ترکیب بند حالات حضرت زهرا (س)
15 بند – 225 بیت
.
✍️ #زبدةالاشعار ✍️
.
🆔: @nohe_torki
.
#هدایت_تبریزی
.
1
.
#فاطمیه_مدح
.
ای بانوی سرآمد نسوان عالمین
وی ذات پاکی خاتم ایجادده نگین
.
شرم ایلورم آدون گتیرم بی وضو دله
اولمور عجب دی چرخ جفا پیشه شرمگین
.
گوی لرده ، یرده ، سیر ائلدیم چشم بازیله
گزدیم تمام غرفه لرین چرخ اطلسین
.
هئچ بیر مقام ده سنه همتا تاپانمادیم
سن حشمته چاتان حشمی یوخدو بیر کسین
.
محموده سن ، عصارۀ جسم رسول سن
بی شک اتین قانین اولوب ایمانیله عجین
.
ای آسمان معرفت و عشقی بیکران
جنّت طعامی دور سنین عشق و محبّتین
.
حیران دی عقل و وهم و خیالیم مقامیوه
کیمسن ، مقام قرب علادور جلالتین
.
نوروندان آیرلیب گلیب ایجاده آسمان
حسنوندن آیرلیب بیر آز ، ایجاد اولوب زمین
.
طوبیٰ قیام قامتیوه ، اعتباریوه
محشر گونون ده سایۀ لطفون کسیلمه سین
.
محشر گونون ده نار جهیم اولسا حمله ور
ناز ایله سن بو امّت بی چاره نیله سین
.
کیمسن ، کی اولیا هامی فخر ایلوری سنه
یوم جزا ائمّه دوتار پاک دامنین
.
ردّ اولسا پرده ، اولسا عیان نوری حسنوون
اعما اولار عیونی بو غافل جماعتین
.
کیمدور سنین مقامیوه چاتسین مقام ده
جز مصطفیٰ و شیر خدا پیر عارفین
.
محشر گونون ده کشف اولونار کیمدی فاطمه
حیران قالار جلالیوه اهلی قیامتین
.
محشرده ، محشر ایلیه جاقسان فدا سنه
بیر محشر اهلی سویلیه جاخ مرحبا سنه
.
2
.
حسنون دی کوثر ، حسنووه خالق قلم وروب
جمع ایلیب محاسنی سنده رقم وروب
.
نقش نگین خلقت ائدیب فاطمه آدین
نقش و نگار دیگره نقش عدم وروب
.
ایجاد ائدیب دی نورووی ، نوروندان حقّ اؤزی
ایجاد آسمان و زمینه حُکم وروب
.
آدون مداد نوریله خلقت الی یازیب
عرش عُلانین اوستونه عالی علم وروب
.
سنله معرّفی ائلیوب حق پیمبری
سن سن علینی حق سن ایچون کفو هم وروب
.
سادات جنّتین آناسی سن سن آی خانم
سنده جلال و عزّتی خالق ختم وروب
.
صدق و طهارت عالمینین اعتباری سن
سندن کساده ربّی الارباب دم وروب
.
مجهول قدرسن ، بیلن اولموبدی قدریوی
گر چه وقارون عرش علاده خیَم وروب
.
#فاطمیه_شهادت
.
قبرین ده قدروین تایی پنهان دی عالمه
عشق اهلینین دلینده خیالین حرم وروب
.
داغی که سینه وه چکلیب سینه لرده دی
دل داغلیلار دلی محنین دن وَرَم وروب
.
عشق اهلی سینیه نه قدر وورسا آغلاسا
آز آغلییب دی هم سنه ، هم سینه کم وروب
.
گویا گوزوم گورور کی سنه آغلیور علی
اطفال خونجگر یغشیب بزم غم وروب
.
اطفال ناله ایلوری مولا سزلدانیر
لیل ظلَم ده بزم غم اُول محترم وروب
.
دیوار و در ده ناله ائدور مرتضائیله
محرابی ، ناله فاطمیه لاجرم وروب
.
گویا مجسّم اولموش او دم چشم حیدره
تکیه ائدیب دی دخت پیمبر یانان دره
.
3
.
سسلیردی فضّه اولدوم آمان دور هرایه گل
تأخیر قلما یاریِ خیرالنّسایه گل
.
