او بزمیده که اوتورموشدوم اوز خیالمیله #سعدی_زمان #اکبریه

احوالات عید قربان
#گریز به حضرت علی اکبر علیه السلام
.
زبدة الاشعار

?: @nohe_torki
.
مرحوم سعدی زمان
.
او بزمیده که اوتورموشدوم اوز خیالمیله
انیسیدیم اورگیمده اولان ملالمیله
.
کسوب توجّهمی سربسرخلایقدن
نه تک خلایق اوزیمده اولان علایقدن
.
محبت اهلی کیمی عالم وَلَه دَیدیم
بسان یوسف صدّیق قَعرِ چَه دَیدیم
.
گلوب او حالیده بیردوست با وفا وصدیق
دیدی منه که ای اخباریده ایدن تحقیق
.
بو گون سرور و فرح خلق ایچینده برپادی
مه مبارک ذِی الحَجّه – عید اضحی دی
.
بو قدر رشتۀ نظمه دوزوب دُر و مرجان
ندندی یازماموسان بس وقایع قربان
.
اونون همین سوزی پوزدی مَنِ پریشانی
مجسّم ایلدی اوضاع عید اضحانی
.
علاوه قلبیمه یول تاپدی هنگ شیون و شین
گوزومده جلوه گر اولدی حریم پاک حسین
.
دیدیم خوشا اولارون حالینه مِناده دیلر
و یا مِنای حقیقی ده کربلاده دیلر
.
ویرولّه سیل کیمی گوزده اذن گوز یاشنا
ایدولّه شوط او قبر مقدّسین باشنا
.
وروبلا دوره او شش گوشه قبره چون هاله
باسوبلا جان کیمی آغوشه سینه ده ناله
.
نجه ضریح نه ششگوشه قبردور نه منا
که غبطه ایلر او قبره منا و عرش خدا
.
دیسم بهشت خطا دور غلط شباهتدور
او پاک بقعه بهشت برینه زینت دور
.
نه کربلا که اونون وار بهشته رجحانی
بهشته طعنه ویرا کربلا حسین جانی
.
نه کربلا اونی حق مایۀ سعادت ایدوب
که تک به تک او یری انبیا زیارت ایدوب
.
نه کربلا که اونا کعبه رتبه ده یتمز
اونون فضیلتنی عقل و وَهم درک ایتمز
.
نه کربلا که هامی یرلرین او یرگوزیدور
نه کربلا که اونون زایری خدا اوزیدور
.
نه کربلا که اولوب ذات حق اونا بانی
همان یره توکولوب حی لم یزل قانی
.
نه کربلا که شرفده بیوک مقامه چاتوب
نه کربلا که حسین اکبریله اوردا یاتوب
.
نه کربلا که آدی طاقت و توان آپارور
نه کربلا که اونون ماجراسی جان آپارور
.
نه کربلا آقامون قاننه باتان یریدور
منیم حبیبیمون الله بُلور یاتان یریدور
.
او پاک بقعه ده بیر قبر وار که عرش الاه
اوزون حقیر دوتار تا ایدر او قبره نگاه
.
او قبرین عرش معلا تک آلتی گوشه سی وار
یارالی قلبرین پرده سیله پوشه ی وار
.
اوقبر صاحبی الدن ایله آلوب صبری
اوزی گوزومده دی قلبیمده دور ولی قبری
.
او قبرصاحبی آئینه دور خداونده
تمام خلق اونا عبد رقّ تک بنده
.
او قبری خلق ایلیوب قبله کعبیه الله
دلیل چوخدی بسمدور فَثَمَّ وجه الله
.
او قبرعرشیدن افضلدی خلددن اعلا
ایدوبدی مظهر کلّ اوردا مسکن و مأوا
.
بولر بونی او که وار قلب پاک و آگاهی
باسوبدی باغرینا آلّلهی قبری واللهی(1)
.
تصوّر ایتمه عقیدم بودور خدادی حسین
ولی او کیمدی خدادن دیسون جدادی حسین
.
