تاریخ حسینیه نی زنده
.
.
اعجاز حسین نطق و بیان مه علیا
حقّى ائلدی کوفه و شام اهلینه القا
اعجاز حسین دیرده یوللاردا هویدا
هر شهر ده مجلسده بیانیه ی زینب
کشف ایلدی اشخاصه ندور واقع مطلب
.
.
بیر گون سفر شامده گون اورتا زمانی
شام اهلی گوروب شدّتیله گرم هوانی
اندیردیله صحرایه شتردن اسرانی
لشکر توکولوب خیمه قوروب کولگه ده یاتدی
خوردا بالالار چولده قالوب باش باشا چاتدی
.
.
بار و بنه سین باغلادی کوچ ایلدی لشکر
یاتمیشدی مغیلان دالسیندا بالا دختر
یاددان چیخوب اول قافله دن قالدی عقب تر
آچدی گوزینی گوردی او لشکردن أثر یوخ
نه قافله دن عمه و خواهر دن اثر یوخ
.
.
بیر قورخولو صحرادی نه آب و نه علف وار
نه دهکده و کلبه و سامان و طرف وار
نه کرب وبلا عرصه سی تک راه نجف وار
بیراهه بیاباندی دگل مسکن انسان
گزمز او بیاباندا مگر غول بیابان
.
.
به به نئجه جرئتلودور أولاد محمد
اگلشدی او خوردا بالا یول اوسته مجرد
بی دغدغه بی واهمه تسلیم سرآمد
آغلوردی فقط عمه لرین آیریلقیندان
پاینده اولان همسفرین آیریلقیندان
.
.
دقتله ازل بیر قباقا بیر دالا باخدی
اوندان صورا دوندی صاقا دوندی صولا باخدی
زلفین گوزی اوستن آیروب دوز یوللا باخدی
دور دی او قدر که واریدی قدرتی قاچدی
آخر یورولوب یئرده اوتوردی باشین آچدی
.
.
یوز دوتدی اولار گتدیگی سمته دئدی گویا
ای فاطمه خواهر بی بی زینب آنا لیلا
قویدوز ندور علت منى بو دشتده تنها
سنّیم نه اولار آزدی شریک غموزم من
ماتمزده یم غمزده یم همدموزم من
.
.
اینجیتمیشم أولما سیزی قربانلاروز اوللام
قویدوز منی گئتدوز قاچورام یولدا یوروللام
گئتسم سیزیله شامده ویرانه ده قائلام
عهد ایلمیشم سیز ائلین وقتده رجعت
ویرانه مکانیمدی یوخومدور سیزه زحمت
.
.
عرض ائتدی بابا سن نیه سالدون منی گوزدن
نازلو قیزووام سهلدی یول یولداشوام من
قوی منده گلوم تا یتیشوم گئتمه دایان سن
سس وئر سسیمه ای بابا بیر طفل صغیرم
تنها و غریبم ده یتیممده اسیرم
.
.
بو ناله نی یئللر سر مظلومه یتوردی
سانجیلدی بُن نیزه یئره گئتمدی دوردی
رأس شه دین لبلرینی بیر بیره ووردی
من گئتمرم ای زینبیم ای مونس ماتم
تا گلمسه چولده قالان آواره رقیم
.
.
دوشدی بو حکایتدن او دم لشکره وحشت
سعد اوغلینا وئردیله خبر قوم شقاوت
محکم دایانوب رأس حسین واردو بیر علت
لشکر اُمراسی یغشوب قوردیله شورا
سجّاد دن ائتدیله بو اسراری تقاضا
.
.
حضرت گلوب اول نیزه قباقینده سلامه
دقتله نظر سالدی سر پاک امامه
گوردی باخور حیران عقب جاده ی شامه
کیپریک لرینی بیر بیره هردم وورار آغلار
یعنی اسرادن دالی چوللرده قالان وار
.
.
کشف اولدی عمر سعده همین وقفه ی مستور
زجرابن شقینی ائلدی بو ایشه مأمور
آت سالدی غضبله دالى سمته أو جفاپور
راوی دیور اول ظالم بی رحمی تانوردوم
منده اونیلان دوش به دوش اسب چاپوردوم
.
.
آتلار که تکاپویه گلوب تند و شتابان
سچراردی یئرون قوملاری هم برق اولو تابان
زجر آلمیش اله قمچی غضبناک و خروشان
بو حالیله بیر وقت مفصل آتی چاپدی
آخرده یتیشدی او خانم دختری تاپدی
.
.
گورجک بیزی اول خورداجا قیز دوردی ایاقه
اللر سینه ده وئردی سلام گلدی قباقه
بیر قوش نئجه باغدا سیخیلور شاخ و بوداقه
گوردی منی چون عاطفه لی بلبل زهرا
گیزلندی منیم مرکبیمون سینه سی آلتدا
.
.
زجر ایستدی وورسون او قیزی ایلسون آزار
من مانعی اولدوم دئدیم أی ظالم و غدار
صحراده قالوبدور بو اوشاقدا نه گنه وار
تقصیر سیزوندور بو بلاکش لری سویدوز
یاددان چیخادوب کوچ ائلینده دالی قویدوز
.
.
گل ترکیمه عرض ایلدیم ای نوگل زهرا
فوراً یتوروم قافلیه من سنی قورخما
نامحرم آتین سؤیلدی من مینمرم اصلا
مرکبلروزی سیز نئجه سورسوز ائله گلّم
یا عمه لریمه یئته رم یا قالوب ئولّم
.
.
گوردوم که قبول ائتمدی چوخ ایلدیم اصرار
سوردوک او زمان یورقا یئریش آتلاری ناچار
آتلار قدمیله او ستمدیده دل افکار
سرعتله پیاده او بیاباندا قاچاردی
قوش تک باجی قارداشینون عشقیله او چاردی
.
.
گوردوم یاری یولدا یورولوب اگلشوب آغلور
اوز دامنینی پارچالیوب عالمی داغلور
قانین ایاقیندان قورودوب یاره نی باغلور
بو حالیله فکر ائتدیم او قیز یول گئده بیلمز
سالم یتیشوب قافله نی درک ائده بیلمز
.
.
گوردوم ایاقین باغلادی دوردی یولا دوشدی
یاددان چیخادوب یاره لرین قوش کیمی اوچدی
بیر لحظه ده اردوی ستمکاره یتیشدی
زینب قباقا قاچدی اونا تسلیه گویان
گلدون بالا دلسیز بالا عمون سنه قربان
.
.
#ذیحج_آیینون_سگیزی_ایش_مشکله_دوشدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید