«حسین جان ائوین آباد»
شور در مدح حضرت اباعبدالله الحسین (ع)
.
.
#مصیبی_تبریزی
.
ای زینتِ جان، تاج سران، سرور آحاد –
حسین جان ائوین آباد
دانشکدۀ عشقیده عشق اهلینه استاد –
حسین جان ائوین آباد
آزاده لیقیندان اولوب اهل شرف آزاد –
حسین جان ائوین آباد
اذعان ائلیوب شوکت و اجلالیوه اوتاد* –
حسین جان ائوین آباد
کوبنده قیامیندن اولوب ظلم ائوی برباد –
حسین جان ائوین آباد
تا وار نفسیم ایلیرم عشقیله فریاد –
حسین جان ائوین آباد
.
.
سن برج ولایتده کی خورشید جلی سن
دنیاده کی عشاق سرافرازه ولی سن
سن قائم نه طاق و بنای ازلی سن
سن زادۀ زهرا ، گل گلزار علی سن
امّید دل شیعه گوزللر گوزلی سن
آثار قیامیندن اولوب شیعه لر ارشاد
«حسین جان ائوین آباد»
.
.
کیم دی آقامیز خلقته سروردی ماشالله
کیم دی آقامیز گویلره اختردی ماشالله
کیم دی آقامیز شیعیه رهبردی ماشالله
کیم دی آقامیز عزّته شهپردی ماشالله
قورخما دئنه عیسی اونا نوکردی ماشالله
گویلرده ائدر زادۀ مریم بئله فریاد
«حسین جان ائوین آباد»
.
.
مولامیزین هر قطره قانی گوهره بنزر
صولتده شجاعتده حسین ، حیدره بنزر
حُجب و شرفی فاطمۀ اطهره بنزر
صدق و غضب و غیرتی پیغمبره بنزر
شهلا گوزی وار عینا ًهمان گوزلره بنزر
دنیاده تاپولماز پسر حیدره اَنداد*
«حسین جان ائوین آباد»
.
.
کیمدی آقامیز خلقت ِ آفاقه بهانه
کیمدی آقامیز عزّت و رحمتدی جهانه
نوکر دایانوبلار بونا شاهان زمانه
فرمان وئرر آقا سپه و تیپ و یگانه
سرلشگری عبّاس دی احسنت او جوانه
ایللر بویی اولدی پسر حیدره مُنقاد*
«حسین جان ائوین آباد»
.
.
کیم دی آقامیز نورٌ علی نوردی والله
معراجی جدا ، قتلگهی طوردی والله
انسان و ملک عشقینه مسحوردی والله
کیم دی آقامیز عزّته منشور دی والله
توپراقی گوزه سرمۀ مخموردی والله
بذل ایله دی جانین کی یاتا پرچم الحاد
«حسین جان ائوین آباد»
.
.
کیم دی آقامیز معنی والشمسُ ضُحیٰ دی
کیم دی آقامیز سیّد و میر ِ شهدادی
ذرّ عالمی عشق اهلی اونا قالوا بلیٰ دی
ششگوشه حرم ، زائرینه مروه صفادی
طوف حرمی سعی دی ، مقتلده منادی
ای صحن حریمون بوتون عاشقلره مِرصاد*
«حسین جان ائوین آباد»
.
.
مرآت صفا زینت جنّات حسین دی
نور ازلی رونق میقات حسین دی
دلسوختۀ بزم مناجات حسین دی
اولیٰ سبب نظم سماوات حسین دی
فخر فلک وعرش و حجابات حسین دی
کان شرف و عزت و مردانگی و داد
«حسین جان ائوین آباد»
.
.
موسایه حسین عشقی وئروبدور ید بیضا
تاثیر دمین بوندان آلوب شخص مسیحا
مولامیزین عشقینده کسیلدی سر ِ یحییٰ
ئوپدی بوغازیندان خود پیغمبر بطحا
مقتلده او باش سیز بدنه آغلادی زهرا
سسلندی کی سندن صورا دنیا اولا بر باد
«حسین جان ائوین آباد»
.
.
ای قبریده ئوز رگلری نین قانی ، حنوطی
باش سیز بدنی حیرته سالمیش ملکوتی
عاشور گونی عرشی سالان درده ، قنوتی
قانین کی توکولدی یئره سیندیردی سکوتی
امضا اولونوب ظلم ائوینین حکم سقوطی
ای شور حماسی سی اولان عترته بنیاد
«حسین جان ائوین آباد»
.
.
آرام دل فاطمۀ اطهره سوگند
قاموس شهادتده سوسوز لبلره سوگند
باش سیز بدنه پارچالانان پیکره سوگند
صد پاره جنازه کسیلن اللره سوگند
باش تاجی حسین دی بیزه،تاج سَره سوگند
ششگوشه حریمی بوتون عاشقلره میعاد
«حسین جان ائوین آباد»
.
.
تاریخیده چوخ سوز یازیلوب شاه شهیده
عشق اهلی دیوبلر غزل و شعر و قصیده
بیز شیعه لرین وار ولی بیر بیله عقیده
هرمجلسیمیزده بو سۆز اولدی بیزه ایده
((بیعت ائله مز فاطمه نین اوغلی یزیده))
یوخ کیمسه ده جرات،ائده بومطلبه ایراد
«حسین جان ائوین آباد»
.
.
شعرینده « مصیّب» ادب آثاری اولیدی
زهرا، سۆزیوین بلکه خریداری اولیدی
ایکاش حسین لطفی بیزه ساری اولیدی
بیر کرب وبلا قسمتیمیز باری اولیدی
مداحیمیز اول دشتیده «جبّاری» اولیدی**
عشقیله دییدوخ ؛ شرف ِ سیّد سجّاد
«حسین جان ائوین آباد»
ـــــــــــ
اوتاد: پیشوایان
انداد: مثل ومانندها
منقاد: مطیع
مرصاد: کمینگاه
**مداح باصفای هیأت سیدالشهدای تبریز
.
.
#حسینیه_مدح #حسینیه #کربلا
#آرزوی_کربلا #مصیبی_تبریزی
#ای_زینت_جان_تاج_سران_سرور_آحاد
#ترکی
#زبدةالاشعار
.
نظر دهید