شهادت باب الحوائج حضرت علی اصغر (ع)
..
..
مرحوم معزی اردبیلی
..
..
ایلیکه حرمله اگدی دیزین الده کمان دوتدی
اوخی ردّ ایلدی لرزه زمین و آسمان دوتدی
..
..
وروب اوخ اصغره ناگه او خونخوار و ستم پیشه
کانّه غنچه نین وردی بوداقیندن آغیر تیشه
یاخون اولدی قیریلسون شاخه سیندن ترپنوب ریشه
قوجاقینده گلابین غنچه گلدن باغبان دوتدی
..
..
گلستان معطّر سن حسینون گلستانین بیل
علی و اصغره دائیم طفیلی دوستانین بیل
ز بس باب الحوائجدور کرملی آستانین بیل
مطهّر دامنین آتدی الین پیر و جوان دوتدی
..
..
صداسیندن غرض اوچ پر اوخون گوش فلک باتدی
چالوب اصغر قماطه اللرین قانه بلک باتدی
حسین قان آغلادی یاسه او گون حور و ملک باتدی
سوسوز طفلین قوی پیکان بوغازین ناگهان دوتدی
..
..
بالانین یوز گوزون ئوپدی آتاسی موقع حساس
پریشان حالینه ایتدی تماشا فرقۀ سیّاس
باخوب تز نهر علقم سمتینه سسلندی گل عبّاس
دوتولموش قلبیمون باشین گنه قارداش دومان دوتدی
..
..
سپاس ایتدی همان ساعت حسین بن علی ناگاه
دیدی اوغلوم الیم اوسته سوسوز اوخلاندی یا الله
نه لذّت ظلمیده آیا آپاردی لشگر گمراه
گورللر ظالمی مظلومون آهی بیر زمان دوتدی
..
..
باغیم صحرای غمده گللری پرپر اولان باغدی
یاغیش تک آل هاشم باشینه تیر محن یاغدى
آلا مندن سوسوز طفلی اباالفضلیم مگر ساغدی؟
قولون سالسین یولون کرببلاده کوفیان دوتدی
..
..
الهی باغبانم من گلستان صاحبی سن سن
پریشان بندووم قان صاحبی جان صاحبی سن سن
گتوردوم من ویرم قربانی قربان صاحبی سن سن
مقدّس پیشگاهونده حسینون ارمغان دوتدی
..
..
هدفده دوز ویرا اوخ حرمله بیلدی بیله فنی
بو نوعی ظلمینه هاردان گیدوب انسانلارون ظنّی
باخان اظهار ایدر پیکان بوغازیندن اولوب اَنّی
چخارداندا الین گوزده امیر مؤمنان دوتدی
..
..
ندا گلدی حبیبی یا حسین تحفون نه زیبادور
قبول پیشگاهیمدور ذبیح سبط طاهادور
نمازین قیل مناسی عشقوون عالی مصلّادور
سنون گلزارووی عشّاقیده باد خزان دوتدی
..
..
سن ای صرّاف برجسته شکسته گوهری گیزلت
صفالی باغبانیمسن گل نیلوفری گیزلت
آپار قبر موقّت قاز علی اصغری گیزلت
آناسیندان قاباق ماتم اونا اهل جنان دوتدی
..
..
حسینه هر نه فرمان صادر اولسیدی دایانمازدی
گلوب پشت خیامینده موقّت قبرینی قازدی
توکوب گوزیاشی قبر اوسته او طفلون آدینی یازدی
اننده تلیدن غم غصّه سیندن رعشه جان دوتدی
..
..
رقیّه خیمه دن چخدی گلوب دوردی قباقینده
سوسوز قارداشینی یارب گوروب یوخدور قوجاقینده
دیدی گلدون بابا اصغر هانی یانّام فراقینده
گیدندن یوز آناسی قبلیه ای مهربان دوتدی
..
..
دانیش منلن گوروم الله رضاسی یوخلانوب گلدون؟
و یا ششماهه قارداشیم لب عطشان اوخلانوب گلدون
الونده قانلی قونداق وار ملالون چوخلانوب گلدون
قوجاقینده کیمون دلبندووی ایله بیان دوتدی
..
..
سنی ای آل عصمت دادخواهی ناگران گورّم
قیافوندن یارالی قلبووی درده نشان گورّم
الونده آغ محاسینده گوزون قربانی قان گورّم
بوغازین اصغرین اولما عدو تیره نشان دوتدی
..
..
دیدی ای عندلیب گلشن زهرا یوزون گولمز
سنون ده قلبوون باشی محندن ذرّه دینجلمز
گوزووی یوللارا تیکمه خیامه اصغرون گلمز
آپارسون جنّته آغوشیده فخر زنان دوتدی
..
..
رقیّه چادره کچدی دیدی جان قارداشیم لای لای
سو اوستونده ئولن لای لای لب عطشان قارداشیم لای لای
سه شعبه اوخ امن لای لای پریشان قارداشیم لای لای
سنی بو اوچ گون عرضینده یوخی آیا هاچان دوتدی
..
..
مطهّر قارداشیم لای لای صفالی قارداشیم لای لای
صود امر قارداشیم لای لای بلالی قارداشیم لای لای
مکدّر قارداشیم لای لای یارالی قارداشیم لای لای
نه اوسته شوم تصمیمی سنه پیکان ووران دوتدی
..
..
«معزّی» شعریده آز وقته مردان قوی گیتدی
اولده قبره اوستادون سخنور «یحیوی» گیتدی
صورا دار فنادن «انوریلن» «منزوی» گیتدی
قرا گیدی عزاسین شاعرانون شاعران دوتدی
..
..
..
..
#اصغریه #معزی_اردبیلی #اصغریه_شهادت #ترکی #زبدةالاشعار
نظر دهید