ایله خبر عم اوغلوما زهرانی یخدیلار
یا مرتضیٰ حمایتِ آلِ عبایه گل
.
فضّه ائشیتدی فاطمه نین تا صداسینی
سسلندی میر محترمِ اولیایه ، گل
.
دیوار و در فشاره سالیب ئولدی فاطمه
الله رضاسی معرکۀ ابتلایه گل
.
گل گور حیالی فاطمه نه حالته قالیب
سیر ائتماقا تعدّیِ اهلِ طغایه گل
.
بی اذن گیردیلر حرمِ آلِ عصمته
اقبال غاصبان مقامِ ولایه گل
.
اولدی تعدّی فاطمه نین سندی حرمتی
فرصت یئتیبدی راهبرِ اشقیایه گل
.
شیخین کج یولا دولانیب اَگدی دین یولون
گئتدی پیمبرین زحماتی فنایه گل
.
گل قورتار عصمت الّهی قوم طغات دن
وقت هِمم دی گئتمه بئله انزوایه ، گل
.
حرمت شکن لرین نه رجوعی ولایته
تیشه ورولدو ریشۀ خیرالورایه گل
.
تأخیرین اولسا فاطمه نی ساغ گورَنمه سن
زاغ و زغن مُسیطر اولوبدور همایه گل
.
گلشن پوزولدو ، غنچه سولوب ، صدمه گوردو گول
یاره یئتب دی سینه گولِ مصطفایه گل
.
بوسه ائدیبدی بوسه گهِ مصطفانی خار
سیر ایله حالِ فاطمه نی آه و وایه گل
.
حکم ایلییبدی پیرِ جفا کارِ بی خرد
اهل جفا دولاندی صراطِ خطایه گل
.
فضّه پیامین آلدی امام ایلدی قیام
گوردی بتولی صحن ده دوشموش شکسته جام
.
4
.
سیمایِ مرتضاده غضب اولدو آشکار
بالینینه گلوب گولونون عندلیب وار
.
چکدی عباسین همسرینین گول وجودنه
نقص اولماسین حجابی خانم اولسون استتار
.
یخدی ایاقی آلتنا غدّار ثانی نی
وئردی دیزیله سینۀ پر کینینه فشار
.
اولمیدی گر بویوردو پیمبر سفارشی
السّاعه طاق سینه وی ایلردیم انکسار
.
طاها سفارشی منه اؤلادی هر نه دن
دور ردّ شرّ ائله اؤزووی صحنه دن قوتار
.
ثانی دوشوندی شیر خدادن امان دادی
ائتدی اشاره دورمیون ای فرقۀ شرار
.
بنده چکین علی نین الین غفلت ائتمیین
ائتسین گرکدی بیعت ابوبکره سازگار
.
خیبر قوپاردان اللری اشرار باغلادی
دوشدی حصار دشمنه صلب اولدی اختیار
.
باشلاندی کشمکش اوجالیب مختلف صدا
زهرا آچیب دی گوزلرینی اولدی بی قرار
.
دوردی یاپیشدی دامنِ مولادن عشقیله
استار کعبه دن نجه کی حاجی لر دوتار
.
سیزله بویوردی قویمام علی مسجده گئده
حاشا علی مقامی اولا ذرّه خدشه دار
.
بیر وضع حمل ائدن ، یارالی ، ناتوان خانم
بیر دسته اهل منکر و بی عار و نابکار
.
آگاهیدی خانم اولارین انفعالینه
آگاهیدی اؤتورمه سه گر اهل کین وورار
.
بوننان بئله علی اتگیندن ال اوزمه دی
ائتدی اراده قالسین او حالت ده استوار
.
ثانی اشاره ایلدی قنفذ نه دورموسان
صدمه گوروبدی فاطمه سست اولدی بازوان
.
5
.
غشّ ایلیوب دی گئتدی خانم اختیاردن
اللر اؤزولدی دامن پر مهر یاردن
.
چکدی علینی مسجده قوم جفا شیم
گور مقتدر علی نه دوشوب اقتداردن
.
هتک اولدی حرمتی ، نه جسارت لر ائتدیلر
شرم ایلورم کی کشف ائلیم اختباردن
.