اگرچه من دیمورم بو خدای اکبردور
ولیک ذات عدیم المثاله مظهردور
.
او قانلی یوزدی که مشهوراولوب جمال الله
اونون عیالینه وار اختصاص آل الله
.
زیارت ایلیین اول بیکفن ئولن شاهی
ایدوبدی عرشیده گویا زیارت اللهی
.
میسّر اولمادی افسوس اخذ کامه گیدم
او توزلی قبره بو ایل منده بیر سلامه گیدم
.
ایدوم نه چاره که قلبیمده قالدی بو حسرت
سعادت ابدی اولمادی منه قسمت
.
نه استطاعت اولوب بیت لاینامه گیدم
نه بیته علّت غائی اولان مقامه گیدم
.
یازور زیارته گوز یاشینی عوض اخبار
توکوب سرشگ گرک آغلیام چو ابر بهار
.
بهانه گوز یاشیما بیر قلمدی بیردفتر
یازور الیمده قلم گاه لیلی گه هاجر
.
مقام خُلَّته بیجا یتشمیوبدی خلیل
ایدوب خلیلی عجب امتحان خدای جلیل
.
بُلوندوروب جبروت اهلنه بو اسراری
که مندن اؤزگه خلیلین اؤرکده یوخ یاری
.
عبث خلیله خدا ویرمیوبدی بو جاهی
خلیل دلدن آتوب فکرِ ماسواللهی
.
یازولا سگّز ذی الحجّه لیله سینده خلیل
یاتوب گوروب یوخودا امر ایدور خدای جلیل
.
خلیل، اولماز ایکی حبّ بیر دله جاگیر
بیرینی آتماسان اصلا دگل علاج پذیر
.
محبتون بیزه وار قویموسان آدوی خلیل
نقیض خلّت اولور اولسا حُبّ اسماعیل
.
گرک بو قیدیدن اوز فکروی رها ایده سن
مُحبّتیمده منیم، اوغلوی فدا ایده سن
.
اویاندی صبح زمانی خلیل ایدوب تردید
قالوبدی ترویه آدی گیجه اولوب تجدید
.
یاتوب صباح گیجه نی فکریله بقلب سلیم
گنه همان ایشه مأمور اولوبدی ابراهیم
.
اویاندی شَکّی گیدوب یتدی ظَنّی حق طرفه
بُلوب که امرخدادور آدی قالوب عرفه
.
چاغوردی محضرینه هاجری بیوردی خلیل
صباح خلیلیمه مهماندی اوغلوم اسماعیل
.
ایدوب زیارته بیر دوست اوغلومی دعوت
لباسینی عوض ایله بالاما ویر زینت
.
او بزمه گیتمیه اوغلوم گرک حقیرانه
گوزینه سرمه چکوب ایله زلفنی شانه
.
سیاه طرّه سینه عطر وور معطر ایله
نقدر گلسه الوندن بالاما زیور ایله
.
ذبیحینی گتوروبدورهمان گیجه هاجر
قویوب برابره کامنجه ایلسون زیور
.
خیال ایدوب که اوغول زلفین ایلسون شانه
سو سپدی اشکیله اول زلف عنبر افشانه
.
ال آتدی زلفینه شوقیله پیچ وتاب ویره
دوتوبدی اللرینی رعشه شانه دوشدی یره
.
دیدی فدا سنه ای نوردیدۀ هاجر
اوغول سبب ندی بُلمم نیه الیم تیترر
.
ووراندا زلفوه شانه الیمده شانه دونر
گوروب خمیده قاشون قامتیم کمانه دونر
.
گوزون فداسی کنار اولما بو گیجه مندن
مشام جانه گلور آیرلیق ائیی سندن
.
اوغول گیدنده قوناق رسمدور آنا سوونور
منیم ولی اؤره گیم بُلمورم نیه دوگونور
.
