اگر گل اولماسا عالمده گلستان اولماز #حسینیه_حزین_خسروشاهی

معیار عشق
..
..
..
مرحوم حاج حیدر خسروشاهی (حزین)
..
..
..
اگر گل اولماسا عالمده گلستان اولماز
جهاندا اولماسا گر گلستان جهان اولماز
..
بهار فصلی اگر گلستاندا آچماسا گل
نوای بلبل شوریده دن نشان اولماز
..
گلون هواسیدی شور اوسته بلبلی گتیرن
اگر گل اولماسا بلبلده نغمه خوان اولماز
..
گله علاقۀ بلبل حقیقی دور نه مجاز
حقیقی اولماسا هر عشق جاودان اولماز
..
حقیقی عاشقه لازمدی امتحان ویرسون
که عاشق اولماسا عشقینده امتحان، اولماز
..
بو درسی شمعله پروانه دن گرک آلماق
که بیله عشقده ثابت قدم اولان ، اولماز
..
اؤزی یانار کول اولار لیک عشقدن دؤنمز
شرار عشقده پروانه تک یانان اولماز
..
جهاندا چوخلار اولوب دم ووران حقیقتدن
حسین تک ویرن اوز عشقینه ضمان اولماز
..
حقیقت اوسته حقیقتله وار یوخون ویردی
بئله معامله تا دور ائدور جهان اولماز
..
گؤروب که دینی ائدور ملعبه یزید لعین
او دین تباهه خطا و جفاده سان اولماز
..
آدی خلیفۀ اسلام اؤزی اسیر هوی
ایله خلیفه دن اسلامه جز زیان اولماز
..
خیالی وار ائده بالمرّه دین ائوین ویران
امام گوردی سکوتی سزای شان اولماز
..
بلی امامین اگر دینه یانماسا اورگی
زوالدن ائله بیر دین ایچون امان اولماز
..
بولوب وظیفۀ شرعی قیام ایلماقی
دیدی که دین سیز اولا دینه حکمران، اولماز
..
حسین ئولسه ده لازمدی دین دیری قالسون
حسین تک بلی دینه نگاهبان اولماز
..
اولا اولا ائله بیر رادمرد آزاده
حکومت ایلیه دین اهلنه فلان اولماز
..
او دور که یخاماقا بنیان ظلمی ائتدی قیام
ائله قیامه هر آزاده ده توان اولماز
..
قویوبدی ایندیده حیرتده عالمی او قیام
حقیقتی او قیامین اولا بیان اولماز
..
فدای دین ائلدی جمله یار و یاورینی
ائله خلوص ائله ایثار هان هان اولماز
..
اؤزوده شوقله جانانه بذل جان ائتدى
گوروب که ایلمه سه حقّه بذل جان اولماز
..
رضای حقّی آلوب جمله وار یوخون ویردی
ایله معامله ده سود اولار زیان اولماز
..
فناى فى الله اولوب تاپدی عمر جاویدان
او جاودانه لیقا مدت و زمان اولماز
..
خطا الى ایله سالمیشدی دینی رونقدن
گوروب ویریلمسه گلزار دینه قان اولماز
..
قانیله گلشن دینه ایله صفا ویردی
که حشره تک داهی گلزار دین خزان اولماز
..
حقیقتی ائله عالملره عیان ائلدی
که مین دلیلیله مطلب ائله عیان اولماز
..
حسینه خادم و مداح اولان جهاندا «حزین»
بلایه دوشسه ده مداح این و آن اولماز
..
..
..
..
#حسینیه #حزین_خسروشاهی #خروج_مکه_حزین_خسروشاهی #ورود_محرم_حزین_خسروشاهی #ورود_محرم #خروج_مکه #ترکی #زبدةالاشعار #ورود_کربلا_حزین_خسروشاهی #ورود_کربلا