چکدی کشان کشان او جنابی منافقان
شرح ائتمیرم ، سوزی گئچیرم اختصاردن
.
هردن باخاردی ساق و سولا حسرت اول جناب
سسلردی حمزه ، جعفری رنج و فشاردن
.
زهرایه ناگرانیدی دل پر ملالیدی
زهراده ناگرانیدی ائوده نگاردن
.
فضّه گتیردی هوشه پیمبر نشانه سین
اولسون نه انتظار زن زخمداردن
.
طاها باخشلی گوزلرین آچدی دولاندریب
گوردی کی یوخ اثر شه والا تباردن
.
عرض ائتدی فضّه مسجده مولانی چکدیلر
اود دوشدی جانینه بو حدیث قصاردن
.
پهلوسی یاره ، سینه یارا ، قول دا کی یارا
ناله اوجالدی عرشه او جسم نزاردن
.
بیر #یاعلی دئدی ایاقا دوردی فاطمه
گوردی گئدیب قراری ، دل اولدی قراردن
.
دوتدی حسن حسینین الیندن شکسته حال
گوندوز گوزون ده تیره ایدی لیل تاردن
.
یوز قویدو مسجده ائده دلدارینه مدد
یوخدور حمایت ایلین اول بردباردن
.
بیر یاره لی خانم دی ، ایکی دیده تر بالا
سوزان دی هر اوچی ستم اهل ناردن
.
وارد اولاندا مسجده اوج ائتدی ناله سی
گوردی جهول حصارنه دوشموش او بی کسی
.
6
.
شمشیرالینده باشنین اوستون ده فتنه گر
اسرار ائدیر کی بیعت ائده میر نامور
.
بیر صیحه چکدی ناله سی یاندردی عالمی
دوشدی تزلزل عالمه قورخوشدو اهل شر
.
فرمایش ایلدی کی یدالله الین آچین
آزاد ائدین عم اوغلومی ای فرقۀ کفر
.
پیراهن پیمبری گر باشیمه سالام
نفرین ائدم ، خراب اولی بو چرخ کج سیر
.
شاه ولا بویوردو کی سلمان نه دورموسان
نفرینه قویما فاطمه دل آچسین ، الحذر
.
سلمان گلیب وساطته زهرا حضورینه
عرض ائتدی ای رسول خدا قلبینه ثمر
.
سن رحمةً لِلعالمنین نور چشمی سن
نفرینه آچما دیل کی دوتار عالمی خطر
.
صبر ایله ای پیمبر رحمت نشانه سی
حاشا کی صبرین الدن آلا محنت و کدر
.
رعشه دوشوب دی جانینه غُصّاب اسفلین
سوز و نوا و آه بتول اولدی کارگر
.
مشکل گشانین اللرین آچدیردی فاطمه
مشکل لر حلّ اولار ائله سه فاطمه نظر
.
غرق ایلیب دی بوسیه شاه ولایتی
پر وردی شمعنین باشینا اولدی شعله ور
.
عرض ائتدی جان فدادی سنه ای شکسته دل
نوش ایلرم یولوندا بلا گلسه هر قدر
.
سن سن امیر ملک ولا من مریدووَم
زهرا ایکی جهاندان علاوه سنی سووَر
.
قدر و وقار و تاج سریم ، میر و رهبریم
گلسین بتوله درد و بلا کی سنه گلر
.
مَخلص قوتاردی شیر خدا گلدی منزله
جور زمانه دن ائله دی بیر بیره گله
.
7
.
بستر آچیلدی فاطمیه اولدی بستری
شمع وجودی یاندی نحیف اولدی پیکری
.
دردی مؤثّر اولدی ایاقدان سالیب اونی
تحلیله گئتدی گول بدنی ، باتدی گوزلری
.
ساعت به ساعت آرتدی غم و درد و محنتی
دلده شراره چکدی دمادم دل آذری
.
هر بیر نفس آلاندا وئرنده او راضیه
ذکر ایلیردی نام خداوند اکبری
.
شَعر و عروق و لحم و عظام و ورید و خون
ایلردی لر ثنای خداوند داوری
.
تار اولدی گوزلرینده گونوز لیل تاردن
نزدیک اولوردی کی بوکوله عمر دفتری
.
