وداع حضرت اباعبدالله الحسین (ع)
..
..
مرحوم ساعی تبریزی
..
..
ایسته دی تشنه حسین عازم میدان اولسون
دین حق اوسته او گون قانینه غلطان اولسون
..
..
گؤردی بوعالم امکانی دوتوب قوم کفر
جدّینین چکدیقی زحمت اولاجاق جمله هدر
لشکر کفره وئریبدی او گون اعلام خطر
دین شرع نبوی عالمه اعلان اولسون
..
..
بیر به بیر عترت و انصاری اولوب جمله شهید
عرصۀ جنگده شاه شهدا قالدی وحید
بویوروب قویمارام اسلامه ائده حکم یزید
حاکم اسلامه گرک تابع قرآن اولسون
..
..
نهی ائدیب دین مقدس ایچه هر کیمسه شراب
آدی اسلام اولان اولماز ائله مست و خراب
تابع دین اولان ائتمز دل طاهانی کباب
کافر مطلق اولا یا کی مسلمان اولسون
..
..
قویمارام من بو یزیدی بو خلافتده قالا
اسرا ایله باشیم شامه گئدیب شامی آلا
پای تختینده منیم لبلریمه چوب چالا
لبلریم پارچالانیب قانیله الوان اولسون
..
..
ئولومه باغلادی محکم کمرین میرهدا
کفری برهم ائلیه اول ولد شیر خدا
گلدی بیر خیمه لره عترتینی ائتدی وداع
قویماسین زینبینین حالی پریشان اولسون
..
..
زینبه باخدی دئدی آغلاما بیچاره باجی
صبر ائله اشکیوی توکمه بیله رخساره باجی
صبریدن اوزگه بو امره داخی یوخ چاره باجی
سیزلره حافظ اؤزی خالق سبحان اولسون
..
..
شمس اطرافینی آلمیشدی آی اولدوزلار او گون
آلدیلار دور امامی باجیلار قیزلار او گون
سس سسه وئردیلر آغلاشدی اوغولسوزلار او گون
گؤرمییب چشم زمان بیر بیله هجران اولسون
..
..
بیری سویلوردی بابا یوخدی منیم دادرسیم
بیری سویلوردی بابا تنگه دوشوبدور نفسیم
بیری سویلوردی عطشدن بابا جان باتدی سسیم
منه بیر جرعه سو وئرسن بویوک احسان اولسون
..
..
گؤردی سعد اوغلی حسیندن داخی یوخدور اثری
چاغیریب دیر او زماندا یانینا دورد نفری
دولانین چوللری سیز دور بر خیمه لری
گور حسین ئولدی و یا ایستیری پنهان اولسون
..
..
گلدیلر خیمه کنارینده دوروبلار او زمان
گوردولر خیمه ده افلاکه چیخیب آه و فغان
بعضی سسلیر وای اخا بعضی سی سسلیر باباجان
خیمه ده آز قالیری حشر نمایان اولسون
..
..
گلیب او حالی وئریبلر او گون اول شومه خبر
سسلنیب دیر اوخ آتانلار ائلیین خیمه گهی زیر و زبر
باخمادی حقّه وئریب حقّه او اعلام خطر
هم حسین عترتی هم خاکیله یکسان اولسون
..
..
بو سؤزى یازماقا یوخ منده دلیم تاب و توان
بیرنفر شوم و دنی آلدى اله تیر و کمان
اوخ کماندان قوتولوب خیمه گهی ائتدی نشان
آل سفیانین الهی دلى آلقان اولسون
..
..
شاه دین دوره سینی دوتموشودی اهل حرم
یارالاندى نئچه سی قانه بویاندی دئمه رم
قالدی نه حاله او گون میرهدا شاه امم
عالمین جانی حسین، جانیوه قربان اولسون
..
..
«ساعی» گل شیونه توک عارضه سن اشک بصر
سنه شاه شهدا ائلییه معناده نظر
نوحه یاز شام و سحر عمریوی سن وئرمه هدر
حشرده پشت و پناهین شه عطشان اولسون
..
..
..
#وداع #ساعی_تبریزی #حسینیه_وداع #حسینیه_ساعی_تبریزی #حسینیه #ترکی #زبدةالاشعار
نظر دهید