چکنده گوزلرووه سرمه ای گوزوم نوری
آخور گوزوم یاشی تبدیل ایدور غمه سوری
.
گورور اؤره ک گوزی هاجرده بو قضایانی
مجسم ایلوری مد نظرده لیلانی
.
باخاندا هاجره لیلا گورور دلِ بینا
دیورگوزیمدن آخان اشک چشم وای لیلا
.
دگلدی مطلبه آگاه بینوا هاجر
صباح فدا اولاجاق اولجوان مه پیکر
.
وورندا زلفنه شانه گئنه اسردی الی
نجه قیاس اولی لیلایه هاجرین عملی
.
بلوردی لیلی صباح اولسا اوغلی دوغراناجاق
شرار هجرله بر عمر قلبی اودلاناجاق
.
گریز به #شب_عاشورا
.
نه دلده وار نه قلمده بیانینه یارا
نچکدی لیلی بیچاره شام عاشورا
.
قویوب برابرینه جان و دل چکیده سینی
ایدوبدی منظرۀ دیده نور دیده سنی
.
گورور یاخوندی کسه رشتۀ وصالی فراق
ایدور نوا دولوری ناله ائیله دشت عراق
.
گهی باخور یوزونه عالم وَلَهده قالور
گهی دورور اوغولون بوینونا قولونی سالور
.
سَمَندَر دلی گه آتش درونه یانور
او شمع باشینه پروانه تک دورور دولانور
.
گورن عوالم لیلای زار و محزونی
مجسم ایلوری عشق عالمینده مجنونی
.
چخوب اوزوندن ایدور غشّ گه گیدور هوشه
گلنده هوشه چکور گاه اوغلون آغوشه
.
گه ایستوری دانوشا گوزیاشی امان ویرمور
گهی سیلورگوزونون یاشینی نشان ویرمور
.
بُلور که آغلاسا آرام جانی غصّه لنور
چوخ ایستور آغلاماسون لیک گوزیاشی النور
.
گهی خیال آپارور طاقت و توانی گیدور
او سرو قامته گاهی کفن تدارک ایدور
.
خیال ایدور ویرا شانه او زلف مشگینه
دیور نه شانه بویار قانه لشکر کینه
.
ویراندا شانه اولور قلبی شانه تک صد چاک
الینه آرتوروری رعشه دیدۀ نمناک
.
گوزونده گوز یاشی دریا کیمی گلور جوشه
عزیز جان تک آلور نو جوانون آغوشه
.
فقط بیر اوغلیدی امیدی قوم و قارداشدان
اودورکه گوزیاشی طوفان ایدوب آشور باشدان
.
بو فکریله اولا لنگر سنق سفینه سینه
باسور جوان اوغولین باشین اودلی سینه سینه
.
چوخ ایستورم که دیم اول گیجه نه عالمیدی
دینمورم ولی چون حشرگاه اعظمیدی
.
آنا بلوردی صباح اوغلونون شهادتیدی
اوغول بلوردی آنانون صباح قیامتیدی
.
ادامه احوالات حضرت هاجر
.
نچکدی لیلی بیچاره شرح اولونسا اگر
قالار وقایع حال ذبیحیله هاجر
.
گرک تعاقب ایدم باشدا کی قضایانی
ویرم تمامه قضایای عید اضحانی
.
اوگیجه صبحه کیمی عارضینده اشک بصر
الینده شانه ایدوب زیور اوغلونا هاجر
.
آچیلدی صبح ایدوب هاجره خلیل خطاب
اولور بو گون منه لازم اولا پچاق و طناب
.
پچاق آدی ایشدنده آنا اولوب بیتاب
دیدی قوناق گیدنه نه لزوم کارد و طناب
.
جواب ویردی خلیل خدا که ای هاجر
وار احتمالی شکاره ایشیم اولا منجر
.
شکارین ال ایاقین باغلارام طنابیله
باشین پچاقیله ذبح ایلرم شتابیله
.
گتوردی کارد و طنابی آنا ایدوب تسلیم
گوتوردی اوغلونی اولدی روانه ابراهیم
.
