زبانحال حضرت مولا علیه السلام هنگام دفن حضرت زهرا سلام الله علیها
..
..
مرحوم نجمی تبریزی
..
..
ای خاک بقیع آل گل بطحانی کناره
ریحانۀ پیغمبری زهرانی کناره
..
..
گتدیم دل شب دختر سلطان حجیزی
بالیده لنر مریم اگر اولسا کنیزی
سنده یاتوری نازیله پیغمبر عزیزی
آل فخریله صدّیقۀ کبرانی کناره
..
..
بیر جوهر نایابیدی بو جسم مطهّر
بیر کنز گرانمایه دی صدری دولی گوهر
دلپارۀ پیغمبر اکرمدی بو پیکر
چک جان کیمی دلپارۀ طاهانی کناره
..
..
بیر چرخ وفا ماهیدی بو منخسف اولموش
افلاک حیا مهریدی بو منکسف اولموش
بیر دُرج دی اون بیر دُره بطنی صدف اولموش
آل گوهر دل کنزی بو زهرانی کناره
..
..
تبدیل ایله ای خاک اؤزیوی بستر نازه
راحت گوز ائوینده بونی ساخلا تر و تازه
زحمتلره دنیاده دوشوب چوخ بو جنازه
اکرامیله آل بو قدی رعنانی کناره
..
..
چوخ فاطمه یه حرمت ایله حیدره خاطر
اوّل گئجه مهماندی سنه داوره خاطر
پهلوسی قولی یاره دی پیغمبره خاطر
یورقوندی آل آهسته بو اعضانی کناره
..
..
خوش حالیوه اولدی یوزون آق ای قره تربت
سنده یاتوری حسرتیله بیر ساری صورت
وار بیر شل اولان دست جفادن بیر علامت
آل بو گؤیَرَن صورت زیبانی کناره
..
..
سن ای قره توپراق کیمه گور مدفن اولورسان
بیر غصّه لر افتاده سینه مسکن اولورسان
حشره کیمی بیر فاطمه بیرده سن اولورسان
آل مونس جان بو یارالی جانی کناره
..
..
اون سگّیز ایل عمر ایلدی عالمده بو محزون
دائم غم ایّامیله دلخسته جگر خون
بار غمیله میم صفت قدّی اولوب نون
مین نازیله آل بو قد چوگانی کناره
..
..
بیر گولدی بو امّا دولودور خاریله صدری
موّاجدی دریا کیمی اسراریله صدری
بیر گون یاریلوب گول کیمی مسماریله صدری
چک یاره لیدور بو گل خندانی کناره
..
..
گتدی دل شب فاطمه نی شاه ولایت
قویدی یره گوزن اله دی اشک مصیبت
«نجمی» بیله گویا دیدی آهسته او حضرت
ای خاک بقیع آل گل بطحانی کناره
..
..
#فاطمیه #نجمی_تبریزی #فاطمیه_شهادت #ترکی #زبدةالاشعار
نظر دهید