پندیات در بی وفایی دنیا و تجلیل از مقام #مادر
گریز به مصیبت حضرت زهرا سلام الله علیها
..
..
رضوی زنجانی
..
..
ای بشر بو ئولومین دهریده یوخ درمانی
گور نئجه کامه چکور خرد و کبار انسانی
..
هر تولد تاپان انسان ائدر آخرده وفات
یعنی آغازی گورن حتمی گورر پایانی
..
عمر سرمایه سینی قویما چوخ آسان داغیلا
توشه جمع ایله سفر غملیدی یول طولانی
..
دئمورم ارزشی یوخدور بو گوزل دنیانون
گر پیس اولسیدی یاراتمازدی خدا دنیانی
..
بو جهاندی یتیرن بو بشری تکمیله
بو بشر بوردا تاپور منزلت عقبانی
..
بو جهاندی داخی انسانه ویران سنگ محک
بو جهاندی آییران خار و خس و ریحانی
..
امتحان وئرمگه انسان کرۀ خاکه گلوب
قفس تنده اولوب روح بشر زندانی
..
بو جهان اولماسا حاشا بیلینه عاطفه لر
هانسی دل یا که اولوب مهر و محبت کانی
..
قادر الله دل مادرده نلر گور یارادوب
قلب پاک آنادی ملک وفا سلطانی
..
بالانون بارماقینا باتسا تیکان گور نیلر
دییر ای بند دلیم ای بویوون قربانی
..
آناوین بارماقینا کاش باتیدی او تیکان
یانار اول پاک اورگی عرشه چیخار افغانی
..
..
..
آنا مهرین یازا بیلمم اولورام دیوانه
گرک انسان دولانا باشینه چون پروانه
..
..
..
اوتلانور ایندی بو دل دلبر الیمدن گئتدی
زندگیده نئجه بیر گوهر الیمدن گئتدی
..
ائویمین یوخدی صفاسی داخی بو عالمده
یعنی منزلده اولان محور الیمدن گئتدی
..
زندگی گوزلریمه تار اولوب باور ائدین
رکن منزل پوزولوب مادر الیمدن گئتدی
..
او همای شرفیم عرشه طرف پر ویردی
قانادیم سیندی منیم شهپر الیمدن گئتدی
..
آنا انسان باشینا تاجیدی بو عالمده
اولمادی چاره م او تاج سر الیمدن گئتدی
..
دل آچاندان منه اورگتدی حسینون آدینی
وای منه ایندی او جان پرور الیمدن گئتدی
..
آقانین گول آدینی ازبر ائلتدیردی منه
ئوزوده ائتمیشیدی ازبر، الیمدن گئتدی
..
نه ئوزوم بلکه آنامدا آناوا قربان حسین
مرتضا سسلدی وای کوثر الیمدن گئتدی
..
نه گلین گتدی نه قیزلاری کوچورتدی زهرا
قالدیم حسرت دئدی اول گونلر الیمدن گئتدی
..
فاطمه پَرپَر اولان وقته صولوب رنگ حسین
دئدی گول تک آنامیز پرپر الیمدن گئتدی
..
..
..
شمع عمری خانمین دهریده خاموش اولدی
بالالار ناله ائدوب جمله سیه پوش اولدی
..
..
..
مرتضا غسل وئروب ائتدی کفن زهرانی
خاکه تاپشوردی ئوزی یاسمن طاهانی
..
قبریدن ظاهر اولوب اللرى طاهانین اودم
ئوزی تحویل آلا تا تاج سر نسوانی
..
پیکر فاطمه نی آلدی نه نوعی تحویل
سیندیروب گوردی عدو درّ حق یکتانی
..
دئدی دینجل بالا امّت سنی چوخ اینجیتدی
دوندروبلر قانا هم قلب شه مردانی
..
ما حصل قبره قویوب فاطمه نین پیکرینی
گیزلدیب شیر خدا جوهرۀ تقوانی
..
بیلمورم گلدی نئجه منزله حیدر او گئجه
دیزلری گلماقا گلمیردی شجاعت کانی
..
منزله گلدی ولی گللرین افسرده گوروب
زینبین رنگی صولوب عرشه چیخوب افغانی
..
نظم منزل پوزولوب اوزگه بیر احواله دوشوب
چون که الدن گئدوب اول وقته ائوین ارکانی
..
او پریشان بالالار ائوده گزیب هی آغلار
زینبین صبرین آلوب فاطمه نین هجرانی
..
..
..
یریوی ائوده دیور ای آنا خالی گورورم
در و دیواره باخوب درد و ملالی گورورم
..
..
..
ای جوانلیقدا دونن قدّی کمانه آناوای
ای آز عدیله گئدن قبره شبانه آناوای
..
غُربا تک بدنی قبره غریبانه گئدن
غصّه دن قلبی دونن دهریده قانه آناوای
..
وئریلن غسلی گئجه یله گئجه تشییع اولونان
اوت سالان درد و غمی قلب جهانه آناوای
..
بیلگین توخدامادی قبره گئدینجه نه نه جان
بیر الیله ویران ای باشیمه شانه آناوای
..
یریوی بؤش گورورم باشیمه دنیا دولانور
گلمیشم گور نئجه سنسیز داخی جانه آناوای
..
منزله گلسن اگر باشیوه زینب دولانار
آتش غم چکوری دلده زبانه آناوای
..
گر پوزولسیدی حسین سن دوزه بیلمزدین ئوزون
آغلیور گور نئجه الآن یانا یانه آناوای
..
گوزوموز گونده دوشر میخ و در و دیواره
گوز قباقینده چتیندی او نشانه آناوای
..
گوزی دوشدوقجا حسینون قاپیدا مسماره
گله جاق نی کیمی هر لحظه فغانه آناوای
..
آنا بیر نعمتیدی گئتدی الیندن «رضوی»
احترامی چوخودی مرثیه خوانه آناوای
..
..
#پندیات_رضوی_زنجانی #مادر_رضوی_زنجانی #فاطمیه #رضوی_زنجانی #فاطمیه_شهادت #ترکی #زبدةالاشعار #ختم_خوانی
نظر دهید