اوغول گیدردی منایه طرف وقاریله
آنا باخاردی دالنجا چوخ انکساریله
.
باخاردی قالب بیروح تک او بیچاره
آخاردی خونِ دلی گوز یاشیله رخساره
.
خیال ایدردی گر اوغلوم ضیافته گیدیری
ندن قدم بقدم گوز یاشیمی قان ایدیری
.
بمیدان رفتن حضرت علی اکبر
.
گنه حصار دلی لشگر ملال آلدی
بو قصّه اکبر و لیلانی یادیمه سالدی
.
گیدنده رزمگهه مظهر رخ طاها
نحاله قالدی بُله بُلمورم خانم لیلا
.
اؤره ک گوزوم گوروری حالینی ولیک قلم
ایدنموری اؤرگیمده اولان مقامی رقم
.
بیرینی ایتمسه لیلا محبّتی مجنون
نجه بُلر ندی معنای حسن روز افزون
.
آنا گورنده قتاله طرف جوانی گیدور
او حاله قالدی گورن فرض ایدردی جانی گیدور
.
جوان اوغول قدِ رعناسینه سالوبدی کفن
باخان او حاله دیر برفیله دولوب گلشن
.
ولی بهار و خزان جمع اولوبدی گلشنده
گورنمیوب ایله ضدّین اولا برازنده
.
ایدوبدی سرو قدین برف تک کفن مستور
یوزی بهار تک ایلر باخان گوزی مسرور
.
هوانون ایسدیسی رخسارینه دوزوبدی عرق
یوزی قزل گوله بنزر آچوب ورق به ورق
.
گون ایسدیسیندن آچوب صورتی ایکی لاله
گول اوسته شبنمه بنزور دوزوب تری ژاله
.
دوداقلاری قورویوب کثرت حرارتدن
سالوب عطش گل رخسارینی طراوتدون
.
آناسی شانه ویروب زلفینی ایدوب پرچین
نه زلف مشگ خطا دور عبیر ازفر چین
.
جسارت اولدی دیدیم من او زلفه مشک خطا
اوزی بغیشلسه اکبر بغیشلنر بو خطا
.
باخان او طرّۀ مشکین و زلف پرچینه
حیا ایدر باخا مشگیله عنبر چینه
.
او آغ کفن او قرا زلف ایله خوش یاراشور
قرار و صبرین آلور هر کیمون گوزی ساتاشور
.
او صورتیکه باخان گوزلرین قرارین آلور
تصور ایت آنا باخدوقجا گور نه حاله قالور
.
گورور ملاحتینی قلب زار و مجروحی
اورکده سوزش ایدور زخمی اودلانور روحی
.
دیور دایان دور علی گیتمه بیرده عطرون آلوم
باشوا بیر دولانیم بوینوا قولومی سالوم
.
آتان ویروبدور اجازه دینمرم گیتمه
غریب آنان ولی بالمرّه بیله ترک ایتمه
.
دایان دویونجا گوروم گول یوزون گیدیرسن گیت
تکلُّم ائت ایشیدوم بیر سوزن گیدیرسن گیت
.
بُلنمورم نجه شهزاده آیرلوب گیتدی
بو قدر وار که یخلدی آناسی غشّ ایتدی
.
مین ایل یازانلار اگر یازسا صبر لیلادن
محالدور اولا معلوم قطره دریادن
.
جوانی گیتسه الیندن آنا ئولر ئولمز
بونی جوان بالاسی ئولمین آنا بلمز
.
ادامه احوالات حضرت اسماعیل
.
سوزی ملخَّص ایدوم بحثه اولماسون منجر
نه چکدی لیلی بیچاره بیر بولر هاجر
.
سرشگ دیدۀ هاجر آخاردی زمزم تک
ووراردی چتر باشی اوسته آهی پرچم تک
.
خلیل باخمادی هاجر ایدور سرشگ سبیل
منایه اولدی روانه یانیندا اسماعیل
.
