اهل کوفه گوردیلر بیر کاروان غم گلور #کوفه_ثریا_تبریزی

کوفه
.
#زبدةالاشعار
.
: @nohe_torki
.
مرحوم سید احمد یاسر نجفی ( ثریا تبریزی )
.
اهل کوفه گوردیلر بیر کاروان غم گلور
زینب کبرا حسینه ساخلیوب ماتم گلور
.
.
زادۀ مرجانه دن بیر حکم اولوب عالم یانوب
بو مصیبتده نه یالقوز زینب کبری یانوب
قلب هاجر خاطر انسیّۀ حورا یانوب
زلفینی سارا یولار هم شیونه مریم گلور
.
.
بی حیالر ایتدیلر بیر مجلس عشرت بنا
قوردولار اسباب نردی ظلمیله اهل جفا
حکم ایدوب گلسون گرک بو بزمه آل مصطفی
آه او دمدن عترت پیغمبر خاتم گلور
.
.
باخدی زینب مجلسه گوردی دوروب بیگانه لر
شمعه یاندوردی اؤزون گورجک یانان پروانه لر
سالدی غملی خاطرینه اوزگه بیر غمخانه لر
گیزلنوب عورت لر ایچره گوردی نامحرم گلور
.
.
زادۀ مرجانه بو اوضاعیدن آلدی خبر
کیمدی بو عورت که عورتلر ایچنده گیزلنر
دیدیلر بنت علیدور زینب خونین جگر
سرّی وار گوز یاشی گوزدن صورته هر دم گلور
.
.
زینبین آدین ایشیتدی سویلدی گور کیم نئدوب
شکراولا خلّاق عالم سیزلری رسوا ائدوب
زینبین کلاً قرار و طاقتی الدن گئدوب
غصّه اوستن غصّه پی در پی غم اوستن غم گلور
.
.
سویلدی لال اول شقی اولاد پیغمبر بیزوق
زهرۀ زهرا آنامدور زادۀ حیدر بیزوق
جمله اهل کایناته هادی و رهبر بیزوق
باش آچوب حوّا یانیمجا حضرت مریم گلور
.
.
فانیدور دنیا «ثرّیا» عمریده یوخ اعتبار
چوخ عزیزی عاقبت ناکام ایدوب بو روزگار
بو یولی چوخ طی ایدرعالمده هرخرد و کبار
کاروان مرگ بیری آخربیری اقدم گلور
.
.
.
.
#کوفه_ثریا_تبریزی
#اهل_کوفه_گوردیلر_بیر_کاروان_غم_گلور
#ترکی
.
#زبدةالاشعار
.
: @nohe_torki