#ای_اوخ …
زبانحال حضرت اباعبدالله الحسین (ع) با تیر سه شعبه
.
.
.
مرحوم انور اردبیلی
.
.
اورکدن چخماقون ممکن دگل اینجیتمه جان ای اوخ
پرآچ ئوز آچدیقون بیر یاریه اول سایه بان ای اوخ
.
.
قرین عصر عاشورا زمان حدت گرما
فضای کربلانی ایستی دولدورموش بخارآسا
یرون ذراتینه تأثیر ایدوب مهر جهان آرا
کانه گون اولوبدور کورۀ آتش فشان ای اوخ
.
.
نچه شئ که موثر دور ایدر قلبه عطش ایجاد
ائدوب اجماع وجودیمده چکنموردوم نفس آزاد
دولانموردی دلیم آغزیمدا ائتسون کلمه نی ایراد
چوخیدی سن دگن یرده ولی سوز نهان ای اوخ
.
.
مثال عشق بنزر سهمگین پر موج دریایه
او دریایه همیشه قورخولی طوفاندی پیرایه
ضعیف عاشق قدم قویسا او بحر محنت افزایه
بفوری غرق اولار گورمز حیات جاودان ای اوخ
.
.
نجه پروانه ایستر شعله نی ئوز اختیارینده
فدای شمع اولوب پرسیز دوشر شمعون کنارینده
گرک عاشقده دورسون جان بکف کوی نگارینده
پر آچسون جانستان اوخدان یخلسون پرزنان ای اوخ
.
.
سنون بو گلمگونله وصلت جانان یاخونلاشدی
سروریمدن اؤرک پیمانه سیندن لخته قان داشدی
حقیقی عاشقه معشوق وصلی هر ندن باشدی
مقام عشقیده مطرح دگل سود و زیان ای اوخ
.
.
جبینیمدن توخانموشدی منیم بیر سنگ آهن دل
سیلوردوم کوینگیمله قانینی چوخ گرمیدی محفل
اؤرک آیینه سین گوردون کماندان ایلدون تعجیل
داغتدون قلبیمی اولدون کؤرکدن تئز عیان ای اوخ
.
.
الیمدن دوشدی شمشیریم بندندن طاقتیم گئتدی
تجلی گاه وحدتده حسین مقصودینه یتدی
توکولدی ایستی قان قلبیم بوشالدی روحیم حظ ائتدی
حسینیت گئدوب وحدت تاپوب جسم و روان ای اوخ
.
.
عجب موقع مزین ایلدون کاشانۀ عشقی
عجب موقع چخارتدون غنچه دن ریحانۀ عشقی
عجب موقعده روزن روزن ائتدون خانۀ عشقی
باخور هر روزنندن یاره یار نیمه جان ای اوخ
.
.
آتان بیلمور سنی دگدون هارا ای ناوک دلدوز
بیر آز بوندانصورا معلوم اولار بو درد عالم سوز
اوزون گون گیزلدر صحن سماده گورسنر اولدوز
نظامندن چخار گویا منظم کهکشان ای اوخ
.
.
سپاه کوفه فرض ایلور حسینون پرچمی یاتدی
یزیدی گورمیوللر منجلاب ذلته باتدی
شهادت کاروانیم عزتیله مقصده چاتدی
گئدنلر گوزلیور گلسون رئیس کاروان ای اوخ
.
.
منیع الطبع اولان عاشق محبت رشته سین قیرماز
قیریلسا قلبنون بندی دؤزر ابرویه خم وورماز
اوزون سندیرمیوبدور مرتضی اولادی سندیرماز
ارادم چوخ قوی دور سهو ائدوبدور اوخ ووران ای اوخ
.
.
آغیر تکلیفون انجامین قبول ائتمیشدوم اولده
بحمدلله عمل ائتدوم بو میقات مجللده
یاتوبدور پارسایان زمانه قلب مقتلده
اولاری سسلیور گلدوم بو قلب خونچکان ای اوخ
.
