امتحان عشق
شهادت امام حسین علیه السلام – اسیری آل الله و دفن شهدا
.
✍️ زبدة الاشعار ✍️
?: @nohe_torki
.
مرحوم سعدی زمان
.
اولاندا ثبت ازل علم عشقه فقه و اصول
یازیلدی شرحینه هر بابه مین قضیه فصول
.
دیَن بلایه گرک اولسون بلالره والی
گیرن بو صحنیه وئرسون نمایش عالی
.
مقام عاشق ازلدن بیله اولوب تصویب
بلا گزنده اوزاق ایلسون اوزی تعقیب
.
یتن بو رتبیه عالی بیر امتحان وئرسون
طریق عشقده اهل و عیال و جان وئرسون
.
مدرّس ازلی دن بیر امتیاز آلسون
باشی جدادهبدن یرده بی کفن قالسون
.
سموم ظلمیله نورسته گللری سولسون
حیالی عترتی نامحرمه اسیر اولسون
.
بو امتحانی وئروب هر کیم ائتسه عهده وفا
خداده ماملکین ایلسون او شخصه عطا
.
بلا دینمدی بیله بلایه بیر ذی روح
هامی قالوب متحیّر نه تک خلیل نه نوح
.
گورنده مرتبه نی انبیا ائدوب سبقت
باخاندا شرحینه بیر کسده اولمادی قدرت
.
وئروب حقیقتی بیر سرپرست حق اعلان
عزیز فاطمه ناموس دین شه عطشان
.
بو سخت امره شه کربلا ائدوب اقدام
یگانه منجی عالم مروّج اسلام
.
همان او حالده باغلاندی عشقه بیر پیمان
حسین آدی یازیلوبدور ایکی جهان سلطان
.
قبول ائدوبدی او عالمده هر نه درد و بلا
گلوب بو عالمه تا ایلسون او عهده وفا
.
دیار کرب و بلاده بیر امتحان وئردی
که عشقینی ملکوت اهلینه نشان وئردی
.
تمام ما مَلَکیندن گوتوردی ال یکسر
کومکلر ئولدی نه قالدی معین و نه یاور
.
اؤزیده دوشدی یارالی قوری یر اوسته او شاه
تاپولمادی او شه بی سپاهه یار و پناه
.
.
#کوچ_کربلا
.
یتوردی عهدینی باشه گوتوردی باشدان ال
ایچوبدی شمر شریرین الینده جام اجل
.
جفا اودیله او ظالم جهانی یاندوردی
بهشت عدنیده خیرالنّسانی یاندوردی
.
حیالی عترتینون قان ائدوبدی گوز یاشینی
ووروبدی نیزیه سلطان کربلا باشینی
.
باشی اوجالدی جدا باشینه چو مهر منیر
گلوب تکلّمه ازّل بیوردی بیر تکبیر
.
جدا باشیندا یوزه قانلو گوز یاشی آخدی
آچوبدی قانلو گوزین بیر صاقا صولا باخدی
.
جدادن ایلدی اوز پیکرینه یرده نظر
گوروب که قانلو قوم اوسته جنازه سی تیترر
.
گورنده قانلو باشی اوز جنازه سین بی سر
گلوب تکلمه شمره بیوردی اول سرور
.
نجه که سن منیم الدن قراریمی آلدون
بدلنه باشیم آراسیندا آیریلیق سالدون
.
سنونده خالق عالم قراریوی آلسون
بندله باشون آراسیندا آیریلیق سالسون
.
غضب لنوب ائشیدوب بو سوزی او شوم لعین
دئدی کسوک باشون ایلور حسین منی نفرین
.
منیم شقاوتیمی ضرب و شستیمی آیا
بو چولده گورمدون ای سبط سیّد بطحا
.
ایاقدا چکمه نجه سینون اوستونه چخدیم
باشیوی کسدیم آنان فاطمه ائوین یخدیم
.
جداباشیندا باشون آلموشام بو نوع اله
منه تعرّض ائدورسن بو حالتیله هله
.
بو نطق قوّه سینی سندن ایمدی آلّام من
یارالی باشیوی بالمرّه نطقدن سالّام من
.
