تعریف حضرت سیدالشهدا (ع)
ورود کاروان به کربلا
.
.
.
بهزاد قاسمی اردبیلی
.
او کس کی مست حسیندور قورار سُرور عزا
یوزون گوزون بوروير لَمعه لَمعه نور عزا
.
او کس کی مست حسیندور شرابه ناز ائلیر
ئورک پیاله سينه دولدورار شعور عزا
.
او کس کی مست حسیندور همیشه مست یاشار
گوزونده گوز یاشینی ایلیر بلور عزا
.
حسیندی سبزترین کلمۀ کتاب بهشت
همان بهشتی کی ساکندی اوردا حور عزا
.
حسینون آدی گلنده اليم ایاقیم اسر
دوتار وجودیمی باشدان اياقه شور عزا
.
حسینون آدی گلنده فرشته لر باش آچار
تنور خولی کیمین گرم اولار تنور عزا
.
حسیندی حضرت موسای دشت عاشورا
حسیندی روضۀ سینا، حسیندی طور عزا
.
حسین او داغدى داغیلدی کویر مرثيه ده
کی تا قیامته جک سینميا غرور عزا
.
.
بو سوز کی من یازورام سر شاه تعزیه دی
حسین یخیلدیقی یِر زادگاه تعزیه دی
.
.
حسینی کیم تانيسا ابتلادن آیریلماز
دوشر بلالره اما بلادن آیریلماز
.
حسینی کیم تانيسا میثم مدینه کیمین
دیلینده کسسه لر، آل عبادن آیریلماز
.
حسینی کیم تانيسا حُرّ اولوب گئیر احرام
منای عشقیده سعی و صفادن آیریلماز
.
حسینی کیم تانيسا بی حسین نفس چکمز
بهشته گئتسه ده کرب و بلادن آیریلماز
.
حسیندی باقی اعظم حسیندی ساقی غم
او کس کی مست حسیندور بقادن آیریلماز
.
حسینه عاشق اولان نینوا اسیری اولار
سیزیلدیار گجه گوندوز نوادن آیریلماز
.
حسینه عاشق اولان تا ابد حسینی یاشار
شریف اولوب شرف انبيادن آیریلماز
.
وهب کیمین چکیلر داره یار عشقینده
مسیحی اولسادا خطِّ ولادن آیریلماز
.
.
وئرنده جان چکر عمق وجودیدن بیر آه
دئیر کی اَشهد اَنَّ حسین ذبیح الله
.
.
حسین او جاندی کی اولدی نثار عاشورا
حسیندی سرور نیزه سوار عاشورا
.
جلاله باخ، یازیلوب تاج عشقه نوريلن
حسیندی تا به ابد تاجدار عاشورا
.
دئدیم گُله، نیه گولمز یوزون محرّمده
بویوردی گُللر اولار سوگوار عاشورا
.
دئدیم اوتا، نیه آرتار بو آیدا شعله لرون
دئدی دوشر یادیما شعله زار عاشورا
.
نه گل، نه اوت، وار عقیده م منیم هر ایل اون گون
تمام خلقت اولار داغدار عاشورا
.
بو داغ، داغِ حسیندور، دواسی گوز یاشیدی
او دور کی عالم اولار اشکبار عاشورا
.
او دم کی قويدى قدم وعده گاه عشقه حسین
بو داغی درک ائله دی شوره زار عاشورا
.
یازولّا دوم ماه عزا، گونورتا چاقی
يتیشدی کرب و بلایه قطار عاشورا
.
.
بنای ناب محبت تیکیلدی خشت به خشت
قوتاردی رنج سفردن مسافران بهشت
.
.
ویریلدی زنگ توقف، کسیلدی آوالر
کویر درد و غمه وارد اولدی دریالر
.
صلیب عشقین آلوب عطرين اَندی مرکبدن
جهاندا عشق صليبين گزن مسیحالر
.
دایاندی اكبر اذان وئردی تلين اوستونده
اونون اذان سسینه عاشق اولدی صحرالر
.
کجاوه دن یِره اَندی کبوتران حرم
منوّر ائتدی او صحرانی ماه سيمالر
.
غروب لحظه لریدی، داریخدی شاه غریب
قفس کیمین ئورگین سیخدی غملی مأوالر
.
گئدوب فراته طرف بیر اووج سو آلدى اَله
سارالدی رنگی، گوزی دولدی، گئتدی یارالر
.
باخوب سوا، دئدی ای سو ایشیم دوشوبدی سنه
خدا بیلور کی بو ایشده باتوب معمّالر
.
سنی قسم وئرورم محسنی ئولن خانیما
همان خانم کی اَلیندن ئوپردی حورالر
.
.
سن ای سو سعی ائله شمع بلانی یاندیرما
منیم یانیمدا اباالفضلیمی اوتانديرما
.
.
بو غملی دشتیده غوغا یارات ، قیامت ائله
سو مشکی الده گلن قهرمانه، خدمت ائله
.
امید قافله می ناامید سالما يولا
سوسوز قوناقوه ای سو آماندی حرمت ائله
.
او انمه میش یره سن قالخ اياقه اوجونا دول
اونون علم یاپیشان اللرین زیارت ائله
.
یارالی اولسا اگر يو یاراسینون قانینی
وجودوی او قیزیل قانیلن طهارت ائله
.
سوسوزلارا او سو قولی وئرر گلنده بورا
گلن قدملرینه بوسه وير، محبت ائله
.
رقیه نون قاباقیندا اونی اوتانديرما
سو اوسته ساقی عطشانیمی حمایت ائله
.
بو قانلی دشتیده قویما اونی خجالت ئوله
یوبانما مشکینه تئز دول، دوباره همت ائله
.
او سو يولوندا گوزوندن کئچر ربابه گوره
آماندی سنده ربابين حالين رعایت ائله
.
دئمورم هئچ سنه آل ترابه رحم ایله
دئیورم اصغره خاطر ربابه رحم ایله
.
#ورود_کربلا #حسینیه #حسینیه_بهزاد_قاسمی
#او_کس_کی_مست_حسیندور_قورار_سرور_عزا
#بهزاد_قاسمی
#ترکی
#زبدةالاشعار
اجرتان با خدا. شعرهای خوبی رو از شاعران شهیر در سایت قرار می‌دهید. فقط اجرتان با امام حسین ع
سلام سرور گرامی ممنونم از حضورتان ان شاءالله دستبوس امام زمانمان باشیم