تمام شوقیله کوه منایه یتدی خلیل
بویوردی اوغلونا ای نور دیده اسمعیل
.
یوخودا گورموشم الله ذوالجلال و غفور
منی سنون باشوی کسماقا ایدوب مأمور
.
جواب ویردی او که امر اولوبدی قیل اجرا
دایانّام ایستسه خلّاق فرد بی همتا
.
بو صون نفسده ولیکن اجازه اولسا سوزه
واریمدی نچه وصیت حضور انوروزه
.
خلیل ویردی اجازه گلوب مقاله ذبیح
آچوب وصیّته بو نحویله لسان فصیح
.
اولوبدی ایمدیکه امر اؤز الونله دل داغلا
کسنده باشیمی لیک ال ایاقیمی باغلا
.
پیچاق مباد ویره حلقیمه بابا زحمت
چخاندا جان پیچاق آلتندا ایلیم حرکت
.
اولا خلاف ادب زحمته سنی سالماق
دل شریفون ایده رنجه ال ایاق چالماق
.
حضور حقده اولا بو قضیّه نامحمود
ایدم ئولنده بابا دامنووی خون آلود
.
او قانی گورسه لباسونده گر آنام هاجر
دایانا بُلمز اؤزون غصّه دن هلاک ایلر
.
بودور ایکیمجی سوزوم ای نبی ذوالاکرام
ایدنده باشیمی کسماقلیقا منیم اقدام
.
منیم جمالیمه سال بیر حجاب تا که گوزون
ساتاشماسون یوزومه سرّینی بُلورسن اوزون
.
گوزون بو خرمن حُسنومدُن اخذ ایدر توشه
گلر او دمده آتالیق محبّتی جوشه
.
باشیمی کسماقا ایلر سن اُولزمان تأخیر
منیم الیمی چخاردار بو فیضیدن تقدیر
.
بودور اوچومجی سوزوم خاکپایوه بیرده
فدا قبول اولی گر اولسا صورتی یرده
.
کسنده باشیمی دلدن لباس اُلفتی سوی
آتا بالالیقی ترک ائت یوزومی توپراقا قوی
.
اولورمجسّم آنام حالتی گوزومده بابا
چوخ التماس ایدورم آخرین سوزومده بابا
.
همینکه آلدی یرین امر حضرت جانان
منی منای محبتده ایلدون قربان
.
منای عشقی بابا سرعتیله ترک ایتمه
توقف ایت بو گیجه قرب هاجره گیتمه
.
آنان بو مطلبی گر بُلسه گل کیمی سولاجاق
منیم فراقیمه بیر عمر اشکبار اولاجاق
.
بو دور مرام دلیم ایلیین زمان رحلت
یاتا اَقلّاً آنام بیر گیجه بابا راحت
.
ذبیحون ایلدوقی بو وصیّت عُظمی
سالور خیاله بیرآیری خلیل و آیری فدا
.
احوالات حضرت علی اکبر
.
بلا چولونده او ساعت که شبه پیغمبر
آناسی لیلنی مجنون ایدن علی اکبر
.
سوسوز یارالی بدن قطعه قطعه صد پاره
قوناق گیدیردی حضور نبّی مختاره
.
باشی یارالی دم تیغ خونفشانیله
بدن یارالی جراحات جانستانیله
.
یانوردی دل دوداقی سوزش نهانیله
مبارک آغزی لبالب دولیدی قانیله
.
او صون نفسده وصال حق اشتیاقینده
باشی امام دیزی اوسته جان دوداقینده
.
نفس ویرن نفس پاکی مین مسیحایه
نفس ویروبدی او صد چاک اولموش اعضایه
.
او شاهزاده گوزل گوزلرین آچوب ناگاه
گوروب که جلوه لنور گون کیمی جمال الله
.
آتا جمالینه باخدی دل آچدی گفتاره
اؤرک سوزون بو دلیله گتوردی اظهاره
.