دیوب بو سوزلری مخفی عنادین ائتدی عیان
آلیشدی بغض اودی دلده جدایه وئردی تکان
.
آناسی فاطمه نین اختیارینی آلدی
جداباشیندان اوقانلی باشی یره سالدی
.
او باش که گون کیمی سالمیشدی جلوه آفاقه
دوشوب یره بلشوبدور دوباره توپراقه
.
زمین دلده بلا تخمی شمردن اکدی
بئلینه آتدی الین تازیانه سین چکدی
.
دینمرم که او کافر نه ظلم ائدوبدور عیان
اجازه وئرمیه قورخوم بودور امام زمان
.
بو قدر وار آناسی فاطمه کباب اولدی
مخدّرات حرم باش آچوب ساچین یولدی
.
ازل قبول ایلمیشدی او شاه عرش جناب
گوره کسوک باشی هم اهل بیتی بزم شراب
.
آپاردیلار باشینی شامه شامیان شریر
او باش دالینجا دوشوب اهل بیتی گئتدی اسیر
.
.
#دفن_شهدا
.
یارالی جسمی قالوب اوچ گون اوچ گییجه یرده
نه سایبان تاپولوب نعشینه نه بیر پرده
.
علاقه سی او یارالی جنازیه چوخدی
صبا یلی خس و خاشاکدن کفن توخودی
.
وجود پاکینه اولموشدی هر قضیه که حتم
تمام اولدی چون اوچ گون اولوب بلالری ختم
.
گلوب بنی اسد اول سرزمینه زار و فکار
امام جسمینه قازسونلا تا او چولده مزار
.
اویاندا کوفه ده سجّاده یتدی بو الهام
که کربلایه گلوب دفن ایده امامی امام
.
قبیله اهلی هامی دیلرینده ناله و داد
باخوردیلا چوله گورسندی سیّد سجّاد
.
عقیق رنگ سرشگین توکوب رخ زرده
آقا حضورینه گلدی دوروب برابرده
.
گوروب جنازه سینین نقشه سین پوزوب اعدا
ویروب سلام او سر خیل عترت طاها
.
آتا وجودینه باخدوقجا دل گلوب شوره
ایدوب جنازه نی تشبیه وتر موتوره
.
زیارتنده همین کلمه نی یازوبلا صریح
بودور خیال ایدم من او نکته نی تصریح
.
بویورمییدی اگر اول شه دل افسرده
بنی امیّه ایدن ظلمه چکمیون پرده
.
محالیدور که ویریدیم او نکتیه توضیح
ایدیدیم اول شه دینون کلامینی تشریح
.
زیارتینده کی سوز چون دلیل دور الده
علوم صاحبی ثبت ایلیوبله مقتلده
.
او قدر آتلار ایاق وورموشیدی پیکرینه
قارشمیشیدی سوموکی اتی بیری بیرینه
.
علیل امام گوروب اولموری ویره حرکت
قبیله اهلینه فرمایش ایتدی اول حضرت
.
اوزوزی خیمه لریمیز یانان یره یتورون
اگر تاپولسا بو مظلومه بیر کفن گتورون
.
قبیله اهلی شبیه ائتدی گوزلرین ابره
که شاه جسمی کفنسیز قویولماسون قبره
.
یانان خیام یرین گزدیلر نوا دیلده
تاپوب گتوردیله بیر پاره بوریا الده
.
امام یغدی اونا شاه دینون اعضاسین
مزاره قویدی گوزی یاشلی جسم زیباسین
.
قبیله اهلی گوروبلر که سیّد سجّاد
صاقا صولا باخور آغلور دیلینده ناله وداد
.
تمام حیرتیله قتلگاهیده دولانور
گهی باخور یره آغلور گهی دورور دایانور
.
دولاندی اشگیله دولدوردی دیدۀ ترینی
تاپوب گتوردی بیلکدن کسیلمیش اللرینی
.
گینه گوروبله امامین یوزه سرشکی آخور
اولوبدی خم قدی گودال قتلگاهه باخور
.
اویان بویان ایلیوب قتلگاه توپراقینی
غریب آتاسینون آختاردی تاپدی بارماقینی
.
علیّ اکبریده اول امام دل محزون
قویوب آتا ایاقی آلتدا ایلدی مدفون
.
