ایتمیشم ایجاب دعوت حیّ اعلادن باجی #سعدی_زمان

زبانحال امام مظلوم در موقع وداع
.
✍️ زبدة الاشعار ✍️

?: @nohe_torki
.
مرحوم حسینی سعدی زمان
.
#سبک_زینبم_جان_اوستیم (4 سبک)
.
ایتمیشم ایجاب دعوت حیّ اعلادن باجی
وقت اولوبدور آیریلام من آل طاهادن باجی
.
.
آختاروردوم عالم هجراندا چوخداندور وصال
ایلیم اغیاریدن گیزلین نگاره کشف حال
آچمیشام تیریله ایمدی اوج وصله پرّ و بال
تا ایدم پرواز اعلایه بو سفلادن باجی
.
.
قارداشون بایِعدی باجی، مشتری ذات خدا
جان ثمن مثمن وصال خالق ارض و سما
گرم اولوب بازار محنت باشلانوب بِیع و شِری
ویرسم باش یتمرم سوده بو سوداده باجی
.
.
ثبت ایدن گون بو گونون وضعین مشیّت خامه سی
انبیانی حیرته سالدی بلا هنگامه سی
گوردولر بیر کهنه کوینک دور شهنشه جامه سی
شانه خالی ایتدیلر بیله قضایادن باجی
.
.
انبیا و اولیادن ویرمدی بیر کس بلا
من دیدیم بیر تک بلا گَلدی ظهوره هر بلا
سن شریکیم سن، محلّ امتحانیم کربلا
قائل لفظ بلی قاچماز بلایادن باجی
.
.
من او گون گوردوم ایدن بو باب عشقی افتتاح
باش گرک ویرسون باجی تا پیروی تاپسون فلاح
حرمتین هتک ایلین لر قانینی بُلسون مباح
مصدر اولسون لفظ ثاراللهه معنادن باجی
.
.
ایمدی تصمیم ایتمیشم اوز عهدیمون ایفاسینه
قانیمیله سو ویرم تا کربلا صحراسینه
ساچلاری اَلده آنام گَلسون حسینون یاسینه
ناله سی افلاکه اوج ایتسون بو صحرادن باجی
.
.
صبریمی الدن آلوب شوق حضور بزم یار
دوغرانوب اکبر، اَلوب قارداشلاریم، یوخ غمگسار
من غریبی ذوالجناحه ایمدی کیم ایلر سوار
بو کومکسیز دوشمسون تاخیرده دعوادن باجی
.
.
ای آنام زهرا عزیزی توکمه گوزدن گوزیاشون
آغلیوب آغلاتما بیر بیله یارالی قارداشون
ویرمه الدن اوز وقارون، صبر ایله آچما باشون
دوز، دایان هر ظلم گورسن قوم اعدادن باجی
.
.
آغلاما، باخما یارالی باشیمه، گوز یاشیمه
هاشمیّاته خبر ایله یغشسون باشیمه
قویما داد ایتسون، تسلّی ویر بنات هاشیمه
تک به تک آگاه ایله اجر شکیبادن باجی
.
.
خیمه دن چخما کناره، عجز قیلما دشمنه
قولّارون باغلانسا صبر ایت، گلمه داد و شیونه
گر سنه اولسا شمادت چوه موثّردور منه
یوخ بیوک بیر غم منه بو درد عظمادن باجی
.
.
آی آتام شیر خدانونشیره بنزر دختری
شیردور شیر ایستر اولسون ماده سی یا کیم نری
جلوه گر سندن گرک اولسون شئون حیدری
سن کیمی بیر قیز گرک اول شیر هیجادن باجی
.
.
قدرت الله دور آتان ای قدرت یکتا قیزی
عصمت الله دور آنان ای عصمت کبری قیزی
باشین آچماز، زلفینی یولماز باجی زهرا قیزی
سن که سرمشق آلموسان صبرونده زهرادن باجی
.
.
تشنه لب قانه بویانسام بو لب دریاده من
خار و خسدن جسمیمه باد صبا ایتسه کفن
موج اشکون گوزده تشبیه ایلمه دریایه سن
گورمسون دشمن گوزی گوهر او دریادن باجی
.
.
رسمدور آغلار او کس که قلبینی غم داغلاسا
نیزه ده من آغلارام امّا رقیّم آغلاسا
آغلاسون قویما بالام دشمن قولونی باغلاسا
چوخ علاقم وار اونا سایر صبایادن باجی
.
.
روحیم اینجیر گر او طفل ناتوانیم اینجیسه
دلده قالماز طاقتیم روح روانیم اینجیسه
جانیمه زحمتدی چوخ آرام جانیم اینجیسه
بیر دقیقه گوز گوتورمه اول دل آرادن باجی
.
.
سرپرستی سن سن ای باجی بو باشسیز عترتین
قوی منه منّت اگر چکسن سکینه زحمتین
قویما نیلی ایلسون سیلی صفیّه صورتین
با لطافتدور یوزی چون برگ رعنادن باجی
.
.
گَل الیندن آل منی بو قیزلارین، تیز سال یولا
قویما امّا قیزلاریم مندن صورا زلفین یولا
باغلانور گورسن نوامیس نبوّت قول قولا
قویما یالوارسونلا شمره خوف ایذادن باجی
.
.
سوگُلیمدور، قلبیمون آرامیدور نازلی رباب
بسلنوبدور نازیله ایتمز قوری یرلرده خواب
سینوه آل جان تک ای آرام جان بوتراب
قیل نوازش، اوپ لب لعل شکرخادن باجی
.
.
اول مواظب بانوان مُلک عزّ و جاهیدن
قویما چخسونلار کناره باش آچوخ خرگاهیدن
گرچه شهزاده دوزنمز آیری دوشسه شاهیدن
سن ولی سس قویما چخسون آل قُربادن باجی
.
.
گُلشنه باد سموم اسسه عیاندور گُل سولار
هکذا قلبه مصیبت یوز ویرنده گوز دولار
داغ دیده، نوجوان مرده، آچار باش، ساچ یولار
یوخ مذمّت هر عمل باش ویرسه ثکلادن باجی
.
.
سن ولی جِدّیّتونله ایله چوخ چوخ اهتمام
قویما لیلانون ایشیتسون ناله سین قوم ظلام
هم منیم روحیم سیزیلدار،‌هم گُلر اشرار شام
وای اوغول وای ناله سی اوج ایتسه لیلادن باجی
.
.
آغلاما اطفالیمی آغلاتما، دولدورما گوزون
چوخ مصیبت وار قاباقدا ایمدیدن یورما گوزون
هر مصیبتده شهامت گوستَرون، یکسر دوزون
صبره شیرین دور ثمر شهد مصفّادن باجی
.
.
راس «سعدیّ زمان» شوریله چوخ پرشوردور
اوز اَلیمله چکدیقی زحمتلره ماجوردور
قویمارام ذلّتده قالسون، خدمتی منظوردور
سهمی واردور عزّت دنیا و عقبادن باجی
.