.
شریعت باغینون آب حیاتی بو آخان قاندور
ذخیره ائتمیشیدوم قان دگول سرمایۀ جاندور
بیر عشق آتشینیله نثار کوی جاناندور
حضور یاره یوخ بوندان گوزل بیر ارمغان ای اوخ
.
.
گزور قانلو گوزوم بیر جایگاهی قربی اعلادور
حسینه جان چخان وقتینده محراب و مصلی دور
نزول ظاهریم علت ترفیع معنادور
نقدری قوی آخور آخسون اؤرکدن لخته قان ای اوخ
.
.
فنا فی الله مقامیمدور منیم ذره خیالیم یوخ
لقای یاره مشتاقم بیر آیری ایده آلیم یوخ
پیمبر سیرت اوغلوم دوغرانوب دفنه مجالیم یوخ
اونون داغی چکیلمیش قلبی ائتدون سن نشان ای اوخ
.
.
کمانوندن چخان وقته پر آچدون سسلدون قان قان
نه تک قلب حسینی ایلدون چوخ قلبی سن شان شان
آنام زهرا گوزون یومدی بویوردی جان حسین جان جان
کمانون تک ائدوبسن فاطمه قدین کمان ای اوخ
.
.
گتوردون مژدۀ وصلی حریم حقه تاپدون یول
باخوب فرمان تقدیره گلوب دوز گئتمدون صاق صول
سن ای فولاد زهرآگین نقدری سخت سن سخت اول
هدف اما سنه نسبت اولوب چوخ مهربان ای اوخ
.
.
نسیم صبحی درک ائتسه یقین برگ سمن تیترر
اورک بیر عارضه تاپسا مسلمدور بدن تیترر
حسینون تیترمز قلبی چون عرش ذوالمنن تیترر
اقلا سن یرونده تیترمه ثابت دایان ای اوخ
.
.
سنی قلبیم باشیندا دسته گول تک من دولاندیرام
ثبوت عشقیمه عنوان ائدوب اغیاری یاندیرام
آتوب هر کیم قوی آتسون من چخارداندا اوتاندیرام
بو قدرتده کمان چکمز اوخ آتسا بیر زمان ای اوخ
.
.
آتام محرابیده پاک عشقیله راز و نیاز اوسته
ایاقندان چکنده بلمدی تیری نماز اوسته
او عشقه وارثم شادم نه که سوز و گداز اوسته
اؤرکدن یوخ کؤرکدن منه سنه ویرم تکان ای اوخ
.
.
بیر آز بوندان قاباق سن شکلده اوچ شعبه بیر پیکان
لبن خوار اوغلومون ائتدی بوغازون گول کیمی خندان
اوخا لبخند ووردی تاپدی گویا چشمۀ رضوان
گوزون یومدی خموش اولدی او طفل بی زبان ای اوخ
.
.
بیر اوخدا رزمگهده سن کیمی چخدی کمینیندن
توکوب قان سس اوجاتدی کربلانون سرزمینیندن
آت اوسته عبدصالح قارداشیم چکدی جبینیندن
بوعشق و بووفا اولمازنصیب دیگران ای اوخ
.
.
ایدوب خلدآشیان«هندی»بوشعرون مطلعین انشاد
سنه سرمشق اولوبدور«انورا»مرقومۀ استاد
اونی یادائت اوخی بومصرعی عرض ایله روحون شاد
پرآچ ئوزآچدیقون بیریاریه اول سایه بان ای اوخ
.
.
#قتلگاه
#حسینیه_شهادت
#اورکدن_چیخماقون_ممکن_دگول_اینجیتمه_جان_ای_اوخ
#انور_اردبیلی #ای_اوخ_انور_اردبیلی
#مردان_جاوید
#ترکی
#زبدةالاشعار
نظر دهید