علیّ اصغریده اول علیل دلخسته
قویوب آتاسینون اُول قانلی سینه سی اوسته
.
آتا مزارینی ایتدی درست اوغلی علی
یازوبدی قبرینه بیر یادگار خطّ جلی
.
حسین قبریدی بو قبر علّت الاکوان
همان حسین که باشین کسدیلر سوسوز دالیدان
.
دونوب ئولنلرینه بیر به بیر او شه باخدی
آلیشدی قلبی یوزه قانلی گوز یاشی آخدی
.
گوروب وروبدیلا از بسکه یاره اهل نفاق
اولوبدی گل کیمی قانلو جنازه لر اوراق
.
بُلوردی نکتۀ مخفینی ، حجّة اللهیدی
تمام کائن و ما کان علمه آگهیدی
.
بُلوب که گردش ایّام نُه سیاق اولاجاق
او یر بهشت کیمی بارگه رواق اولاجاق
.
لزومدور اولا شه آستانه سینده غلام
شه آستانینه دربان قویوب حبیبی امام
.
قالان جنازه لره باخدی گلدی فریاده
گوزی دوشوبدی او صحراده نعش داماده
.
گوروب پوزوبدیلا ترکیب جسمینی کفّار
اتین قانین سوموگین بیربیره قاتوب آتلار
.
بدن دیمه دیه سن گلدی یرده خنداندور
یارالی پیکری توپراقلاریله یکساندور
.
همین بو طرزده دور یرده هر نه پیکر وار
دگل لزوم قازیلسون هامی شهیده مزار
.
قبلیه اهلینه امر ایتدی شاه عرش جلال
مزار شاه یانیندا قازوبلا بیر گودال
.
یغوبلا قطعه به قطعه بدنلری یردن
درست ایلدیلر اوردا بیر کیچیک مدفن
.
کشیکچی لازمه دور شاهه رسم چون بیله دی
آتاسینون قشونین اوز یانیندا دفن ایلدی
.
امام عالِمیدی یرده بیر یارالی قالور
اونون یارالاری شیر خدا قرارین آلور
.
بیر آیری سرّی وار ایتدی دوباره استعلام
بویوردی واردی قالان ، یا که دفن اولوبدی تمام ؟
.
قبله اهلی دیدی یا بقیّة الاخیار
کنار نهرده ، بیر پهلوان جنازه سی وار
.
نقدر جهد ایلدوق ای امام دور زمن
اونون جنازه سینی قالخزانمادوق یردن
.
ز بسکه جسیمی اولوب تیر اشقیا هدفی
قالور صاقین گوتورنده یر اوسته صول طرفی
.
چخوبدی جانی بدندن هنوز قان سوزولور
ووراندا ال بدنی بند بندیدن اوزولور
.
امام آغلادی اود دوتدی یاندی بو سوزدن
گلوب نوایه جگر قانینی توکوب گوزدن
.
ایله نوایه گلوب نی کیمی او میر هدا
که دولدوروبدی بوتون دشت نینوانی نوا
.
دیدی ای اهل قبیله سولوب منیم چمنیم
او گل کیمی داغیلان نامدار عمومدی منیم
.
گلوب امامیله اهل قبیله خورد و کبار
همان او یرده علمداره ده قازوبلا مزار
.
ز بسکه اولموشیدی جسم پاکی صد پاره
درست قیلدیلا بیر خوردا قبر علمداره
.
ایکی کسیلمیش اله تیکمیشم ایکی گوزیمی
اونون آدیله اودور ختم قیلّام اوز سوزیمی
.
الهی من سنی وئرّم قسم علمداره
منی ده بو گلن ایل همره ایله زوّاره
.
تفضّلاً نظر ائت یا غنیّ و یا غفّار
عزیز عالم ایله هر قدر #حسینی وار
.
.
#حسینیه_شهادت
#کوچ_کربلا
#دفن_شهدا
#سعدی_زمان
#اولاندا_ثبت_ازل_علم_عشقه_فقه_و_اصول
#کنزالحسینی2 ص 222 (کلیات ص 448)
#ترکی
.
✍️ #زبدةالاشعار ✍️
?: @nohe_torki
نظر دهید