وداع ، شجاعت و شهادت حضرت علی اکبر علیه السلام
.
✍️ زبدة الاشعار ✍️
?: @nohe_torki
.
مرحومین سید باقر حری زنجانی ( اقبالی زنجانی ) و حبيب الله منطقی زنجانی
.
او ساعت که علی اکبر ، عقاب اوسته سوار اولدی
دییَن زین براق اوسته ، پیمبر استوار اولدی
.
سپاهون گردوخاکی اول چولی ایتمیشدی ظلمانی
چخوبدور چاه ظلمتدن او دمده یوسف ثانی
پیمبر نوری اکبردن ایشفلاندوردی دنیانی
گورن سویلردی اول نوری پیمبر آشکار اولدی
.
دونوبدور پشت سردن خیمه گاهه بیر نظر سالدی
او باخماقدان حسینون اختیاری هرنه وارآلدی
حسینه عرض ائدوب رمزیله من گیتدیم آنام قالدی
اوغولسوزدور بو چولده بیکس و بی اعتبار اولدی
.
نجه اوندا پوزلماز کربلا سلطانینون حالی
دیدی ای جدینون سیرتده هم صورته تمثالی
رکاب اوسته خم اول بیریول اوپوم اول هاشمی خالی
گورنلر سویله سون خورشیدیله مه همجوار اولدی
.
پیاده کربلا شاهی او شهزاده عقاب اوسته
بوکولموش قد اوجا قامت اولوبدور خم رکاب اوسته
ننوعی قول بویون اولدی دیلیم گلمور جواب اوسته
بو قدری عرض ایده بولم که حال احتضار اولدی
.
علی اکبر وقاریلن گیدوردی مقتله ساری
حسین سالدی یولا فرزند دلبند وفاداری
محاسن الده اشگی صفحه رخسارینه جاری
دالیجا گوزلرین سست ایلییوب قلبی فکار اولدی
.
خدایا شاهد اول پیکار اعدایه گیدور اکبر
که خلق و خلق و منطقده بالام پیغمبره بنزر
باخاردوق اکبره هردم دوشنده یاده پیغمبر
گیدیر الدن بالا یالقوز آتا بی غمگسار اولدی
.
قدم میدانه قویدی شاهزاده شیر غرّان تک
منوّر ایلدی میدانی خورشید درخشان تک
قد رعنا واری آزاده دور سرو خرامان تک
مهیا جنگه چون شهزاده ی والا تبار اولدی
.
چکوب شمشیر برّان و شررباری نیامیندن
یاروبدور صفلری پوزدی سپاهی انتظامیندن
اگرچه تشنه دور سیراب اولوب توحید جامیندن
دوباره رزمگهدن خیمه گاهه رهسپار اولدی
.
سوسوزدور خسته دور جنگ ایلیوب پیروزمندانه
گلوبدر خلعت آلسون شاهدن فرزند فرزانه
دیر لب تشنه ام بابا سو واردور خیمه ده یا نه؟
منه ثقل الحدید انگیزه ی رنج و فشار اولدی
.
فراهم اولمادی شهزادیه چونکه سو ویرسون شاه
یازیلّا آغلادی ناگه چکوب فریاد واغوثاه
بویوردی نور دیده گیت یولون گوزلر رسول الله
گوررسن ظاهرالده جام آب خوشگوار اولدی
.
حسینون تشنه لب اوغلی الینه آلدی شمشیری
علیدور هم علی صولت دلیرو شیرلر شیری
ملک دوریا ملک منظر دیلینده بانک تکبیری
حریم عزت اهل حرمدن پاسدار اولدی
.
فنون جنگ و ضرب شستین اعدایه نشان ویردی
وجود دشمنه خاک مذلتده مکان ویردی
مگر روبه صفت دشمن او مظلومه امان ویردی!
ایاقدان دوشدی چون منقذ الیله زخمدار اولدی
.
یاخونلاشدی گل نورسته گلزار دین سولسون
دیوم بیر غم فزاسوز تا که گوزلر اشگیلن دولسون
فغانیله دیدی بابا سنه مندن سلام اولسون
وروب بیر شهقه روحی جسم اطهردن کنار اولدی
.
اوغول بالیننه گلدی حسین اما نه حالیلن
یوزون قویدی یوزینه ناله و آه ملالیلن
ننوعی ایلیوب تودیع اول یوسف مثالیلن
یازا بیلمم او حالی خامه الده بیقرار اولدی
.
گوروبدور زینب کبری حسین بی اختیار آغلار
دیرسن خرمن گل اوستنه ابر بهار آغلار
قالوب بالین اکبرده حزین و بیقرار آغلار
گلوب زینب علی وای ناله سیلن اشگبار اولدی
.
یازان وار گلمسیدی زینب اول حالتده میدانه
شهادت امری یتمزدی یقین اتمام و پایانه
یوخون اولموشدی یول تاپسون اجل شاه شهیدانه
نه یاخشی خواهر غمدیده یار شهریار اولدی
.
اوزون گیتدون سوزون قالدی جزاک الله (اقبالی)
بوسوزده (منطقی) اولدی سنه همراه (اقبالی)
سنه ویرسون صله بی حد حسین تک شاه (اقبالی)
بحمدالله جهاندا اسم و رسمین پایدار اولدی
.
#سبک_علی_اصغر_مه_انور ( 7 سبک )
.
#اکبریه_شجاعت #اکبریه_شهادت
#او_ساعت_که_علی_اکبر_عقاب_اوسته_سوار_اولدی
#اقبالی_زنجانی #منطقی_زنجانی
#ترکی
.
✍️ #زبدةالاشعار ✍️
?: @nohe_torki
نظر دهید