اگر یتمش ایکی جان اولماسیدی …
.
#زبدةالاشعار
.
: @nohe_torki
.
حاج اسماعیل فرشی ازهر(غمخوار تبریزی )
.
اگرکرب وبلا دشتینده یاران
ایله محشرنمایان اولماسیدی
.
تمام عالم لرین فُلک نجاتی
دچارغرق طوفان اولماسیدی
.
ایله ایفا ایدن عهد السته
سماوات اهلی حیران اولماسیدی
.
آتان گوزدن تمام ماسوانی
ایله محبوب یزدان اولماسیدی
.
وجودینده به جز مهرالهی
بیرآیری مهره امکان اولماسیدی
.
سوزی فعلی مرامی هرجهتدن
گواه حی سبحان اولماسیدی
( ایشقلانمازدی گون تک دین اسلام )
( قیام شاه عطشان اولماسیدی)
.
دیمزدی کلمۀ توحیدی بیرکس
اگریتمش ایکی جان اولماسیدی
.
نه حُریت نه امنیت اولاردی
ایله آزاد مردان اولماسیدی
.
تاپاردی دینه ال بیگانه الر
اولاردین اوسته قربان اولماسیدی
.
یاتاردی پرچم اسلام وقرآن
او قانلار زیب میدان اولماسیدی
.
گیدردی حُرمت دین مقدس
حسین گرقانه غلطان اولماسیدی
.
دوتاردی عالم اسلامی ظلمت
مرام پاکی اعلان اولماسیدی
.
یخاردی ظلم الی قرآنیانی
حسین قربان قرآن اولما سیدی
.
اثرقالمازدی دنیاده وفادن
(امان )عباسه اعلان اولماسیدی
.
اوتوزمین لشکری یکسریخاردی
مطیع حکم جانان اولماسیدی
.
سویی یکسر خیامه باغلاداردی
حسینیندن اوفرمان اولماسیدی
.
اگر قاسم وجودی قطعه قطعه
ایاقلارآتدا یکسان اولماسیدی
تمام کون وامکان آغلامازدی
اونون طوی حجله سی قان اولماسیدی
.
علی اکبری شاه شهیدین
گیدوب آلقانه غلطان اولماسیدی
.
چخاردی دینیدن چوخلی جوانلار
ایله بیرجوهر جان اولماسیدی
.
سولاردی گلشن دین مقدّس
علیّ اصغرعطشان اولماسیدی
.
دگردی روح اسلامه چوخ اوخلار
بوغازیندا اوپیکان اولماسیدی
.
بویاردی دینی آیری رنگه اغیار
آغ اونّیک قانه الوان اولماسیدی
.
قیلانمازدی نمازآسوده خاطر
او چولده گروضو قان اولماسیدی
.
نماز اولمازدی قائم بو جهاندا
نماز اوسته فدا جان اولماسیدی
.
یخاردی رکن دینی فوج دشمن
او شه گرتیرباران اولماسیدی
.
دل اسلامی تیرکین دلردی
حسینین جسمی شان شان اولماسیدی
.
بو تشکیلات دین یکسر یاتاردی
بلا دشتی قیزل قان اولماسیدی
.
حجابین آیه سین یکسر داناردی
اگر سرکوب اوعدوان اولماسیدی
.
جهان نار جهالتده یاناردی
خیم ظلمیله تالان اولماسیدی
.
نه مسجدلر قالاردی نه تکایا
یانان مخیمده افغان اولماسیدی
.
نه پرچم لر اسردی نه بوسسلر
ایله شام غریبان اولماسیدی
.
گیدردی دین سرشاه شهیدان
ایشق گون تک نمایان اولماسیدی
.
اوخونمازدی کلام الله جهاندا
جداده صوت قرآن اولماسیدی
.
یخلمازدی ایله ظلمون ، بناسی
او باش گر سنگ باران اولماسیدی
.
دوشردی اهل دین باشی اشاقه
گیدوب کول اوسته مهمان اولماسیدی
.
قالاردی سیردن تبلیغ اسلام
او دلخسته اسیران اولماسیدی
.
جهاندا امرنهی اولموشدی متروک
ایله تبلیغ شایان اولماسیدی
.
ایدنمزدی حقین بیر کیمسه اثبات
حسین قیزلاری گریان اولماسیدی
.
جهاندا بیر نفر یاتمازدی راحت
اگر شام ایچره افغان اولماسیدی
.
یزید اوز ظلمنه پرده چکردی
رقیه دیده گریان اولماسیدی
.
دوتاردی یر یوزون کفروظلالت
یزیدین کاخی ویران اولماسیدی
.
دایاندی خامه اوت دوتدی صحیفه
یانوردی اشک چشمان اولماسیدی
.
یازانمازدون بله بیرمدح (غمخوار)
آقاندان لطف شایان اولماسیدی
.
.
.
.
#عاشورا #غمخوار
#پندیات_حسینیه_حسینیه_شهادت #کربلا
#اگر_کرب_و_بلا_دشتینده_یاران
#ترکی
.
#زبدةالاشعار
.
: @nohe_torki
نظر دهید