دیدی بابا گیدورم من بهشت اعلایه
یتور سلامیمی سن خیمه لرده لیلایه
.
سزلتیسی گتورور چون سزلتیه یارامی
محبّت ایتگله قویما چوخ آغلاسون آنامی
.
آنام غریبیدی یوخ دادخواهی بیکسدی
منیم فراقیم ئولونجه او بیکسه بسدی
.
سفارش ایت بی بیمه مظهرصفات بتول
او بینوانی چوخ ایتسون عنایته مشمول
.
مباد کوفه لیلرتازیانه چوخ وورسون
یتنده نوبت غارت اؤزی سویوندورسون
.
ویرولسه شرح اگر اکبرین وصیّتینه
یتر نقیضه خلیل و ذبیح صحبتینه
.
ادامه احوالات حضرت اسماعیل
.
ذبیح ایتدی وصیتلرین خلیله تمام
خلیل ایسته دی ذبح ایتماقا ایده اقدام
.
ذبیحین ال ایاقین باغلادی همان ساعت
یوزون ولی قویا توپراقه ایتمدی طاقت
.
اُلاغینون جُلُنی فرش ایدوب یره فی الحال
مباد توپراقا باتسون او زلف او خط و او خال
.
دیدی آتان نجه ایلر دوام بو درده
باشون کسنده قالا صورتین قوری یرده
.
نه تک خلیل سراسر عوالم امکان
خلیل دشت بلا صبرینه اولا قربان
.
احولات حضرت اباعبدالله در بالین فرزندش
.
حسین نه چکدی بیرآللهی بولدی بیرده اوزی
گورنده اوغلی علینون قالوبدی یرده یوزی
.
چکوبدی پرده او گولدن گوزل جماله تراب
نه تک تراب سالوب خطّ و خاله قانی حجاب
.
بولنمورم نجه قلبین بو غم کباب ایلدی
زبانحالیله گویا اوشه خطاب ایلدی
.
نه یاتموسان گوزون آچ ایگوزوم ضیاسی اوغول
مگر قولاقیوه یتمور آنان صداسی اوغول
.
ایاقه دور الیمه ویر الون خیامه گیداخ
ایاقلاریم یریمور ای الیم اعصاسی اوغول
.
دوشور خیالیمه اوضاع مسجد کوفه
آتام یاراسینه بنزور باشون یاراسی اوغول
.
یارالارون هره سی بیر قزل گوله بنزر
بو کربلاچولونی دولدوروب صفاسی اوغول
.
بو سرو قامتی رحم ایتمیوب یره یخدی
نه بی مروتیموش کوفه اشقیاسی اوغول
.
سزادی لیلنی دردون اگر ایده مجنون
دوام ایدر بونا هانسی اوغول آناسی اوغول
.
بوئی برابری زحمت چکه اوغول یتوره
اولا کفن قد موزونه طوی لباسی اوغول
.
یارالی قلبینی دوندرمه قانه نازیله
اولا کمکسیز آتان گوزلرون فداسی اوغول
.
ادب یولی بودور ای منبع کمال و ادب
آتا دورا اوزانا نوجوان بالاسی اوغول
.
ایاقه دور آپاروم کولگه یرده یات راحت
یارالوسام بو یرین ایستیدور هواسی اوغول
.
دئیردیم اُلسم اگر سن منه کفن ایده سن
بو فکری عکس ایلدی حکمت اقتضاسی اوغول
.
آنان خیامیده آغلار دئیر اوغول ایوای
چخوبدی نُه فلکه نی کیمی نواسی اوغول
.
قلجلاریله اولوب بندبند گل بدنون
نه جسمدور؟ که وار شکلنون نماسی اوغول
.
ایکی ایل اولدی «حسینی» دوشوبدی بیر درده
نه آدی واردی بو دردین و نه دواسی اوغول
.
حکیم لر قالوب عاجز ویرنموری تشخیص
ولی بیزیم المیزله اولور شفاسی اوغول
.
