مصائب حضرت فاطمه (س)
..
..
مرحوم شبیرى
..
..
یاناندا ظلم الیله باب رحمت یا رسول الله
نه چکدی فاطمه بولمم او ساعت یا رسول الله
..
..
او دم که پیک حقّیله یتیشدى حکم ربّانی
حبیبیم وقتون اتمامه یتوب ترک ایله دنیانی
گیدوب خلد برینی گل جمالون ایتدی نورانی
ولی سنسیز بو عالم اولدی ظلمت یا رسول الله
..
..
دیمم بی شرم امّت باره سینده مقصده یتدون
ولیکن بیر به بیر احکام قرآنی بیان ایتدون
غم هجرونده آغلاتدون بو دنیانی اؤزون گتدون
ولی قویدون ایکی سنگین امانت یا رسول الله
..
..
سفارش ایلدون قرآنی بیرده آل طاهانی
صریحاً عترته مُنضمّ قیلدون حکم قرآنی
ولی اجرایه قویموب دشمن دون بو وصایانی
امانت لفظینه ایتدى خیانت یا رسول الله
..
..
دل زهرانی غمدن دشمن جانی اوساندیردی
مرامین بیعتی عنوان ایدوب دنیایه آندیردی
گلوبدور جبرئیل اذن ایستین درگاهی یاندیردی
او بی شرم و حیا ایتدی جسارت یا رسول الله
..
..
روادور گور گل طاها دچار جور خار اولسون
ایشیق گون کثرت غمدن گوزونده لیل تار اولسون
و یا زهرا کیمی بیر قز که سندن یادگار اولسون
نجه حقّینده گور ظلم ایتدی امّت یا رسول الله
..
..
نجه واضح دیوم بو ماجرانی یار آراسندا
بودور قورخوم که مطلب کشف اولا اغیار آراسندا
قالوب بیر حامله عورت در و دیوار آراسندا
گوروب دنیا ده کیم بیله مصیبت یا رسول الله
..
..
حیاتیندن خانم زهرا اگر چه ناامید اولدی
ولی باطنده بزم وصل یاره بیر نوید اولدی
گوروب فضّه گلور سس گل بالام محسن شهیداولدی
علینی سلسون چکدی خجالت یا رسول الله
..
..
سیزیله ایتمه دی سازش ندن بو چرخ دون فطرت
شهیده گئتدی دنیادن قزون ای علّت خلقت
بو قدری زحمته دوزدون ولیکن بی حیا امّت
عجب ویردی سنه اجر رسالت یا رسول الله
..
..
او صون دمده اولان درد و غم ایامدن خسته
گوزی یاشلو وصیّت باشلادی آهسته آهسته
باشی اوسته علی غمدن چکردی آهی آه اوسته
بو آغلاردی او ایتدیقجا وصیّت یا رسول الله
..
..
«شبیری» ایستمور اشعارینه بیر کس دیسون احسن
بولور مین بیتینه محشر گونی ویرمزله بیر ارزن
ولی لطفون سنون گر شامل اولسا بیر سر سوزن
ایکی دنیاسینه ایلر کفایت یا رسول الله
..
..
#فاطمیه #شبیری #فاطمیه_شهادت #ترکی #زبدةالاشعار
نظر دهید