ای دل گوز آچوب عالمه خلقت گولی زینب #زینبیه_مژده_اردبیلی

میلادیه حضرت زینب سلام الله علیها
..
..
مژده اردبیلی
..
..
ای دل گوز آچوب عالمه خلقت گولی زینب
گلزار محبتده محبت گولی زینب
..
بیر گولدی اونون وصفینه قادر دگولم من
چونکه یازیلوب عرشیده جنت گولی زینب
..
نقاش ازل نقشۀ دنیانی چکنده
بیر شاخه چکوب اولسون حقیقت گولی زینب
..
بازار مناعتده گولوم گزمه دولانما
بیر پارچا قیزیل گولدی شریعت گولی زینب
..
اندوه و بلا قافله سی کوچسون اورکدن
دنیایه گلوب چونکه امامت گولی زینب
..
زهرا که امامت باغینون لاله گولیدی
گل شاخه لنوب اولدی سیادت گولی زینب
..
پیغمبر رحمت بله فرمایش ایدیبدیر
ای باغ ولایتده ولایت گولی زینب
..
تبلیغ شریعت سنه ارثیه دی مندن
آچ گوزلرون ای باغ رسالت گولی زینب
..
ترویج دیانت که نهایتده گوزلدیر
سن سن گوزلیم ایندی دیانت گولی زینب
..
ای زینت آغوش ولی الله اعظم
سرحلقۀ ایثار و شهادت گولی زینب
..
جبریل امین عرش معلادن انوبدیر
ابلاغ ایلسون بوسوزی رأفت گولی زینب
..
پاکیزه آدون منتخب ذات جلیدور
یعنی که وجاهتده وجاهت گولی زینب
..
یاز (مژده) سوزی دهریده تبلیغ ایله دینی
محشرده الوندن دوتا عزت گولی زینب
..
..
#زینبیه #مژده_اردبیلی #زینبیه_میلادیه #ترکی #زبدةالاشعار