اوخلار آلتیندا داغلمیش نقشۀ ایمان حسین وای #حسینیه_هادی_تبریزی

جوهر عشق و ولایت
.
.
مرحوم هادی تبریزی
.
.
اوخلار آلتیندا داغلمیش نقشۀ ایمان حسین وای
قانیله قرآنه ویرمیش جان جاویدان حسین وای
.
.
قاف وحدتده پر آچمیش مرغ سیمرغ حقیقت
نخل خلقت شاخه سینده آشیان آدمیّت
قانیله توپراقلار اوسته نقش ایدن تصویر عزّت
صورتاً صورت نمای خالق منّان حسین وای
.
.
تربت پاک و شریفی هر گورن گوز توتیاسی
سینه لرده شور عشقی اهل عشقین کیمیاسی
هر مریض نیمه جانون کربلا دارالشّفاسی
دردمند درد عشقه واقعی درمان حسین وای
.
.
شهپری سینمیش هما تک اوج وصلتده پر آچمیش
پارلانان گوندن یوزوندن پارلانان گون رنگی قاچمیش
سینه سی اوستونده اوخلار قانلی قانلی لاله ساچمیش
لالۀ نعمانه بنزر لالۀ نعمان حسین وای
.
.
گیدیرن خلقت لباسین جسم کُلّ کائناته
ایلیین امکانی امکان ممکناتی ممکناته
جان ویرن لب تشنه امّا باخمیین آب فراته
خضره ظلمتده سراغ چشمۀ حیوان حسین وای
.
.
اوّل بی ابتدایه ابتدای بی هدایت
بی نهایتده نهایت حجم مرز بی نهایت
قلبینه اوچ شعبه بیر اوخ نقش ایدن نقش ولایت
حامل پیک وصالی تیغۀ پیکان حسین وای
.
.
جلوۀ نور جمیلی ذات وحدت انجلاسی
هر یارانمیشدا یارانمیش جوهر عشق ولاسی
قانلی توپراقه بو یانمیش صورت ایزد نماسی
مظهر ذات صفات ایزد یزدان حسین وای
.
.
سیندیران طوفان بدعت شاخ و برگین قول بوداقین
یاد محبوبیله قویموش توپراقا قانلی دوداقین
نیزه دن عطشان بوغازی جبرا آلموش سو سراقین
جبر و تفویضه دلیل و منطقی برهان حسین وای
.
.
نیزه لر جسمین داغتمیش گوز گوز آچمیش خانه خانه
خانه خانه یاره گوز گوز آغلین قان یانه یانه
یانه یانه یاره لردن داش اوتورموش دانه دانه
سنگسار اولموش داش آتدا پیکری پنهان حسین وای
.
.
قان چولوندن قان بولودلار قانلی دریایه چوکولموش
قان یاغیشلار قان بولود دان قانلی دریایه توکولموش
قان یاغیشلار قان سئلینده آی سوکولموش گون سوکولموش
آیدان آرتخ گوندن آرتخ نور بی پایان حسین وای
.
.
باشی باشلاردان باش اولموش باشی باشلاردان باش آتمیش
باشلارا قانلی باشیله روح انسانلیق یاراتمیش
باشی باشلاردان باش اولجاق اوخ گلوب باش باشه چاتمیش
نیزه باشی گه کول اوستی باشینه سامان حسین وای
.
.
اگنینه قاندان گینموش جامۀ مهر و عطوفت
آنّینا داش یاره سیندن باشه قویموش تاج عزّت
شرع اسلامی دیریلدن شهریار با حنیّت
دفتر تاریخ دینه قرمزی عنوان حسین وای
.
.
اُولمیوب اُولمز اُولونمز دین حقّین پاسبانی
دین حقّین پاسبانی راد مرد جاودانی
قرنلر تاریخ دینون جان قاچتماز قهرمانی
قرنلر قلبینده روح و جوهر وجدان حسین وای
.
.
پنجۀ دیو و خشونت مهربان قلبین سیخانماز
قوپسا طوفان گلسه سیللر قلعۀ صبرین یخانماز
ویرمسه اذن واجازت جان جانیندان جان چخانماز
جانلارا جانلار یارتمیش هرجانا جانان حسین وای
.
.
اهل حق حقّی بولنمز آیری حق پیوسته سندن
عشق حق هرگز بوشالماز جام قلب خسته سندن
اوخلاری سیچمز آیرماز قزمزی گلدسته سندن
سینه سی اوخلاردان اولموش باغ و باغستان حسین وای
.
.
ای حسین ای مظهرالحق ای حق حقّه نشانه
حق گوزیله بیر نظر قیل «هادی» آتش بجانه
تازه دن شاید گتورسون صدقیله بیرده بیانه
اوخلار آلتیندا داغلمیش نقشّ ایمان حسین وای
.
.
.
#حسینیه #هادی_تبریزی #حسینیه_مدح #حسینیه_شهادت #ترکی #زبدةالاشعار