علی آدیندا از بس جذبه وار ملاحت وار
علی علی دیرم تا توان و طاقت وار
.
حسین و اکبر آدیندان قلم کنار اولمور
تمام ایدوم سوزومی دلده اقتدار اولمور
.
تمام ایدوم بودی فکریم مِنا قضایاسین
دالنجا شرح ویروم کربلا قضایاسین
.
ادامه احوالات حضرت اسماعیل
.
اَلینده بیر ایتی خنجر دیلینده بسم الله
مناده اوغلونی وُردی یره خلیل الله
.
خلیل قویدی ذبیحون بوغازینا خنجر
نقدر زور ویروبدور کسیلمدی حنجر
.
چالوب همان پیچاقی بیر داشا عتابیله
ایکی بولوندی او داش اولزمان شتابیله
.
آجیقلانوبدی خلیل ایلدی پیچاقه خطاب
منی قویوب متحیّر بو ماجرای عجاب
.
منیم بالامدان اولان بو لطیف بیر حنجر
بو سنگدن که بُلوندی ضخیم تردی مگر
.
جماد قلبین عتاب خلیل آلشدیردی
الینده کی پیچاقی خلق ایدن دانشدیردی
.
خلیل گوردی الینده پیچاق صدا ایدوری
دیور دیمه که پیچاق بی جهت خطا ایدوری
.
خلیل تند مخالف یلی کیمی اسمه
منه که سن دیوسن کس خدا دیور کسمه
.
گلوب گتوردی او ساعتده بیر قویون جبریل
ئیدی خلیله که ذبح ایت بونی بامر جلیل
.
اوغول فدا ویره سن یوخ بو تاب و دل سنده
اوغول فداسی حسینه اولوب برازنده
.
حسین بیزیم یولوموزدا بیر امتحان ویره جاق
مقام خلّتی عالم لره نشان ویره جاق
.
سوسوز فدا ویره جاق بیر جوان مه پیکر
که گورمیوب او جوانین نظیرینی گوزلر
.
نجه جوان که حبیبیم حسین دلبندی
نه خلق اولوب اولاجاقدور نه مثل و مانندی
.
ویرنده قانلی قوم اوسته یارالی جان عطشان
ایله تحمل ایدر عالمی قویار حیران
.
غرض خلیل خدا ذبح ایدوب همان غَنَمی
مبدل اولدی سروره گویولده کی اَلَمی
.
ولی حسین ایله مست اولدی جام خلّتدن
که گیچدی اکبر ناکام و ماه طلعتدن
.
حضرت اباعبدالله بر بالین فرزند
.
گورنده اکبری جان اوسته کربلا شاهی
ازلده شکریله یاد ایتدی دلده آللهی
.
دالنجا وا ولدا دیلده قلب پاکی ملول
اولوب اوشاه ولا شاهزادیه مشغول
.
توکوب سرشگ ترین زخم تازه سی اوسته
اوزونی سالدی یارالی جنازه سی اوسته
.
یوزوندن اوپدی دانشدیردی گورنه نسگیلدی
گوزوندن اوغلونون اُولشاه قانینی سیلدی
.
بویوردی یاتما دور ای مظهر رسول اُمم
سن اُلدون آز قالوری منده نعشون اوسته اُلم
ــــــ
(1)کتاب بحر المعارف تالیف عبدالصمد همدانی و کتاب مخزن اللئالی تالیف هاشمیه اصفهانی مراجعه شود.
.
.
ادامه نوحه برای سینه زنی و زنجیر زنی در هشتک
#ای_خلیل_بالیده_لنمه_چوخ_سن_ویرن_فدانین_نماسی_وار از #کنزالحسینی1 ص 222

.
#عید_قربان
#اکبریه_شهادت
#سعدی_زمان
#او_بزمیده_که_اوتورموشدوم_اوز_خیالمیله
#کنزالحسینی1 ص 206
#ترکی
.
#زبدةالاشعار

?: @nohe_torki