ای شمع یانیر کوکب سیّار اود ایچینده #فاطمیه_سیفی_اردبیلی

شهادت حضرت زهرا سلام الله علیها
#گریز به #غارت_خیام
.
#زبدةالاشعار
.
: @nohe_torki
.
#سیفی_اردبیلی
.
ای شمع یانیر کوکب سیّار اود ایچینده
پروانه چکیر آه شرر بار اود ایچینده
.
سوز باشلامیشام فاطمه درد و محنیندن
ائتدیکجه رقم غرق اولو گفتار اود ایچینده
.
بولبول پر آچانمیر، سیخیلیب دامن ناره
از بس کی ووروب شب پره منقار اود ایچینده
.
گل غنچه لری فکر ائله نه حاله قالارلار
جبریلن اگر یانسا چمنزار اود ایچینده
.
بیر لحظه تماشاگر ائله، دل گوزون آخر
جدا گورک آیا نه خبر وار اود ایچینده
.
جبریل امین بوسه ووران درگهه بیر باخ
گویا کی یانیر معبد اسرار اود ایچینده
.
خیبر گوتورن الده باخین قید قضایه
یاندی صدف احمد مختار اود ایچینده
.
ثانی نئجه گور نشر ایلییب ظلم و فسادین
آواره دی محبوبی دادار اود ایچینده
.
دیواره وئریب تکیه، آخیر قان سینه سیندن
فریاده گلیبدیر در و دیوار اود ایچیده
.
ای گلشن ائدن ناری خلیل‌الهه رحم ائت
امّ‌النجبا اولدو گرفتار اود ایچینده
.
هاردا گورونوب حملة خصمانه گتیرسین
بیر عورته اوچ یوز نفر اغیار اود ایچینده
.
آیا نه جسارتدی بو ثانیده خدایا
صدیقی کبرانی ائدیب زار اود ایچینده
.
آخر نه روا حامله بیر طاهره عورت
نارس بالاسین سقط ائده ناچار اود ایچینده
.
زهرانی سالیب تنگه، عمر اوز قاپیسیندا
قان ائتدی دوشونده سوتو مسمار اود ایچینده
.
گوردو قاپینی قان بورویوب اودلادی فورا
تا محو اولا قاندان قالان آثار اود ایچینده
.
قالماز بونو درک ایلمدی گون بولود آلتدا
گئتمز آرادان مطلع انوار اود ایچینده
.
یانمازدیم اگر بیر اودا قیلسیدی کفایت
اولسایدی فقط فاطمه خونبار اود ایچینده
.
قنفذ دان آلیب قمچینی اویناتدی الینده
گویا کی چیخیب صیده سیه مار اود ایچینده
.
قمچیله گوگرتدی هاراسی گلدی قباغه
گوردو یوخ او مظلومیه غمخوار اود ایچینده
.
از بسکی ووروب فاطمه نی سالدی دوزومدن
درد ائتدی اونون گوزلرینی تار اود ایچینده
.
سسلندی او دم فضّه نی امداد ائله یاندیم
سالدی منی دیلدن داخی اشرار اود ایچینده
.
آز قالدی عدو حمله ائده صحن سرایه
ال توت منه ای یار وفادار اود ایچینده
.
فریادیمه گل چارسیزم محسنیم اولدو
ییخدی ائویمی قوم ستمکار اود ایچینده
.
وئر خامه تسلی بو مصیبتده بتوله
قویدو قاپیسین کینه¬ی کفّار اود ایچینده
.
سویله سن اوزون کی واریدون کربُ و بلاده
گوردون کی نئجه گرمیدی بازار اود ایچینده
.
سن ناظیریدون زینبوون خئیمه سی یاندی
قالدی او رشیده قیزون آغلار اود ایچینده
.
سندنده چتین درده دوشن زینبون اولدو
قویدو اتگین دشمن جبّار اود ایچینده
.
پروانه کیمی شهپرین اوددان اودا ووردو
به به نه گوزل ایلدی پیکار اود ایچینده
.
مأواسی یانان قوش کیمی آواره قاچاردی
شاید اولا اطفاله هوادار اود ایچینده
.
سسلردی دمادم کرم ائت ای حَکَم الله
اودلاندی امانت بالا قیزلار اود ایچینده
.
قویما منی شرمنده حسینیمدن الهی
گورکیم وار اولا حقّه پرستار اود ایچینده
.
هر قیز دیله گلسه دئسه یاندیم شرر آلتدا
تئز باشلارینا قمچی وورارلار اود ایچینده
.
رحم ائت یانار اوددان قوتاریم ساجدی یا رب
خوشدور من ئولم قالمایا بیمار اود ایچینده
.
ایله نظر الله بو قوجاغیمدا کی طفله
داغلی دلیمی ناله سی داغلار اود ایچینده
.
#سیفی نه گوزل رتبۀ ممتازه یئتیشدین
اولدون گوهر عشقه خریدار اود ایچینده
.
.
#فاطمیه_شهادت
#ای_شمع_یانیر_کوکب_سیار_اود_ایچینده
#ترکی
.
#زبدةالاشعار
.
: @nohe_torki