مقام مادر
#گریز به شهادت حضرت زهرا (س)
..
..
کربلایی فخرالدین اسکندری(جائد)
..
..
صدف عشقیده چون گوهر رخشان ننه لر
دُر پر قیمت و ارزنده ی دوران ننه لر
..
مخزن مهر و محبت هر ائلون زینتی دور
منزل و محفل آرا شمع درخشان ننه لر
..
آیت رحمت خلاق قدیم ازلی
صاحب عاطفه و رتبه ی شایان ننه لر
..
ایله کی بطنیده احساس ایله دی نطفه ی پاک
باشلیوب نقشه چکر شاد و خرامان ننه لر
..
اوّلین مسئله کی ذهنه خطور ایلر اودی
لقمه ی پاکیله ویرسون اونا بنیان ننه لر
..
تا قدم قویدی جهانه اونی آغوشه چکر
یوز گوزوندن ئوپوب هر لحظه دییر جان ننه لر
..
گیجه گوندوز اِلین مهر و محبت بالیا
آغلیان وقته چکن نازینی هر آن ننه لر
..
رشد ایدونجه بالاسی خون دیل آماجی اولار
ایستمز ذرّه جه اولسون بالا گریان ننه لر
..
قیز اوشاقی اولا یا اوغلان اولا نقشه چکر
بویوده رافتیله چون گل ریحان ننه لر
..
قاپی آغزیندا دورار گلسه اگر گیج بالاسی
یولا حسرتله باخار حالی پریشان ننه لر
..
گوزی دوشجک بالیا بیردن اورکدن سوئونر
فوری لبخندی اولار لبده نمایان ننه لر
..
طویونون فکرین ایدر هر آنانون پیشه سیدی
طوی اینده بالا چون چوخ اولی شادان ننه لر
..
آرزو ایلر بالا خوشبخت اولا خوش گون یاشیا
ئوزی هر چند گوره محنت شایان ننه لر
..
آناوین قدرینی بیل فرصتی ویرمه هدره
چون بش اون گون اولاجاق دهریده میهمان ننه لر
..
جنّته مشتریسن ئوپ آناوین ال ایاقین
اولسا راضی آلوسان روضه ی رضوان ننه لر
..
پیر وبرنا گیده جک ترک جهان ایتمه لیدی
یا بو گون یا که سحر جسمیلره جان ننه لر
..
بیر آنا من تانورام گیتدی جوان دنیادن
او جوان مادره اولسون هامی قربان ننه لر
..
وصفیده مادر پیغمبر و هم کفو علی
گل خوشبوی مدینه یوزی مهسان ننه لر
..
عصمت الله لقبی خیر نسا فاطمه دور
دوشدی بیر درده کی یوخ دردینه درمان ننه لر
..
ویردیلار اود قاپوسی دوتدی آلوشعله چکوب
اولدی مظلومیتی عالمه اعلان ننه لر
..
در و دیوار آراسیندا بالاسی سقط اولدی
وار یری آغلیا قان ایلیه افغان ننه لر
..
نه قیزین بخت ایوینه یوللادی نه گتدی گلین
گورمه دی بعدنبی هیچ سرو سامان ننه لر
..
قاپوسین یاندیران اعدا اورگین داغلادیلار
اولدی مظلومه او محبوبه ی یزدان ننه لر
..
سیندی پهلوسی جوان ترک ایله دی دنیانی
قویدی عالمده علینی ئوره گی قان ننه لر
..
گیجه غسل اولدی گیجه قبره گیدوب دخت نبی
قدری مجهوله اولوب مدفنی پنهان ننه لر
..
دفن ایدوب فاطمه نی گلدی ایوه آغلار علی
گوردی اولموش بالالار نی کیمی نالان ننه لر
..
بیری سسلور آناجان روح و روانیم سنیدون
گیتدون اولدی اورگیم غصه دن القان ننه لر
..
بیری سسلور باخارام بوش یریوه آغلیارام
جانمازین آچارام ایلرم افغان ننه لر
..
کوچه ده سسلر حسن وای یوزونه سیلی دگن
گیدرم کوچه نی من ایلرم اسکان ننه لر
..
فاطمه گیتدی جوان قالدی حسینی آناسیز
دویمادی هیچ آناسینّان گل رضوان ننه لر
..
چوخ چتیندور ننه دنیانی جوان ترک ایلسون
سانمیون بوغمی سیز راحت و آسان ننه لر
..
(ثاقبا) وار یری قان آغلیاسان فاطمیه
دویمادی دهریده چون دورت بالاسینّان ننه لر
..
..
#پندیات #ختم_خوانی #مادر
#فاطمیه_شهادت #ترکی #پندیات_جائد_زنجانی
#صدف_عشقیده_چون_گوهر_رخشان_ننه_لر
#جائد_زنجانی
#زبدةالاشعار
نظر دهید