ای ارض طوس سنده عجب دلربا یاتوب #رضویه_سعدی_زمان

خطاب به ارض اقدس طوس
#گریز به #قتلگاه
.
زبدة الاشعار

?: @nohe_torki
.
مرحوم جسینی سعدی زمان
.
ای ارض طوس سنده عجب دلربا یاتوب
مرآت حق نما و جمال خدا یاتوب
.
بی اختیار مایل اولور دل وصالوه
سنده مگر بو کاه دله کهربا یاتوب
.
بالفرض روح شکّر اولا، سن بنفشه سن
ارواحی سنده جذب ایلین بیر قُوا یاتوب
.
سن سن عیار مسلم و مؤمن لره محک
سنده عیارِ کاملِ اهلِ هدا یاتوب
.
ایلر زیارتون مس ایمانی صاف زر
بیر بوته سن که سنده گوزل کیمیا یاتوب
.
شمس الشّموس سنده دور ای مفخر فلک
سنده مهیله مهره وئرن انجلا یاتوب
.
اسلامیده عزیزدی سنده یاتان وجود
سن سن او یر که سنده امام رضا یاتوب
.
پیغمبرین عزیزی، جگر گوشه سی رضا
باب الحوائج اوغلی قضایه رضا یاتوب
.
سینای واقعیدی سناباد ارض طوس
سنده کلیم لم یزله مقتدا یاتوب
.
موسایه طوریده اولان انوار آشکار
سنده جفا الیله تاپوبدور خفا یاتوب
.
ای عرشدن گوزل یر، اوزی فرش زینتی
سنده سلیل پاکِ شهِ هَل اَتی یاتوب
.
بیر روضه سن ریاض بهشت بریندن
یوخ یوخ بهشتیده سنده جلالت فزا یاتوب
.
افلاکیان چکَلَّه تمام اشتیاقیوی
سنده حبیب خالق ارض و سما یاتوب
.
دریای علم و حکمت و بحر کمال و فضل
سن سن، نه چون که سنده دُر پربها یاتوب
.
ای گوهر یگانۀ پیغمبره صدف
سنده سرور سینۀ خیرالنّسا یاتوب
.
سن بیر رئوف امامی آلوبسان کناریوه
اسلامیانه سنده امید و رجا یاتوب
.
سنده جگرلری یارالی بیر بزرگوار
اوز ائل قبیله سیندن اولوبدور جدا یاتوب
.
#گریز به #کربلا
.
یرلرده یوخدی بیر یر اولا شأنیوه نظیر
الّا او یر که اوردا شه کربلا یاتوب
.
بیر گل وار اوردا بلبلی ارواح انبیا
امّا یارالیوب اونی خار جفا یاتوب
.
عرش خدا چکر او یرین اشتیاقینی
چون اوردا گوشوارۀ عرش خدا یاتوب
.
بیر قبر واردور عرش کیمی آلتی گوشه لی
واللهی اوردا آینۀ حق نما یاتوب
.
قربان اولوم او مدفنه که اوردا قول بویون
بی غسل و بی کفن بیر آتا بیر بالا یاتوب
.
عرض ایلسم بهشت، بهشت ایلر افتخار
اوردا بهشته علّتِ خلقت آقا یاتوب
.
بیر قبردور زیارتی الله زیارتی
اوردا او که فدادی اونا خون بها یاتوب
.
عریان یارالی پیکری باشدان باشا خدنگ
گویا خدنگیدن پر آچوب بیر هما یاتوب

.
#قتلگاه
.
فریاد او وقتیدن که باجی تاپدی قارداشین
گوردی بدنده وار نه عبا نه قبا یاتوب
.
باشین کسوبله نعشی قوم اوستونده چاک چاک
گلدن لطیف جسمیده دورت مین یارا یاتوب
.
گویا که بیر طبق گلی اوراق ایدوبدیلر
هر برگی اوز یرینده دوشوب جابجا یاتوب

نیزه قلج سنقلاری آلتندا گیزلنوب
پیغمبر اوغلی خامس آل عبا یاتوب
.
عریان گوروبدی رحم قیلوب ایلیوب کفن
مرهم سالوب یاراسینا باد صبا یاتوب
.
معلوم اولور کسوب دالیدان قاتلی باشین
نعشی دوشوب یوز اوسته، ذبیح القفا یاتوب
.
بولدی باشین کسن آپاروب کوفیه قوناق
امّا اولوبدی منزلی مطبخ سرا یاتوب
.
سسلندی دور باجون سنه قربان نه یاتموسان
هانسی یارالی سن کیمی بی اقربا یاتوب
.
هانسی شهین پوزوبلا سنون تک جلالینی
صاحب لواسی قانه باتوبدور، لوا یاتوب
.
کیم سو یانندا سن کیمی لب تشنه جان ویروب
جان اوسته سو یرینه ایچوبدور دِما یاتوب
.
هانسی شهین ئولنده سویوبلار جنازه سین
کیم سن کیمی بلایه دیوبدور بلا یاتوب
.
هانسی آتا یانندا سنون اکبرون کیمی
نورسته بیر جوان اوزی گلگون قبا یاتوب
.
داماد ایدوبدی هانسی عمو قارداش اوغلونی
امّا یاخوبدی طویدا اله قان حنا یاتوب
.
واردور باشیمدا شور #حسینی اودور سبب
نی تک سوزیمده پرده به پرده نوا یاتوب

.
#رضویه_مدح
#سعدی_زمان
#ای_ارض_طوس_سنده_عجب_دلربا_یاتوب
#لمعات_حسینی ص 431
#ترکی
.
#زبدةالاشعار

?: @nohe_torki