دیواره اتّکا ائلیردی دوران زمان
بیر آیری منظرِیدی اونون ماه منظری
.
گویا ایچیبدی زهر هلاهل سولوب یوزی
بیر روح و استخوان ضعیفیدی ، بیر دَری
.
گوزده نشانه قالمشیدی ضرب سیلی دن
یوزده واریدی لکّه ، وجودون دا لنگری
.
بازو یارِیدی ، سینه یارا ، دل ده کی یارا
یخمشدی یاره لر او وجود مُوقّری
.
خستِیدی یاره لردن او بانوی ذی حشم
ساق و سولا دوننده سزلداردی پیکری
.
گئتمیشدی حقّی ، ملکونو غصب ایله میشدیلَر
جبراً ائوینده خانه نشینیدی همسری
.
قونموشدی گول بالالارینا گرد التهاب
اطفاله چوخ گراندی مریض اولسا مادری
.
پوزقون گورنده گول لرینی خسته باغبان
خون دلین توکردی یوزه دیدۀ تری
.
گاهی ائدردی زینبه خلوت ده درد دل
چون واقفیدی بستر غمدن دوران دگیل
.
8
.
ضبط ایله گوش دلده قزیم بو وصایتی
حددن زیاده دور سنه زهرا محبّتی
.
من بو صفالی گلشن ایچون باغباندیم
سعی ایله دیم کی حفظ اولا دائم طراوتی
.
ایندی سنه محوّل اولور بو وظایفیم
زینب ، قویولدی عُهده وَه زهرا نیابتی
.
هر بیر یارانمیش ئولمه لیدور مهربان قزیم
عقبایه تئز اولار آناوون دا عزیمتی
.
قویما بو ائو صفاسینی الدن وئره قزیم
حفظنده خرجه وئر بالا سعیِ نهایتی
.
سن شاه لافتیٰ قزی سان ، بی بدیل سن
دؤز هر غمه ، قبول ائله هر گونه زحمتی
.
قویما گوزوم ایشیقلاری افسرده حال اولا
قویما بو گول لره قونا گرد کدورتی
.
جنّت آقالارین بالا قویما ملول اولا
هر چند کی سخار فلک اهل طریقتی
.
اسرار عشقی حفظ ائله صندوق سینه ده
عادتدی چرخه اینجیده اهل ولایتی
.
صبر ایله ابتلایه ، مُحیّا بلایه اول
دفع ایله صبریله بالا هر بیر ملالتی
.
داغ اوسته داغ چکیلسه اورک دن دوام ائله
سنده گرک دی اولسون علی استقامتی
.
اوّل منیم چکر داغمی سینه وه فلک
باخسان یوزوم ده اولموش عیان مرگ علامتی
.
محراب طاعتینده باتار قانینه آتان
باشه وئرر اؤز عُمرونی باشدا جراحتی
.
اکبادینی حسن بالامین دوغرویاندا زهر
سن باغلا گوزلرین ، آنالیق ائت عجالتی
.
بو پیرهن ده کی توخودوم نور عینیمه
ساخلا ، وداع آخر اوزون وئر حسینیمه
.
9
.
اسمایه بیرده قیلدی اورک دردینی بیان
فرمایش ائتدی ای منه هم سرّ و همزبان
.
بیر درد اؤرکده وار کی سالور رعشه جانیمه
مغشوش ائدیب خیالیمی بو محنت گران
.
تشییع اولا بو نحویله جسمیم روا دگول
واردور کدر کی جسمیم اولا گوزلره عیان
.
بیر راه چاره آختارورام بو قضیّیه
برجسته لیق لاری اولا بو پیکرین نهان
.
اسماء دئدی بو مشکلون آساندی چاره سی
حلّ ایلرم بو مسئله نی اولما ناگران
.
تابوت طرحین ایله دی مطرح بتول ایچون
تأیید ائدیب او صاحبۀ مجد و عزّ و شان
.
بعد از آتا وفاتی او بانوی ذوالکرام
مطلق تبسّم ائتمیوب آغلاردی باغری قان
.
تابوتی گوردی ، لبلری گلدی تبسّمه
دنیانی وئردیلر ائله بیل ، اولدی شادمان
.
علّت اودور وصیّت ائدن وقته دیده تر
عرض ایلدی یانا یانا ای شاه انس و جان
.
