کوفه
.
✍️ زبدة الاشعار ✍️
?: @nohe_torki
.
محمد هوشمند (مدهوش تبریزی)
.
او دم کی گوردی جدا اوسته قارداشین باشینی
مخاطب ائتدی بو نوعی یارالی قارداشینی
.
امان بو کوفه ده بیعت شکن جماعت دن
دولوب اورکلری نیرنگ دن شقاوت دن
.
دئیوله خارجی پیغمبرین بالالارینا
دونوبدی قانه اورک طعنه و شماتت دن
.
تاپانمادیم سنی صبحه قدر داریخیدیم حسین
قوتاردی صبریمی هجرین سالیب دی طاقت دن
.
مجال یوخ دانیشام من سنه اورک سوزونی
دییم کئچن گئجه باشه گلن حکایت دن
.
هایاندا قالمیشیدون زینبیبن دوتولموش آیی
نه تئز غروب ائله دین دوشدون استقامت دن
.
کئچن گئجه باجین ئولسون کیمه قوناقیدون
کی یوخدی بهره سی انصافیدن مروّت دن
.
هایاندا آچمیشیدی میزبان یاتان یئریوی
حکایتی اوخونور یوزده کی علامت دن
.
وروبلا باشیوه داش، تازه دن آخیر قانی
همیشه یانمالیام سوز ظلم و محنت دن
.
الیم چاتییدی قویاردیم اوزوم دوا باشیوا
یواردیم اشگیمیله قانی توزلی صورت دن
.
جداده سن اوخی قرآن حیات وئر باجیوا
دانیش منیله قوتار بو غریبی غربت دن
.
بو صحنه نی باجین ئولسون حسین اینانمازدیم
باشیوا داش آتیری اهل کین عداوت دن
.
بو داش وورانلار امان وئرسه لر اگر بیر آن
دوشردی اوز گوزووین یاره سی اذیت دن
.
رقیه دن نگران اولما تاپشیر اللهه
مواظبم منه تاپشیردیقین امانت دن
.
سنه فدا دئمورم هیچ منی دانیشدیر حسین
اگر چه داغلی دی سینم شرار فرقت دن
.
ولیک قالمادی صبری رقیوی دیندیر
یاخین دی قلبی دایانسین ملال و حسرت دن
.
فدا اولوم یارالی باشیوه اوزاقلاشما
سنی گورنده باجون جان تاپیر او صورت دن
.
بو شهرین اهلی منی چوخلاری تانیر اما
هامی غریبه اولوب یوخ تانیش جماعت دن
.
ایله بیر حاله قالیب زینبین تانینمور حسین
زمانه قامتیمی بوکدی بار محنت دن
.
اسیر دشمنم اما کیچیلمرم بیرینه
اوزاقدی هاشمیان هر زماندا ذلت دن
.
قولومی باغلیا بیلمزله اولماسا عشقین
گلم دالینجا مقرر اولوب مشیت دن
.
زیادین اوغلینی منطقله ائیلرم رسوا
گرک نتیجه آلاق بیز بو قانلی نهضت دن
.
یانیم بو غمده و یا اهل کوفه نین حالینا
ندن یاتوبلا آییلمیللا خواب غفلتدن
.
تعارف ائیلیری اطفاله اوز تصدقنی
بو کوفه اهلی مني یاندیرور بو الفت دن
.
یازیب دی کوفه غمین گوزده اشک تر #مدهوش
اونی اونوتما قیامت گونی شفاعت دن
.
#کوفه
#او_دم_کی_گوردی_جدا_اوسته_قارداشین_باشینی
#محمد_هوشمند
#مدهوش_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید