مدح و شهادت حضرت زهرا (س)
.
✍️ #زبدةالاشعار ✍️
.
🆔: @nohe_torki
.
#عبادی_طارمی
.
ایله یاری ای قلم تا وصف زهرادن دییم
افتخار مرتضی دلبند طاهادن دییم
.
واردی هر یرده آدی دیللرده جاویدان هله
اذن ویرسه فاطمه بیر قطره دریادن دییم
.
علت خلق خلایق خلقتین دردانه سی
اول کسی که شأنیده باشدی مسیحادن دییم
.
سنگر حق وحقیقتده دوران مثل علی
آسمانی ایلین نورانی سیمادن دییم
.
وصفینی شرح ایلیوبلر بی نهایت کلکیلر
ایستیرم بوشعریده آیری زوایادن دییم
.
شأنی نورانی مقامی هر ایکی عالمده تک
سفره سینده ساده امّا نان و خرمادن دییم
.
باشینون اوسته ملکلر ایلیردی چون طواف
جنّته ارزش ویرن اوصاف حورادن دییم
.
مادر شاه شهیدان پاسدار دین حق
عشق ومحبوب نبی امّ ابیهادن دییم
.
مرشد سارا ومریم حیدرین همسنگری
آدی دیللر ازبری مست تولّادن دییم
.
کیم گوروب اجلالینی مبهوت و سرگردان قالیب
یادگاری اول خانمدان چادر و ایمان قالیب
.
فاطمه یعنی علی یعنی حسین یعنی حسن
فاطمه یعنی جهالت ریشه سین یردن کسن
.
فاطمه خلق اولدی تا افلاکی خلق ائتسین خدا
فاطمه تا روز محشر تاریدن اولماز جدا
.
فاطمه خلق اولدی تا اصل هدف روشن اولا
مرتضی تک دین اسلامه اوزی جوشن اولا
.
فاطمه گلدی علینون قلبینه قوّت اولا
انتشار دین احمد دهریده سرعت تاپا
.
فاطمه مولایه یاور پاسدار دینیدی
سینه ی پیغمبره آرامش و تسکینیدی
.
سسلیوب کیم اوز قیزین عالمده مادر آدینی
یا کیمین قویدی جهاندا حی داور آدینی
.
فاطمه عشقین یولوندا ایلدی اعجاز تک
امتحان عشقیده زهرا اولوب ممتاز تک
.
ظلم دوران قیردی اما رشته ی آمالینی
پوزدورار اوج جوانلیقدا اونون احوالینی
.
تا که ترک ائتدی وفاسیز عالمی شخص رسول
قوردولار اهل سقیفه مجلس غیر اصول
.
اهل یثربدن ستمله عهد و بیعت آلدیلار
کیم دئدی یوخ باشینه خصمانه زنجیر سالدیلار
.
سست ایمانلار غدیرین ماجراسین گوردولر
اهل بیتون بارها عزّ و وفاسین گوردولر
.
گر چه تاپشورموشدی پیغمبر تمام امته
چاتمیوب چاتماز خلافت جز گروه عترته
.
دورد نفر مولا علینون اولدولار چون لشکری
تک قالیب اغیار ایچینده باغلی قالدی اللری
.
ثانی مین حیله قوروب یا زوریلن بیعت آلا
حیدر خیبر شکندن قبضه ی قدرت آلا
.
صادر ائتدی لشکر بی دینه دستور اول پلید
یاندیرین دروازه نی تا حیدر اولسون ناامید
.
اول قاپی که معبر ایتمیشدی خدا عرش اهلینه
یاندی بیر عدّه وفاسیز اشقیانون جهلینه
.
فاطمه حایل اولوب تا لشکری سدّ ایلسین
بلکه بیر اودلی بلانی جهدیلن ردّ ایلسین
.
قالدی اما دخت مرسل پیکری تحت فشار
قنفذون ضربیله گئتدی جسم پاکیندن قرار
.
خانه ی وحیه سپاه پست و دون گتدی هجوم
رهبر و سردسته سی اولموشدی اول ثانیِّ شوم
.
آخدی قان دیواری هم مسماری رنگین ایلدی
قلب زهرانون غمین بو غصه سنگین ایلدی
.
محسن دردانه سی اولدی شهید راه دین
کیم بئله چکدی مصیبت ای خداوند معین
.
من دئدی مولا علیدن پاسبانی ایلرم
باغ اسلامه جانیمنان باغبانی ایلرم
.
جدّیمین اهدافینه ائتدیم فدا اول غنچه نی
باغلیوبسوز بس نیه زهرایه راه کوچه نی
.
حیف اولا یثربده اول گون بیر جوانمرد اولمادی
چاه و صحرادن سورا مولایه هم درد اولمادی
.
دورد نفر قالدی علینون همصداسی دهریده
فاطمه گئتدی علی قالدی وفاسیز شهریده
.
ایستیردی تا حسنلن شرح ائده کوچه سوزون
اللرینن تئز سیلردی زینبین یاشلی گوزون
.
دورد یتیمه هم آتا اولموشدی حیدر هم آنا
قویمادی باد خزان شمع فروزانی یانا
.
خاطرات فاطمه تکرار اولاندا بی شمار
هم گولوب هم آغلیوردی گوزلری بی اختیار
.
ایندیکی بیر قطره دریادن یازوبسان شکری وار
ای #عبادی سعی ایله تا اولماسین شعرین شعار
.
.
#فاطمیه_مدح
#فاطمیه_شهادت
#ایله_یاری_ای_قلم_تا_وصف_زهرادن_دییم
#ترکی
.
✍️ #زبدةالاشعار ✍️
.
🆔: @nohe_torki
نظر دهید