وئردین ائلیکی غسلومی گیزلین گجه یاری
کفن ایله دین بو جسم نحیفی عم اوغلی جان
.
اوغلانلاریملا غمزده قلدین نمازیمی
وقت اولدی پای قبره جنازَه م اولا روان
.
تابوت ایچینده حمل ائله قبره جنازه می
تشییع ائله بو نحویله ای یار مهربان
.
قویما بالالاریم اولا پژمرده گول کیمی
قویما یته بو گول لریمه آفت خزان
.
قویما غبار غمله حسین و حسن سولا
کلثوم و زینبی ائده لر قویما چوخ فغان
.
تا غالب اولدو دیدۀ بیدارینه اجل
طبق وصیّتی ائله دی مرتضیٰ عمل
.
10
.
عصرین زمانی گوزلرینه غالب اولدی خواب
بو خواب خوش علینین ائوین ایلدی خراب
.
سیر ایلیردی عالم دیگرده مرتضیٰ
مست عبادتیدی ، عبادتله کامیاب
.
ناگه نه گوردولر حَسنینی فسرده حال
دل لرده ناله ، گوزلر الیر گوزدن اشک ناب
.
سسلندی لر بابا آنامیز ئولدی دورما گل
بو ناله نی ائشیتدی امام اولدی دل کباب
.
ایوای ائویم یخلدی دئدی ، گئتدی هوش دن
غشّ ایلیب یخلدی ترابه ابوتراب
.
حاله گلنده عزم ائله دی فوری منزلی
وصل نگاره شیر خدا ایلدی شتاب
.
بیلمم یخلدی اوچ دفعه یا اگلشیب یئره
گوز یاشی گوزده جوشه گلیب ، دلده اضطراب
.
هولیله وارد اولدی علی دودمانینه
گوردی نگارینی ائلییب مستتِر حجاب
.
مانع اولور سحاب ، گوره آفتاب یوزون
ردّ ایلدی سحابی کی کشف اولسون آفتاب
.
گئتدی قتیفه اولدی عیان روی فاطمه
گوردی تمام نقشه لرین نقشۀ بر آب
.
سسلندی همدمیم گوزون آچ مرتضیٰ گلیب
ای قوللاریم قواسی ، اورکده توان و تاب
.
ای نور چشم احمد محمود آچ گوزون
آغلار منیم بو حالیمه سکّان نه قباب
.
ای آب زندگی منه آب حیات سن
یومما گوزون کی آب حیاتیم اولور سراب
.
ایوای علینی گور نه گونه قویدی روزگار
من سسلیرم اویان ائلیور یاریم اجتناب
.
داغ چکدی سینه مه ائویمی یخدی روزگار
حقّیم دی آغلیام گولومه عندلیب وار
.
11
.
یثرب ده پخش اولوندی ائدیب فاطمه وفات
دار بقایه رحلت ائدیب فخر امّهات
.
اوضاع قاریشدی بیربیره شهر اولدی منقلب
گویا رسول اکرمی درک ایلیب ممات
.
شهر اهلی فوری باب ولایه یغشدیلار
بو فکریله کی کسب ائده لر فیض باقیات
.
ریحانۀ پیمبره تشییعه گلدی لر
تا ایله سینله مهر و محبّت لرین ثبات
.
اعلان اولون دی گئتسین هره دودمانینه
قالدی جنازه دفنی ، اولونسون مقدّمات
.
شهر اهلی گئتدی ائولرینه ، گون غروب ائدیب
قاره گئیندی غرق عزا اولدی کاینات
.
زهرا جنازه سین آلیب آغوشه مرتضیٰ
حمل ایلیوبدی مغسله آغلاشدی شش جهات
.
اسماء توکردی سو او یارالی جنازیه
غسلون وئرردی شاه ولا فخر ممکنات
.
بیلمم نه گوردی میر هدا حین غسل دا
غرق اولدی بحر غصّه ده اول کشتی نجات
.
سس چکدی آغلادی دئدی زهرا یارالی سان؟
مندن ساری نقدر ائلیوبسن مجاهدات
.
شهد شهادت اولدی نصیبین خانم سنین
قالدی منه اورک ده کی دردِ مشاهدات
.
