راه شام
خطاب حضرت ام لیلا به رأس مقدس قتیل اول
..
..
مرحوم انور اردبیلی
..
..
یر وئردی نیزه ده على اهل فتن سنه
یولداشدی یولدا لیلی آزرده تن سنه
..
باشون دالیجا ئوز باشما گلمورم اوغول
محکومم حکم عشقیله بو قدری من سنه
..
چوخدان من عاشقم نه بو گون نه دوننکیم
چوخدان اسیردور بو دالونجا گلن سنه
..
جان نقدى الده مشتریم تار زلفوه
جاندان علاوه وار نئیم اولسون ثمن سنه
..
باش دوتمیور معامله میز نیزه داریله
تعیین قیمت ائتموری باش ذبح ائدن سنه
..
آماده ام کسوک باشووا اولماقا فدا
ایلوم نچاره یوخ منی قربان کسن سنه
..
یانّام کول اولمارام کول اولان اود دگل بو اود
یانسون گرک ئولونجه بو قاره گین سنه
..
سایونده دالدالانمارام ای سرو سایه دار
پاداش زحمت آلمادی زحمت چکن سنه
..
باخدوقجا یاره لی باشووا اوخشاما دیور
اون سگیز ایل گیجه گونوزی جان دییَن سنه
..
چرخ فلک علی نیه دوشمور مداریدن
قلبیم آلولانور باخورام ناقه دن سنه
..
بختیم قرادی ئوز یازومون دستگیریم
یوز وئرمه سون سوزومدن علیجان محن سنه
..
قالدى نجه اورکده اولان آرزولریم
طوی کوینگی تیکنمدی کوینک تیکن سنه
..
فکر ایلیوردی لیلی بیچه طوى لباسیوی
خیّاط دهر قویمادی بیچدی کفن سنه
..
نه گیدی اگنینه طویوون خلعتین آنون
نه قسمت اولدی من دئدیگیم پیرهن سنه
..
اولسون گرک همیشه دل لاله داغدار
ائتسون گرکدی ناله عروس چمن سنه
..
یل ترپدنده کاکلیوى طرّه وی على
تیترور اوشاقلقوندا بشیک ترپدن سنه
..
شامون یولی هارا سن هارا نیزه لر هارا
گوز یاشنی نثار ایلیور هر گورن سنه
..
هر کس یارالی باشیوه بیر سوز دیور کچور
ای کاش باخمیا على یولدان کچن سنه
..
جلوه وئروبدی صورتیوه قانلی گوز یاشون
ارزان ائدوب گوزَلّیگی خلق ایلین سنه
..
با اینکه گوز قاشون دوتولوب لخته قانیله
حائل اولوبدی زلف شکن در شکن سنه
..
مین یوسفه دگر گنه ده حسن صورتون
بی مثل سن سَنَددی او وجه الحسن سنه
..
کنعان عزیز اولسا اگر راه شامده
باخماز اونون جمالینه قیمت وئرن سنه
..
سن کوچه دن کچنده ز بس خوش خرامیدون
مبهوت اولوب باخاردیلا اهل وطن سنه
..
آهو باخیش حساب ائلسم کسر شأن اولار
چاتماز باخیشدا آهوی دشت ختن سنه
..
نطقون فصیح کلمه لرون چوخ متیندی
سویلردیلر حجازده شیرین سخن سنه
..
افسوس صحبت ائتمیوسن هر گورن بیله
شیرین دیل اورگدوب نجه دیل اورگدن سنه
..
ئولدوردیلر سنی چتین اولدی بو غم منه
سو وئرمه دی او چولده قوناق ئولدورن سنه
..
#راه_شام #انور_اردبیلی #اکبریه_انور_اردبیلی #اکبریه_شهادت #ترکی #زبدةالاشعار
نظر دهید