« آتدان دوشنده خیمه لره قاچدی ذوالجناح »
.
.
.
محمد علی مصیبی تبریزی
تضمین شعر گرانسنگ مرحوم دخیل (ره)
.
.
ماتم سرای شاه غمی گوزلر آختارور
بزم عزاده گوز میِ ناب و تر آختارور
میخانۀ عزایه گلن ساغر آختارور
«بو مجلسی ملائک نه کشور آختارور
فیض آلماقا تمام ملائک لر آختارور»
.
.
صاحب عزا کیمدی؟ خدای جلیل دور
بانی حسین عزاسینه نوح و خلیل دور
مخمور جام حزنی نبیّ نبیل دور
«شاه شهیده مرثیه خوان جبرئیل دور
کرسیِّ عرشی روضه ایچون منبر آختارور»
.
.
بیر جرعه باده گور نئجه آلامیمی آلور
باشیمده کی ظلالت و اوهامیمی آلور
افسوس ، سیل غصّه صفا جامیمی آلور
«بیر سس گلور قولاقیمه آرامیمی آلور
گویا آتا اوغول ایتوروب سسلر آختارور»
.
.
قانه باتوب محاسنی سلطان مشرقین
سرخطّ درس عشقی یازوب روح نشأتین
هردم گوزون دولاندیروری فخر عالمین
«ظاهر بودور ئوز اوغلونی آختارموری حسین
ائتموش بهانه اکبری پیغمبر آختارور»
.
.
عنقای قاف عشقین اولوب صولتی عیان
قان لُجّه سینده جان وئروری شاه انس وجان
حیدرباخیش گوزل گوزی مخموروخونفشان
«ائتموش حسین ئوز بدنین اوخلارا نشان
اوج وصاله اوچماقا بال و پر آختارور»
.
.
تاصاحبی اوحاله دوشوب،داشدی ذوالجناح
گوردی وجودی یاره ، باشاباشدی ذوالجناح
یوزدوتدی خیمه گاهه بیرآغلاشدی ذوالجناح
«آتدان دوشنده خیمه لره قاشدی ذوالجناح
گویا غریب صاحبینه یاور آختارور»
.
.
آت شیهه سین حرمده ائشیتدی نجیب لر
بیربیر چیخوبلا خیمه دن عطشان حبیب لر
آیا نه دور فضانی دوتان بو نهیب لر
«شیهه چکوب دیئردی گلون ای غریب لر
میداندا بیر یارالی نی مین کافر آختارور»
.
.
باشدان دوشوبدی صاحبیمین هَلْ اتیꞌ تاجی
زهرا بالاسی نیزه لرین اولموش آماجی
عالم پناهی ایندی اولوب یار محتاجی
«ناگه نه گوردیلر دولانور خیمه نی باجی
قارداش گوزونی باغلاماقا معجرآختارور»
.
.
گلچین روزگار گولون درماقا گلوب
شهدِ شهادتی آقاما وئرماقا گلوب
دشت بلایه بزم عزا قورماقا گلوب
«زینب او دمده قارداشین آختارماقا گلوب
گوردی کی قارداشی سورونور خواهر آختارور»
.
.
گودال مقتل ایچره بویانمیش حسین قانا
نار بلاده آز قالوری پیکری یانا
هردم باخور ئورکده کی اوچ شعبه پیکانا
«گاهی دؤنور بقیعه طرف سسلنور آنا
گل کربلایه اوغلون ئولور مادر آختارور»
.
.
یاتمیشعلم،سینوب قشونوم قان اولوب جگر
یتمیش صحابه دن داهی قالموبدی بیرنفر
آز قالدی خیمه لر تالانا شام اولا سحر
«کیمدور وئره بو حالیمی عباسیمه خبر
بیکس حسین تشنه ئولور ساغر آختارور»
.
.
امّا! نه گوردی نئچه نفر سان دوتوب گلور
جبریل دیلده نغمۀ قرآن دوتوب گلور
زینب دی باشینه وُرور افغان دوتوب گلور
«ناگه نه گوردی شمر گوزون قان دوتوب گلور
امّا الی بئلینده گزور خنجر آختارور»
.
.
شمر اوتدی سینه ده ایشی آفاقی یاندیرور
بیر ایش گورور کی چرخِ جهانی دایاندیرور
هئچ بیلموری کیمین قانینا اَل بویاندیرور
«خنجر قویاندا گوردی گوزون چوخ دولاندیرور
سسلندی یا حسین کیمی بو گوزلر آختارور»
.
.
سالما « مُصَیـّب» ئوز ئورگین التهابه سن
باخ گور نئجه « دخیل » تمام ایلیوب سخن
شاهن ئورک سوزون نه طریقه ائدوب علن
«فرمایش ائتدی منتظرم صون نفسده من
زهرانی بیر گوزوم بیریسی حیدرآختارور»
.
.
.
#حسینیه_شهادت
#ذوالجناح
#ماتم_سرای_شاه_غمی_گوزلر_آختارور
#بو_مجلسی_ملائک_نه_کشور_آختارور
#دخیل #آتدان_دوشنده_خیمه_لره_قاچدی_ذوالجناح
#مصیبی_تبریزی
#ترکی
#زبدةالاشعار
نظر دهید