جانیم دوشوبدی تنگه اورک قاندی فاطمه
گریان گوزوم ده کشف اولونوب دور مکاشفات
.
ایلیم نه چاره آلدی الیمدن سنی قضا
گئتدی الیمدن احسنِ وجه محاسنات
.
پیک اجل هانی منی ده راحت ایلیه
مرآت دلده واردی غبار مکدّرات
.
غسلون وئریبدی دلبرینین دلده مین محن
ائتدی حنوط عزیزه سینه ایلدی کفن
.
12
.
امر ایلدی بالالارینا میر اولیا
توشه آلین آنازدان ای اسباط مصطفا
.
آخر گوروش دی بیرده آنازی گورنمه سوز
عطرین آلین ، اؤپون ، دانشین ، تئز سالین یولا
.
سالدی آنا جنازه سینه اؤزلرین اولار
عرشه اوجالدی زمزمۀ وا محمّدا
.
گویده ملائک آغلادی بو آه و شیونه
شاهددی بو قضیّۀ جانکاهه مرتضا
.
گوردوم دئیر کی فاطمه ناگه سزلدادی
قول لارین آچدی گول لرینی باسدی باغرینا
.
زهرا سزلدادی بالالار یاندی آغلادی
ناله قارشدی بیربیره محشر اولوب بپا
.
سنسیز دیردیلر آنا عمرون نه لذّتی
سنله صفا و حُسنی گئدور عالمین آنا
.
یا لَالعَجَب نه عالمیدی وصف ناپذیر
سس خلق اولوندی حیدره کای میر اوصیا
.
اطفالی تئز آیرگیله نعش بتول دن
ایتامی قویما بیر بئله نار غمه یانا
.
ایتام ائدنده ناله ملائک ده آغلیور
آفاقی غم دوتار بورونور غمله ماسوا
.
بیربیرآیردی فاطمه دن بند دل لرین
امر ایلیوبدی صبره او اطفالی هٰکذا
.
بیر دقّتیله آچدی یوزون باخدی یارینه
یاندی ، بیر آه چکدی ، دیدی دهره اُفّ اولا
.
یاننام الیم له قامتسوه ایلدیم کفن
نئیلیم ، نه چاره کی ئولومه تاپمادیم دوا
.
ئولدون ، منیم ده روحیم ئولوب سنله فاطمه
گئتدین ای آشنا غمیله اولدوم آشنا
.
بند ایلدی الینده کفن بندین اول عزیز
بیر آه چکدی یاندی گوزی اولدی اشکریز
.
13
.
آرتردی دم به دم کدر و سوز و سازینی
آز عدّه ایله قیلدی بتولون نمازینی
.
تابوته وئردیلر حرکت یاندی اهل بیت
زینب گتیردی نغمیه لحن حجازینی
.
چخسین گوزون فلک دئدی بیر باخ بو صحنیه
گور ختم مرسلین قزینین اعتزازینی
.
اهل حقیقته ائله دین زندان عالمی
وئردین جهوله جرم و جنایت جوازینی
.
مین حیله ایله پرچم حق اولدی سرنگون
گَتدین ظهوره پرچم کفر احتزازینی
.
راز و نیازه ده بیز ایچون اولمادین رضا
بیرده ائشیتمروخ آنا راز و نیازینی
.
محرابی بوش قالیب دی خبر یوخ سزلتی دان
وقت نماز آچیب دُؤشه دیم جانمازینی
.
الدن بیزیم گئدیب آنامیز ، لیک آتام علی
الدن وئریب دی همدم و هم سرّ و رازینی
.
پبغمبرین عزیزه قزیدی گرک بونون
عالم چکیدی حرمتیله عزّو نازینی
.
شأنی اوجیدی ، منزلتی فوق قدسیان
یخدی اودور کی تخت علا سرفرازینی
.
ائتدین سپر بلالره جسم نحیفینی
گتدین فروده ظلم و ستمله فرازینی
.
بیر باخدین هئچ تک الّی قیام و قنوتینه
سسلردی داده ذات حق بی نیازینی
.
حال دعاده قونشونو اوّل ائدن دعا
عرفاندا حفظ ائدیب بو گوزل امتیازینی
.
ناچار قالدی خیر فدک دنده چکدی ال
قورتارمیاندی گوردو کی غُصّابین آزینی
.
یومدو گوزون جهاندان اؤزون راحت ایلدی
عُقبانی خوش گوروب اویانا رحلت ایلدی
.
14
.
تابوتی حمل ائدوبله بقیعون دیارینه
قبر آچدی یاری آهیله ایستکلی یارینه
.
بیلمم نه حاله قالدی علی شیر لایزال
ایستکلی سین غمیله قویاندا مزارینه
.
ظاهر اولوبدی بیر جفت ال اول دمده قبردن
ائتسین کمک او دم ده او محنت دچارینه
.
سس خلق اولوندو فاطمه نی وئر منه علی
ایلوم نظاره سینه سنه یا عذارینه
.
مندن سنه امانتیدی فاطمه قزیم
فاش ائت نه وئردی یوز بدن زخمدارینه
.
قمچی یئری قولون دادی پهلو شکسته دی
سینه یانوبدی نار جفانین شرارینه
.
بو سینیه نولوبدی بئله زحمته دوشوب
دردی اولوب زیاده دؤزوب دَر فشارینه
.
سن سن امین مطلق و پیمانه پای بند
کشف ائت نه گلدی فاطمه نین روزگارینه
.
عرض ائتدی قدر فاطمه نی اولمادی بیلن
حرمت قویولمادی ابداً اعتبارینه
.
غصب اولدی حقّی ، ملکونی ظلمیله آلدیلار
اولدی محاصره ستم و غم حصارینه
.
سندن سورا ستمله ضعیف ائتدیلر بیزی
عترت بوروندی محنت و خفّت غبارینه
.
وار گوزلریمده قوم ، بوغازیم دا وار استخوان
گول ده سولوب فغان گتیریب دور هزارینه
.
شرمندیَم امانتی حفظ ایلییَنمَدیم
صرصر دولاندی ختم رُسُل لاله زارینه
.
ای کاش علی اولیدی دوگولمِیدی فاطمه
نه شاهد اولمیِیدی بتول آه و زارینه
.
تاپشوردی قبره فاطمه نی میر اتقیا
اشکی جماله آخدی چکیب آه جانگزا
.
15
.
بغض ایلیب دوتولدی گلوسی کلام دن
قبر بتولی شوط ائلدی استلام دن
.
تلخ اولدی کامی آخدی سرشکی عذارینه
کام آلدی چرخ دون او شه تلخ کام دن
.
آهسته گلدی نطقه اورک غم لرین دئیه
گئتدی توانِ دل او شه با قوام دن
.
یات راحت اول دئدی قوی علی دیده تر قالا
یوخدور خلاص اولان بو دل آزار دام دن
.
سنسیز نه لذّتی منه دنیا بهشت اولا
سنسیز علی نه لذّت آپارسین خرام دن
.
کیمدور علینی درک ائلیه ، دردینی بیله
کیمدور آزالدا دلده کی درد و مهام دن
.
ای رکن منزلیم ، پوزولوب نظم منزلیم
بی باغباندی دوشدی بو گلشن نظام دن
.
خیبر کنی سالیبدی ایاقدان بو آیریلیق
دور گور علی دوشوبدو نه نوعی دوام دن
.
روحیم دوشوبدو تنگه یانیر چرپنیر اورک
اوج ایلیور سزلتی سی لحم و عظام دن
.
حرمت قویولمادی سنه پیغمبرین قزی
شهر نبی ده دوشدوق عجب احترام دن
.
سن گئت پیمبریله خوش اول ، قوی منی قالیم
درده عجین و غمزده بو تلخ جام دن
.
قلبیم تسلّی تاپموری آرامشیم گئدیب
گوندوز اولوبدی تیره منه تار شام دن
.
قلبی شکستیَم منی سندردی رحلتین
کامیم ئولونجه تلخ دی بو اختتام دن
.
ختم اولدو دفن فاطمه ختم ائت (هدایتا)
یتسین قبوله شعرین حق لاینام دن
.
دل ده علینین عشقی ، بتولون محبّتی
آغلا یازاندا نوحه رُخِ نیل فام دن
.
#ای_بانوی_سرآمد_نسوان_عالمین
#ترکی
.
✍️ #زبدةالاشعار ✍️
.
🆔: @nohe_torki
نظر دهید